Գլուխ 7

   
1. Որդեակ` պահեա զբանս իմ, եւ զպատուիրանս իմ ծածկեա յանձին քում: Որդեակ` պատուեա զՏէր` եւ զաւրացիր, եւ բաց ի նմանէ յայլ ումեքէ մի երկնչիր:

2. Որդեակ` պահեա զպատուիրանս իմ եւ կեցցես. եւ զբանս իմ իբրեւ զբիբ աչաց:

3. Յեռ զնոսա ընդ մատունս քո. եւ գրեա յընդարձակութիւն սրտի քոյ:

4. Ասա զիմաստութիւն քոյր քեզ լինել, եւ զհանճար արա քեզ ծանաւթ.

5. զի պահեսցէ զքեզ ի կնոջէ աւտարէ եւ ի չարէ: Յորժամ բանիւք զքեզ ի պատրանս արկանիցէ.

6. ի պատուհանից տան իւրոյ ի հրապարակս կարկառեալ:

7. Զորս տեսանիցէ յանմիտ մանկանց, զպակասամիտս յերիտասարդաց.

8. որ անցանիցեն ընդ հրապարակս առ ակամբ գնացից տան նորա.

9. եւ խաւսիցի ընդ խաւար երեկոյին. յորժամ դադարեալ ի մթոց գիշերոյն իցեն:

10. Եւ կինն ընդառաջ լինի նմա պոռնկութեան կերպարանաւք, որ յիմարեցուցանէ զմիտս երիտասարդաց` որ արբեալ եւ պակշոտեալ:

11. Եւ ի տան ոչ դադարեն ոտք նորա:

12. Ժամանակ ինչ արտաքոյ յածի եւ ժամանակ ինչ ընդ հրապարակս առ ամենայն անկեան դարանակալ լինի:

13. Ապա բուռն հարեալ համբուրեաց զնա, եւ լրբենի երեսաւք ասէ ցնա:

14. Ուխտք խաղաղութեան են ինձ. այսաւր հատուցանեմ զաղաւթս իմ:

15. Սմին իրի իսկ ելի ընդ առաջ քո. ցանկացեալ երեսաց քոց գտի զքեզ:

16. Երիզապատ պնդեցի զգահոյս իմ: Պաստառալիր եգիպտացւովք զարդարեցի:

17. Քրքմացան պատրաստեցի զանկողինս իմ. եւ զտուն իմ կինամոմով խնկեցի:

18. Եկ եւ վայելեսցուք սիրով մինչչեւ ցառաւաւտն. եկ եւ խաղասցուք ցանկութեամբ:

19. Զի ոչ է այր իմ ի տան. այլ գնացեալ է ճանապարհ հեռի:

20. Զքսակն արծաթոյ ի ձեռին իւրում առեալ, յետ բազում ժամանակաց` թէ ուրեք գայցէ ի տուն:

21.Եւ մոլորեցոյց զնա բազում բանիւք, եւ խեղդիւք շրթանց իւրոց վարանեաց զնա:

22. Եւ նա գնաց զկնի նորա յիմարեալ` իբրեւ արջառ ի սպանումն, եւ իբրեւ զշուն տոռամբ.

23. կամ իբրեւ զեղջիւրու հարեալ նետիւ ընդ լերդակողմն: եւ փութայ իբրեւ զհաւ ի ծաւղակս. եւ ոչ գիտէ թէ զոգին հալածական տանի:

24. Արդ որդեակ` լուր ինձ. եւ անսա բանից բերանոյ իմոյ:

25. Մի խոտորեսցի սիրտ քո ի ճանապարհս նորա, եւ մի մոլորիցիս ի շաւիղս նորա:

26. Զի զբազումս տապաստ արկեալ է նորա խոցոտելով, եւ անթիւ են սպանեալք ի նմանէ:

27. Ճանապարհք դժոխոց են տուն նորա. որ իջուցանեն ի շտեմրանս մահու: