1․ Եւ խաւսեցաւ Դաւիթ Տեառն զբանս աւրհնութեանս այսորիկ` յաւուր յորում փրկեաց զնա Տէր ի ձեռաց ամենայն թշնամեաց իւրոց, եւ ի ձեռաց Սաւուղայ.
2․ եւ ասէ. Տէր վէմ իմ եւ ամրութիւն իմ, եւ փրկիչ իմ ինձ.
3․ Աստուած պահապան եղիցի ինձ. յուսացեալ եղէց ի նա. վերակացու իմ, եւ եղջեւր փրկութեան իմոյ. պաշտպան իմ, եւ ապաւէն փրկութեան իմոյ. յանիրաւէ փրկեսցէ զիս Տէր:
4․ Զաւրհնեալն զՏէր կարդացից, եւ ի թշնամեաց իմոց ապրեցայց:
5․ Զի պաշարեցին զիս ջախջախանք մահու. ուղխք անաւրէնութեան տագնապեցուցին զիս:
6․ Երկունք մահու պատեցան զինեւ. ժամանեցին ինձ որոգայթք մահու:
7․ Ի նեղութեան իմում կարդացից առ Տէր, եւ առ Աստուած իմ աղաղակեցից. եւ լուիցէ ինձ ի տաճարէ սրբոյ իւրմէ ձայնի իմում. եւ աղաղակ իմ յականջս նորա:
8․ Հայեցաւ եւ խռովեցաւ եւ շարժեցաւ երկիր, եւ հիմունք երկնից խռովեցան եւ տապալեցան. զի բարկացաւ նոցա Տէր:
9․ Ել ծուխ ի բարկութենէ նորա, եւ հուր ի բերանոյ նորա կերիցէ. կայծակունք բորբոքեցան ի նմանէ:
10․ եւ խոնարհեցոյց զերկինս եւ էջ, եւ մէգ ի ներքոյ ոտից նորա:
11․ Ել նստաւ ի վերայ քրոբէից, եւ թռեաւ, եւ երեւեցաւ ի վերայ թեւոց հողմոց:
12․ Եդ զխաւարն ծածկութիւն իւր, շուրջ զնովաւ խորան իւր. եւ խաւար ջրոց թանձրացոյց զամպս աւդոց:
13․ Ի լուսոյն առաջի նորա բորբոքեցան կայծակունք հրոյ:
14․ եւ որոտաց յերկնից Տէր, եւ բարձրեալն ետ զձայն իւր:
15․ Եւ առաքեաց զնետս իւր, եւ ցրուեաց զնոսա. փայլատակեցոյց զփայլատակունս` եւ զարհուրեցոյց զնոսա.
16․ եւ երեւեցան յորդութիւնք ծովու. եւ յայտնեցան հիմունք տիեզերաց ի սաստէ Տեառն, եւ ի շնչելոյ հողմոց բարկութեան նորա:
17․ Առաքեաց ի բարձանց եւ առ զիս. ձգեաց զիս ի ջրոց բազմաց.
18․ կորզեաց զիս ի բռնութենէ թշնամեաց իմոց, եւ յատելեաց իմոց, զի սաստկացան քան զիս:
19․ Ժամանեցին ինձ աւուրք նեղութեան իմոյ. եղեւ ինձ Տէր հաստատութիւն.
20․ եւ եհան զիս յանդորր. եւ ապրեցոյց զիս` զի հաճեցաւ ընդ իս.
21․ եւ հատոյց ինձ Տէր ըստ արդարութեան իմում. եւ ըստ սրբութեան ձեռաց իմոց հատուսցէ ինձ Տէր:
22․ Զի պահեցի զճանապարհս Տեառն, եւ ոչ ամպարշտեցայց յԱստուծոյ իմմէ:
23․ Զի ամենայն իրաւունք նորա առաջի իմ են. եւ յարդարութեանց նորա ոչ հեռացայց:
24․ եւ եղէց նմա անբիծ, եւ յառաջագոյն զգուշացայց յանաւրէնութենէ իմմէ:
25․ Եւ հատուսցէ ինձ Տէր ըստ արդարութեան իմում. եւ ըստ սրբութեան ձեռաց իմոց առաջի աչաց նորա:
26․ Ընդ սրբոյն սուրբ եղիցես. եւ ընդ առն կատարելոյ կատարեսցիս.
27․ եւ ընդ ընտրելոյն ընտրեալ եղիցես, եւ ընդ թիւրելոյն թիւրեսցիս:
28․ Զի դու զժողովուրդ տնանկ` փրկեսցես, եւ զաչս ամբարտաւանից խոնարհեցուսցես:
29․ զի դու ես ճրագ իմ Տէր. եւ դու Տէր լուսաւորեսցես ինձ զխաւար իմ:
30․ Զի քեւ ընթացայց մինազինեալ. եւ Աստուծով իմով անցից ընդ պարիսպ:
31․ Աստուած իմ հզաւր. որոյ անարատ է ճանապարհ իւր. բան Տեառն հզաւր քննեալ, վերակացու է ամենայն ապաւինելոց իւրոց:
32․ Ով է հզաւր բաց ի քէն Տէր. եւ ով է հաստիչ բաց յԱստուծոյ մերմէ:
33․ հզաւր, զաւրացուցանէ զիս զաւրութեամբ. ձգեաց անարատ զճանապարհս իմ:
34․ դնել զոտս իմ իբրեւ զեղջերուաց. եւ ի վերայ բարձանց կացուցանէ զիս:
35․ Ուսուցանէ զձեռս իմ ի պատերազմ. եւ հաստատեաց աղեղն պղնձի զբազուկս իմ:
36․ եւ ետուր ինձ պաշտպանութիւն փրկութեան իմոյ: եւ հնազանդութիւն իմ յաճախեաց ինձ:
37․ ընդարձակութիւն ի ներքոյ գնացից իմոց. եւ ոչ սասանեցան բարձք իմ:
38․ Հալածեցից զթշնամիս իմ եւ ապականեցից զնոսա, եւ ոչ դարձայց մինչչեւ սպառեցից զնոսա:
39․ խորտակեցից զնոսա` եւ մի կանգնեսցին. անկցին ի ներքոյ ոտից իմոց:
40․ Եւ զաւրացուսցես զիս զաւրութեամբ ի պատերազմ. եւ կորացուսցես ի ներքոյ իմ զյարուցեալսն ի վերայ իմ:
41․ եւ զթշնամիս իմ դարձուսցես յետս յինէն, եւ զատելիս իմ կոտորեցեր:
42․ Աղաղակեսցեն` եւ ոչ ոք իցէ որ աւգնեսցէ. առ Տէր` եւ ոչ լուաւ նոցա:
43․ եւ լեսի զնոսա իբրեւ զհող երկրի. եւ իբրեւ զկաւ գռեհաց մանրեցից զնոսա:
44․ եւ փրկեսցես զիս ի կռուոյ ժողովրդոց, եւ պահեսցես զիս ի գլուխ ազգաց: Ժողովուրդ զոր ոչ գիտէի` ծառայեաց ինձ.
45․ եւ ի լուր ունկան լուան ինձ: Որդիք աւտարոտիք ստեցին ինձ.
46․ որդիք աւտարոտիք ընկեսցին ի բաց. եւ սխալեսցին ի պաշարման իւրեանց:
47․ Կենդանի է Տէր` եւ աւրհնեալ է պահապանն իմ. եւ բարձրասցի Աստուած իմ պահապան փրկութեան իմոյ:
48․ Հզաւր Տէր որ առնէ զվրէժխնդրութիւն, խրատէ զժողովուրդս ի ներքոյ իմ:
49․ եւ հանէ զիս ի թշնամեաց իմոց. եւ յարուցելոց ի վերայ իմ բարձրացուսցէ զիս. յառնէ անիրաւութեանց փրկեսցես զիս:
50․ Վասն այսորիկ գոհացայց զքէն ի մէջ ազգաց Տէր, եւ անուան քում սաղմոս ասացից:
51․ Մեծացուցանէ զփրկութիւն թագաւորի, եւ առնէ ողորմութիւն աւծելոյ իւրում Դաւթի` եւ զաւակի նորա մինչչեւ ցյաւիտեան:
Հաղորդում կայքում սխալի վերաբերյալ
Տվյալ հատվածում առկա է սխալ: