Մաղաքիա արք. Օրմանյան
24-30․ Եւ այնտեղից վեր կացաւ եկաւ Տիւրոսի ու Սիդոնի, սահմանները. եւ մի տուն մտնելով՝ չէր ուզում, որ որեւէ մէկն իմանայ իր այնտեղ լինելը, սակայն չկարողացաւ թաքնուած մնալ: Նրա մասին լսեց մի կին, որի դուստրը տառապում էր պիղծ ոգուց. սա եկաւ ընկաւ նրա ոտքերը: Այս կինը հեթանոս էր, փիւնիկ-ասորի ազգից. աղաչում էր նրան, որ իր աղջկանից դեւը հանի: Եւ Յիսուս նրան ասաց. «Թո՛յլ տուր, որ նախ մանուկները կշտանան, քանի որ լաւ չէ մանուկների հացը առնել եւ շների առաջ գցել»: Կինը պատասխանեց եւ ասաց. «Տէ՛ր, շներն էլ մանուկների սեղանի փշրանքներից են կերակրւում»: Եւ նա ասաց նրան. «Այդ խօսքիդ համար գնա՛, դեւը քո աղջկանից դուրս ելաւ»: Կինը գնաց իր տունը եւ դեւին ելած գտաւ, իսկ աղջկան՝ պառկած մահճի վրայ:
Տե՛ս Մեկնություն Ավետարան ըստ Մատթեոսի գլուխ 15:21
Որոգինես
Եւ այնտեղից վեր կացաւ եկաւ Տիւրոսի ու Սիդոնի սահմանները. եւ մի տուն մտնելով՝ չէր ուզում, որ որեւէ մէկն իմանայ իր այնտեղ լինելը, սակայն չկարողացաւ թաքնուած մնալ:
Հավանաբար, նա հեռացավ, քանի որ փարիսեցիները գայթակղվեցին, երբ լսեցին, թե «ոչ թե մտնողը, այլ ելնողն է մարդուն պղծում» (Մատթ. 15։17-18): Նա խուսափեց Իր ուսմունքից գայթակղված փարիսեցիներից, քանի որ տառապանքի համար ավելի հարմար ժամանակի էր սպասում:
Ըստ Մարկոսի՝ Հիսուսը հասել էր Տյուրոսի սահմանները, այսինքն՝ հեթանոսական շրջանները, որպեսզի նույնիսկ այդ հատվածներում եղած հավատացյալները կարողանային փրկվել... Մեզանից յուրաքանչյուրը, ով մեղք է գործում, պետք է համարի, որ կա՛մ Տյուրոսի, կա՛մ Սիդոնի, կա՛մ փարավոնի, կա՛մ Եգիպտոսի, կա՛մ էլ որևէ այլ երկրում է, բայց ոչ Աստծուն պատկանող հատվածում:
Թեոֆիլակտ Բուլղարացի
Եւ այնտեղից վեր կացաւ եկաւ Տիւրոսի ու Սիդոնի սահմանները. եւ մի տուն մտնելով՝ չէր ուզում, որ որեւէ մէկն իմանայ իր այնտեղ լինելը, սակայն չկարողացաւ թաքնուած մնալ:
Ուտելիքի մասին խոսելուց և հրեաների անհավատությունը տեսնելուց հետո Տերն անցնում է հեթանոսների սահմանները, որովհետև հրեաների անհավատության պատճառով փրկությունը պետք է անցներ հեթանոսներին: Սկզբում Տերը փորձում է թաքնվել, որպեսզի, որպես անմաքուր հեթանոսների կողքին կանգնող, հրեաները Նրան մեղադրելու համար առիթ չունենան: Այնուամենայնիվ, Նա չէր կարող թաքնվել, քանի որ Նրա համար թաքնվելը և ոչ մեկի կողմից չճանաչվելը անհնար էր:
Ա. Լոպուխին
Եւ այնտեղից վեր կացաւ եկաւ Տիւրոսի ու Սիդոնի սահմանները. եւ մի տուն մտնելով՝ չէր ուզում, որ որեւէ մէկն իմանայ իր այնտեղ լինելը, սակայն չկարողացաւ թաքնուած մնալ: (Սինոդական թարգմ․) [24]
Քանանացի կնոջ դստեր բժշկման հրաշքի մասին ընթերցի՛ր Մատթ. 15։21−28 համարների մեկնաբանությունները: Մարկոսը հավելում է, որ Քրիստոս, գտնվելով զուտ հեթանոսական երկրի սահմաններում, չէր ցանկանում այստեղ քարոզել և մնում էր իրեն ծանոթ ինչ−որ հրեայի տանը։ Իր թշնամիների ատելությունից այս վայրում Քրիստոսի թաքնվել ցանկանալու մասին միտքն (Միքայել եպիսկոպոս) այս հատվածում չի արտահայտվում:
---------------------------------------
[24] (Էջմիածին թարգմ․) Եւ այնտեղից վեր կացաւ եկաւ Տիւրոսի ու Սիդոնի ("Յունարէնը չունի ու Սիդոնի բառերը ) սահմանները. եւ մի տուն մտնելով՝ չէր ուզում, որ որեւէ մէկն իմանայ իր այնտեղ լինելը, սակայն չկարողացաւ թաքնուած մնալ:
(Արարատ թարգմ․) Հիսուսն այնտեղից ելավ ու գնաց Տյուրոսի և Սիդովնի սահմանները։ Նա մի տուն մտավ և չէր ուզում, որ որևէ մեկն այդ մասին իմանար, բայց չկարողացավ թաքնված մնալ։
(Գրաբար) Եւ անտի յարուցեալ ե՛կն ի սահմանս Տիւրոսի եւ Սիդովնի. եւ մտեալ ի տուն՝ ո՛չ ումեք կամէր յայտնել, եւ ո՛չ կարաց ծածկել:
Հաղորդում կայքում սխալի վերաբերյալ
Տվյալ հատվածում առկա է սխալ: