Գլուխ 3

   
1. Վասն այսորիկ ես Պաւղոս կապեալ Յիսուսի Քրիստոսի, վասն ձեր հեթանոսաց:

2. Թերեւս լուեա՛լ իցէ ձեր զտնտեսութիւն շնորհա՛ցն Աստուծոյ, որ տուեա՛լ են ինձ ի ձեզ:

3. Զի ըստ յայտնութեա՛ն ցուցաւ ինձ խորհուրդն. որպէս յառաջագոյն գրեցի առ ձեզ սակաւուք.

4. առ ի կարաւղ լինելո՛յ ընթեռնուլ եւ ի միտ առնուլ՝ զիմաստութիւնն իմ ի խորհրդեա՛նն Քրիստոսի:

5. Զի այլոց ազգաց ո՛չ ցուցաւ որդւոց մարդկան. որպէս եւ այժմ յայտնեցաւ սրբոց իւրոց՝ առաքելոց եւ մարգարէից՝ հոգւո՛վն.

6. լինել հեթանոսաց ժառանգակիցս՝ եւ մարմնակիցս, եւ հաղորդս աւետեացն ի Քրիստոս Յիսուս՝ աւետարանաւն,

7. որոյ եղէ ես Պաւղոս սպասաւոր, ըստ պարգեւաց շնորհա՛ցն Աստուծոյ որ տուան ինձ, ըստ յաջողութեան զաւրութեան նորա:

8. Ինձ որ տրո՛ւպս եմ ամենայն սրբոց՝ տուան շնորհքս այս ի հեթանոսս, աւետարանել զանքննի՛ն մեծութիւնն Քրիստոսի.

9. եւ լուսաւո՛ր առնել զամենեսին, թէ զի՞նչ է տնտեսութիւն խորհրդոյն, որ ծածկեա՛լ էր յամենայն յաւիտեանց՝ առ Աստուծոյ որ զամենայն ինչ արար:

10. Զի յայտնեսցի արդ իշխանութեա՛նց եւ պետութեանց՝ որ յերկինս են, ի ձեռն եկեղեցւոյ՝ բազմապատի՛կ իմաստութիւնն Աստուծոյ.

11. ըստ յառաջադրութեան յաւիտեանցն՝ զոր արար ի ձեռն Տեառն մերոյ Յիսուսի Քրիստոսի:

12. Որով ունիմք զհամարձակութիւն, եւ զնուաճութիւն յուսով ի ձե՛ռն հաւատոց նորա:

13. Վասն որոյ աղաչեմ մի՛ ձանձրանալ ի նեղութեա՛նս մերում, որ վասն ձե՛ր որ է փա՛ռք մեր:

14. Վասն այսորիկ դնեմ ծունր առ հայր Տեառն մերոյ Յիսուսի Քրիստոսի.

15. ուստի ամենայն նահապետութիւն յերկինս եւ յերկրի անուանի.

16. զի տացէ՛ ձեզ ըստ մեծութեան փառաց իւրոց, հաստատել զաւրութեամբ ի ձեռն հոգւո՛յն իւրոյ, ի ներքին մարդն

17. բնակել Քրիստոսի հաւատո՛վք ի սիրտս ձեր. սիրո՛վ արմատացեալք, եւ հաստատեալք:

18. Զի կարաւղ լինիջիք հասանել ընդ ամենայն սուրբս, զի՛նչ է լայնութիւն եւ երկայնութիւն, եւ բարձրութիւն եւ խորութիւն.

19. ճանաչե՛լ զառաւելութիւն գիտութեան սիրո՛յն Քրիստոսի. զի լցջի՛ք ամենայն լրութեամբն Աստուծոյ:

20. Այլ ա՛յնմ որ կարաւղն է առաւել քան զամենայն ինչ առնել յաճախութեամբ, քան զոր խնդրե՛մքն եւ իմանամք. ըստ զաւրութեանն որ յաջողեա՛լն է ի մեզ:

21. Նմա փառք յեկեղեցւոջն եւ ի Քրիստոս Յիսուս, յամենա՛յն ազգս յաւիտենից յաւիտեանս. ա՛մէն: