Գլուխ 22

   
1․ Եւ ասէ Դաւիթ. Այս է տուն Տեառն Աստուծոյ, եւ այս է սեղան ողջակիզաց տանդ Իսրայէղի:

2․ Ապա ետ հրաման Դաւիթ ածել ժողովել զեկս աշխարհին երկրին Իսրայէղացւոց, եւ կացոյց զզնոսա քարագործս, կոփել քարինս քերածոյս, շինել զտաճար տանն Աստուծոյ,

3․ եւ երկաթ յոյժ ի բեւեռս դրանցն, ի գամս յաւդիցն, եւ ի կրկունս ծխնեացն: Եւ պատրաստեաց Դաւիթ երկաթ եւ պղինձ, զի ոչ գոյր կշիռ

4․ եւ փայտ, զի ոչ գոյր թիւ, զի կրելով կրէին Ծայդանացիքն, եւ Ծուրացիք մայտամայր, զի ոչ գոյր թիւ:

5․ Ապա խաւսել սկսաւ Դաւիթ եւ ասէ. Սողոմովն որդեակ իմ մանուկ մատաղէ, եւ տունդ շինելոյ Տեառն մեծի անուանէ, յանուն մեծի փառաց ընդ ամենայն երկիր: Ես պատրաստեցից նմա նիւթ շինածոյ, եւ պատրաստեաց Դաւիթ զնիւթ շինածոյ յառաջ քան զմահ իւր:

6․ Ապա կոչեաց Դաւիթ զՍողոմովն զորդի իւր, եւ հրաման տայր շինել զտաճարն Տեառն Աստուծոյ Իսրայէղի:

7․ Խաւսել սկսաւ Դաւիթ ընդ Սողոմովնի եւ ասէ. Ես ինձէն եդի ի մտի իմում շինել տուն անուան Տեառն Աստուծոյ իմում:

8․ Ապա եղեն պատգամքն Տեառն ի վերայ իմ եւ ասէ. Բազում են այն արիւնք որ հեղան ի ձեռաց, եւ անհնարին են պատերազմունք զոր պատերազմեցար դու, ոչ շինեսցես դու տուն անուան իմոյ: Զի արիւնք բազում հեղան յերկիր ի ձեռաց քոց առաջի իմ,

9․ այլ որդի ծնանելոց է ի քէն, սա եղիցի այր հանգստեան, եւ հանգուցից զնա յամենայն թշնամեաց իւրոց շուրջ զնովաւ, Սողոմովն անուն նորա, եւ խաղաղութիւն եւ հեզութիւն տաց ի վերա Իսրայէղի յաւուրս նորա:

10․ Սա շինեսցէ տուն անուան իմոյ: Սա եղիցի ինձ յորդիս եւ ես եղէց նորա հայր եւ պատրաստեցից զաթոռ թագաւորութեան նորա ի վերայ Իսրայէղացւոց մինչչեւ յաւիտեանս ժամանակաց,

11․ եւ արդ որդեակ իմ, եղիցի Տէր Աստուած քո ընդ քեզ եւ աջողեսցէ քեզ, եւ շինեսցես դու տուն Տեառն Աստուծոյ քո որպէս խաւսեցաւ նա վասն քո:

12․ Բայց տացէ քեզ Տէր Աստուած հանճար իմաստութեան եւ զաւրացուսցէ զքեզ ի վերայ Իսրայէղի առնել եւ պահել զամենայն զաւրէնս Տեառն Աստուծոյ,

13․ զի յայնժամ աջողիցի քեզ, յորժամ դու առնիցես պահիցես զաւրէնս հրամանաց Տեառն, զոր պատուիրեաց Տէր Մովսէսի ի վերայ որդւոցն Իսրայէղի, քաջալերեաց, զաւրացիր, մի երկնչիր եւ մի զանգիտէր:

14․ Արդ ահաւասիկ ես ըստ իմում աղքատութեան պատրաստեցի նւիւթ տան Տեառն, ոսկի քանքարս հարիւր հազար, եւ արծաթոյ հազարաց հազար քանքար, եւ պղծինձ եւ երկաթ բնաւ չափ չիք կշռոյ նորա, եւ փայտ, եւ քար պատրաստեցի,

15․ եւ դու յաւելջիր ի նոսա, եւ ընդ քեզ բազմակոյտ գործաւն ճարտարապետաց եւ քարակուռ եւ հիւսունս փայտի իմաստնացեալս, ճարտարացեալս ի գործ

16․ յոսկւոյ, յարծաթոյ, ի պղնծոյ, յանագոյ, զի ոչ իցէ թիւ եւ համար հապա արի եւ գործեա եւ Տէր եղիցի ընդ քեզ:

17․ Ապա դարձեալ պատուէր տայր Դաւիթ իշխանացն Իսրայէղացւոց հնազանդութեամբ ձեռնատու աւգնական լինել Սողոմովնի որդւոյ իւրոյ:

18․ Արդ խաւսել կալաւ եւ ասէ, ոչ Տէր Աստուած ընդ ձեզ էր եւ հանգոյց զձեզ յամենայնէ եւ մատնեաց ի ձեռս իմ զամենայն բնակիչս երկրի որ շուրջ զձեւք իցեն, եւ հնազանդ եղեւ առաջի ձեր եւ առաջի Տեառն ամենայն երկրի,

19․ արդ տուք ի սիրտս ձեր, եւ զոգիս ձեր խնդրել ի Տեառնէ Աստուծոյ ձերմէ, զարթիք, արիք, շինեցէք սրբութիւն Տեառն Աստուծոյ ձերում, զի բերջիք դիջիք ի նմա զտապանակ կտակարանաց Տեառն եւ զսպասն սրբութեան Աստուծոյ ի տանն զոր շինեսջիք անուան Տեառն Աստուծոյ ձերոյ: