Գլուխ 15

   
1․ Եւ շինեաց իւր Դաւիթ տուն ի քաղաքին եւ պատրաստեաց տեղի տապանակին կտակարանաց Տեառն Աստուծոյ եւ անդ կանգնեաց խորան:

2․ Յայնմ ժամանակի խաւսել սկսաւ Դաւիթ եւ ասէ, ոչ ումեք այլ ումեք պարտ եւ պատշաճ է բառնալ զտապանակն կտակարանացն Տեառն, եթէ ոչ ղեւտացւոցն, զի ինքն Տէր ընդրեաց զղեւտացիսն բառնալ զտապանակ կտակարանացն Տեառն եւ պաշտել նոցա զնա, մինչչեւ յաւիտեան ժամանակաց:

3․ Եւ հրաման ետ Դաւիթ ժողովել զամենայն ազգս Իսրայէղացւոցն յԵրուսաղէմ զի հանցեն անդր զտապանակ կտակարանացն Տեառն ի տեղին զոր պատրաստեաց նմա Տէր,

4․ եւ ժողովեցին զամենայն որդիսն Ահարովն զղեւտացիսն

5․ եւ զորդիսն Կաաթու, Ուրիէլ իշխան եւ եղբարք նորուն հարիւր քսան:

6․ Յորդւոցն Մերարի, Ասաիա իշխան, եւ եղբարք նորուն երկուերիւր քսան:

7․ Յորդւոցն Գեթսոնա Յովել իշխան եւ եղբարք

8․ նորուն երկերիւր:

9․ Որդիքն Քեբրովնա Եղիէլ գլուխ եւ եղբարք նորուն ութանասուն:

10․ Յորդւոցն Ոզիէլի Ամինադաբ գլուխ եւ եղբարք նորուն.Ճ. եւ.ԲԺ.ան

11․ եւ հրաման ետ Դաւիթ կոչել զՍադովկ, եւ զԵւիաթար քահանայապետն, եւ զՂեւտացիսն, եւ ածին զՍուրիէլ, եւ զԱսաիա, եւ զՅովէլ, եւ զՍամէաս, եւ զԵղիէլ, եւ զԱմինադաբ,

12․ եւ ասէ ցնոսա Դաւիթ. Դուք էք նահապետք ազգատոհմացդ ղեւտացւոց, արդ սրբեցէք դուք զանձինս ձեր եւ զեղբարս ձեր, զի բառնալ մարթասցուք զտապանակն կտակարանաց Տեառն Աստուծոյ ի տեղւոյ ուր պատրաստեցին նմա,

13․ զի առանց պատրաստութեան ձերոյ արար սատակումն Տէր Աստուած մեր ի մեզ, զի ոչ խնդրեցաք մեք զնա իրաւամք

14․ եւ սրբեցան քահանայքն եւ ղեւտացիքն, զի բարձցեն զտապանակն կտակարանաց Տեառն Աստուծոյ Իսրայէղի,

15․ եւ բարձին որդիքն ղեւտացւոց զտապանակ կտակարանաց Տեառն, որպէս եւ հրաման տուեալ էր Մովսէսի բանիւ Տեառն Աստուծոյ Իսրայէղի, ըստ գրոյն լծացի բարձեալ ուսովքն իւրեանց,

16․ եւ հրաման ետ Դաւիթ իշխանացն ղեւտացւոց, եւ ասէ. Ածէք կացուցէք զեղբարս ձեր ի սպաս պաշտաման աւրհնութեան, ի սրինգս, ի փողս, եւ ի թմբուկս, զի լսելի լիցին բարձրացեալ ձայնք ուրախութեան:

17․ Եւ ածին կացուցին ղեւտացիքն զԵման որդի Յովեդայ, եւ յեղբարց անտի զԱսափ զորդի Բարաքայ, եւ յորդւոցն Մերարի եղբաւր նորա զԵթամ, զորդի Քուշիայ,

18․ եւ ընդ նմին եղբարք նորուն ղեւտացիք երկրորդեալք եւ Զաքարիա որդի Սէիէլ, Սէմիրամովթ, Յէիէլ, եւ Անանեայ, եւ Եղսափ, եւ Բանէ, եւ Մաասի, եւ Մատաթիայ, եւ Եղիփաաղ, եւ Մաղսիա, եւ Մականիա, եւ Եբղադոմ, եւ Յէիէլ, եւ Ոզիայ, դռնապանք

19․ եւ երգիչք, Եման, Եթամ, եւ Ասափ,

20․ Զաքարիայ եւ Ոզիէլ եւ Շամիրամովթ, եւ Յէէլ, եւ Անանիայ, եւ Եղիաբ, Մաասի եւ Բանէ, որ վասն գաղտնեացն

21․ Մատաթիայ եւ Եղիփաա, եւ Մականիայ, եւ Աբէդոմ, Յէիել, եւ Ոզիա վասն ութերորդացն ի բարձրաձայն բարբառոյ,

22․ եւ Յեքոնիա իշխան գլուխ ղեւտացւոցն ի համբառնալ զերգսն, զի իմաստուն էր

23․ Բարաքիայ եւ Եղկանա, դարապետք կտակարանացն

24․ եւ Սաբանիայ եւ Յուսափաթ, եւ Նաթանիէլ, եւ Ամասիա, եւ Զաքարիայ, եւ Բանէ, եւ Եղիազար քահանայք որ փողս հարկանէին փողովն առաջին տապանակին կտակարանացն Տեառն եւ Աբդիադովր, եւ Յէիէլ դռնապանք կտակարանաց Տեառն:

25․ Եւ էր Դաւիթ ի ծերակոյտ ժողովրդեանն զաւրագլուխ հազարաւոր գնդաց, որ երթային բառնալ զտապանակ կտակարանացն Տեառն ի տանէն Աբեդղադանու, խնդութեամբ եւ ուրախութեամբ:

26․ Եւ եղեւ իբրեւ խռնեալ կային ղեւտացիքն առաջի Տեառն ի բառնալ զտապանակ կտակարանաց եւ զենին զուարակս եւթն

27․ եւ Դաւիթ զգեցեալ էր բեհեզ եւ ամենայն ղեւտացիքն որ բառնալոց էին զտապանակն կտակարանաց Տեառն: Եւ Յեքոնիա գլուխ երգչացն, եւ Դաւիթ միայն զեփուտն ունէր,

28․ եւ ամենայն Իսրայէղ որ առեալ բերէին զտապանակ կտակարանաց Տեառն, ի ձայն ազդոյ, ի ձայն շիփորայ, եւ ի ձայն փողոյն կրկնէին:

29․ Եւ լինէր մինչ գայր տապանակն կտակարանաց Տեառն ի քաղաքն Դաւթի, եւ Մեղքող դուստր Սաւուղի, կարկառեալ կայր ընդ պատուհանսն, եւ ետես նա զարքա Դաւիթ, զի գայր նա կաքաւելով: Այպանեաց զնա ի միտս իւր: