1. Եւ եցոյց ինձ Տէր երկուս կողովս թզոյ, որ կային առաջի տաճարին Տեառն. յետ գերելոյն Նաբուքոդոնոսորայարքային բաբելացւոց զՅեքոնիայ որդի Յովակիմայ արքայի Յուդայ, եւ զիշխանս Յուդայ, եւ զարուեստագէտսն, եւ զկալանաւորակապսն, եւ զմեծամեծս յԵրուսաղէմէ. եւ տարաւ զնոսա ի Բաբելոն։
2. Կողովն մի էր յոյժ քաղցր թզոյ՝ իբրեւ զկանխահաս թզոյ. եւ կողովն երկրորդ՝ ժանտահամ թզոյ, որ ոչ ուտիցի ի ժանտութենէ իւրմէ։
3. Եւ ասէ ցիս Տէր՝ Զի՞նչ տեսանես Երեմիայ. եւ ասեմ թուզ թուզ քաղցր, եւ առաւել քաղցր. եւ թուզ ժանտ՝ եւ առաւել ժանտ, որ ոչ ուտիցի ի ժանտութենէ իւրմէ։
4. Եւ եղեւ բան Տեառն առ Երեմիա, եւ ասէ.
5. Այսպէս ասէ Տէր Աստուած Իսրայէլի. Իբր զթուզդ քաղցր, այդպէս ծանեայ զգերեալսդ Յուդայ՝ զորս առաքեցի ի տեղւոջէդ յայդմանէ յերկիրն Քաղդեացւոց ի բարութիւն։
6. եւ հաստատեցից զաչս իմ ի վերայ նոցա ի բարութիւն. եւ պատսպարեցից զնոսա ի սոյն երկիր. եւ շինեցից զնոսա, եւ ոչ քակեցից. եւ տնկեցից զնոսա եւ ոչ խլեցից։
7. Եւ տաց նոցա սիրտ ճանաչել զիս՝ թէ ես եմ Տէր. եւ եղիցին ինձ ի ժողովուրդ, եւ ես եղէց նոցա յԱստուած։ զի դարձցին առ իս յամենայն սրտէ իւրեանց։
8. Եւ իբրեւ զթուզդ ժանտ որ ոչ ուտի ի ժանտութենէ իւրմէ. այսպէս ասէ Տէր. Այդպէս մատնեցից զՍեդեկիա արքայ Յուդայ, եւ զմեծամեծս նորա, եւ զմնացորդս Երուսաղէմի, եւ զմնացորդս երկրիդ այդորիկ, եւ զբնակեալսն յԵգիպտոս։
9. Եւ տաց զնոսա ի ցրումն ընդ ամենայն ազգս եւ թագաւորութիւնս երկրի, եւ ի նախատինս, եւ յառակ, եւ յատելութիւն, եւ յանէծս, եւ յամենայն տեղիս ուր մերժեցից զնոսա անդր։
10. Եւ առաքեցից ի դոսա սով եւ սուր եւ մահ, մինչեւ պակասեսցին յերկրէդ զոր ետու դոցա եւ հարց իւրեանց։
Հաղորդում կայքում սխալի վերաբերյալ
Տվյալ հատվածում առկա է սխալ: