Եվ եղավ այն տարի, երբ մեռավ Ոզիա արքան, տեսա/Զ 1/.
Ոզիան բարեպաշտ թագավոր էր, և բազում ողորմություն արեց, ինչպես պատմում է, Չորրորդ Թագավորությունը, և քանի որ համարձակվեց խունկ գցել տաճարի մեջ, բորոտացավ, և ժաղովուրդն անփույթ գտնվեց նրա հանդեպ:Այդ պատճառով Աստված բարկացավ և արգելեց մարգարեների տեսիլքը, և ոչ մեկին չէր պատասխանում:Եվ երբ Ոզիան մեռավ, այնժամ այս տեսիլքը երևաց:
Հարց.Ի՞նչ է , որ ասում է Ավետարանը.,,Աստծուն ոչ ոք չի տեսել երբեք,, /Հովհ. Ա 18/.մինչդեռ Եսայի մարգարեն ասում է՝ Տեսա Տիրոջը/Զ 1/:
Պատասխան. Իրար հակառակ չեն, որովհետև ,,Աստծուն ոչ ոք չի տեսել ,, խոսքը նշանակում է Աստծո բնության էությունը. որովհետև եղականներիցս մեկն իսկ չի կարող տեսնել, քանզի մարգարեների տեսնելն ընդգրկելի է, մինչդեռ Աստված բնությամբ անընդգրկելի է: Սակայն այս մարգարեն տեսավ՝ որքան ի զորու է մարդը՝ կերպարանքով և նմանությամբ:Ուստի պարզ է, երբ ասում է ,,Տիրոջը տեսա նստած,,/Զ 1/,որովհետև Աստծո համար տեղ չկա, քանզի անընդգրկելի է, և անպատշաճ չէ նրան [վերագրել] նստելը:
Եվ ի՞նչ է նստելը. նախ նշանակում է մեզ խոնարհվելը և զիջելը:Երրորդ՝ Աստծո հաստատուն, անեղծ, անփոփոխ էությունն է նշանակում, ինչպես Երեմիան է ասում, ,,Մենք կկորչենք և դու կնստես հավիտյան,,/հմմտ.Ողբ Ե 19/:Երրորդ՝ ,,հանգիստը,, սուրբերի մեջ աստվածային կամքն է նշանակում, ըստ այնմ, թե՝ ,,Ես ու՞մ վրա հանգչեմ, եթե ոչ հեզերի և խոնարհների,, և այլն/ԿԶ 2/:Չորրորդ՝ Աթոռին նստելը դատել ու պատժել է նշանակում, ըստ այնմ՝ ,,Աթոռին նստեցիր դատավորդ արդարության,,/Սղմ.Թ 5/:Հինգերորդ՝ բարձր ու վեհ աթոռին նստելը բոլոր արարածների վրա նրա անհասանելի գերամբարձյալ թագավորությունն է նշանակում, ինչը երևում է նրա շուրջը խմբված սերովբեների ահով:Ըստ այն խոսքի, թե ,,Աստված մեծ թագավոր է երկրի վրա,,/Սղմ.ԽԶ 3/:Իսկ ասելը, թե՝ ,,Տաճարը լի է նրա փառքով,,/ Զ 1/. նախ փառքը հրաշալիքների ներգործման համար է ասում:Երկրորդ՝ փառքը լույսն է, ըատ առաքյալի. ,,Այլ է արեգակի փառքը և այլ է լուսնի փառքը,, /Ա Կորնթ. ԺԵ 41/: Երրորդ՝ [այդպես է] անվանվում գերապայծառ աստվածային լույսը:Չորրորդ՝ աստվածավայելուչ գեղեցկությունը փառք է անվանում:Հինգերորդ՝ փառքը, որ տաճարում էր, Սուրբ Հոգու շնորհն էր, որ ամպի նման հովանի էր սեղանին:
Հարց. Ի՞նչ է նշանակում՝ թևերն անմարմինների վրա:
Պատասխան. Նախ նրանց արագությունն է ցույց տալիս և մարդկանց համար Աստծո հրամանին պատրաստ լինելը:Երկրորդ՝ քանզի բարձր են ստորին խորհուրդներից:Երրորդ՝ նրանց պահպանությունն է ցույց տալիս, որպես Աստծո, ինչպես մարգարեն է ասում.,,Ծածկվենք քո թևերի հովանու ներքո,,/Սղմ. ԺԶ 9/:Իսկ վեց թևերից ,,երկուսով երեսը ծածկելը, երկուսով՝ ոտքերը, և երկուսով՝ թռչելը,,/Զ 2/ նախ այն է ցույց տալիս, թե անկարելի է Աստծո մեջ տեսնել սկիզբն ու վախճանը, քանզի անսկիզբ և անվախճան է, սակայն որոշ միջոցներով, այսինքն՝ օրիակների միջոցով աշխարհի լինելությունն ենք տեսնում:Դարձյալ՝ երեսների ու ոտքերի ծածկելը՝ Աստծուն նայելիս [ նրանց համակած] ահագին, սաստիկ երկյուղն է ցույց տալիս,ինչպես մենք ճայթյունից կամ փայլատակումից զարհուրում ենք և հակում մեր գլուխները:Իսկ միջին թևերը ցույց են տալիս հարատև սերը, որ Աստծո հանդեպ ունեն անփոփոխ կամքով, ինչպես ասացինք թևերի մասին:Իսկ մեկ առ մեկ աղաղակելը նախ ցույց է տալիս պատկառանքը, ինչպես մարդիկ ամաչելով մեծամեծներից չեն համարձակվում նրանց դեմ կանգնել, այլ մեկը մյուսի ետևն են անցնում:Դարձյալ՝ մեկը փառաբանություն էր երգում և մյուսին էր փոխանցում, և ոչ թե աշխատում էին, այլ պահպանում կարգավորությունը:Իսկ երեքսրբյան երգաբանությունը նախ Աստծո փառաբանություն է, որ միշտ մատուցում են:Երկրորդ՝ մարգարեություն է հանուն անդենական աստվածպաշտության, որ լինելու էր:Երրորդ՝ վկայությունն է մեր հաստատուն և աներժելի կրոնի՝ դավանելով Աստծուն երեք Անձնավորությունների մեջ և նրա մեկ Աստվածությունն ու Տերությունը:
Հաղորդում կայքում սխալի վերաբերյալ
Տվյալ հատվածում առկա է սխալ: