Գլուխ 5

   
1. Նմանա՛ւղք եղերուք Աստուծոյ, իբրեւ որդիք սիրելիք.

2. եւ գնացէ՛ք սիրո՛վ՝ որպէս եւ Քրիստոս սիրեաց զմեզ, եւ մատնեաց զանձն իւր վասն մեր, պատարագ եւ զենումն Աստուծոյ ի հոտ անուշից:

3. Այլ պոռնկութիւն եւ ամենայն պղծութիւն, կամ ագահութիւն, եւ անուանեսցի մի՛ ի միջի ձերում, որպէս եւ վայելէ սրբոց.

4. եւ զազրութիւն, կամ խա՛ւսք յիմարութեան, կամ խեղկատակութիւն, որ ո՛չ վայելէ. այլ մանաւանդ գոհութի՛ւն:

5. Զայս տեղեկացեալ գիտասջի՛ք. թէ ամենայն պոռնիկ, կամ պիղծ, կամ ագահ, որ է կռապարիշտ՝ ո՛չ ունի ժառանգութիւն յարքայութեանն Քրիստոսին եւ Աստուծոյ:

6. Մի՛ ոք զձեզ խաբեսցէ բանիւք սնոտուովքք. զի վասն ա՛յսորիկ իսկ գայ բարկութիւն Աստուծոյ ի վերայ որդւոցն անհաւանութեան:

7. Մի՛ այսուհետեւ լինիք բաժանորդք նոցա:

8. Զի թէպէտ եւ երբեմն էիք խաւար, արդ՝ լո՛յս էք ի Տէր, իբրեւ զորդի՛ս լուսոյ գնացէ՛ք.

9. զի պտուղ լուսոյ ամենայն բարութեամբ է՝ եւ արդարութեամբ՝ եւ ճշմարտութեամբ:

10. Փորձեցէ՛ք՝ զի՛նչ է հաճոյ Տեառն.

11. եւ մի՛ կցորդ լինիք անպտղութեան գործոցն խաւարի. այլ մանաւանդ յանդիմանեցէ՛ք:

12. Զի որ ի ծածուկ ինչ գործի ի նոսա, զայն եւ խաւսե՛լ աղտեղի է:

13. Այլ ամենայն ինչ յանդիմանեալ ի լուսոյ՝ յայտնի՛ լինի. զի ամենայն ինչ որ յայտնի է՝ լո՛յս է:

14. Վասն որոյ եւ ասէ. արի՛ որ ննջեսդ, եւ կանգնեա՛ց ի մեռելոց, եւ լուսաւորեսցէ զքեզ Քրիստոս:

15. Տեսջի՛ք որպէս ճշմարտիւ գնայցէք. մի՛ իբրեւ անիմաստք,

16. այլ իբրեւ իմաստո՛ւնք. գնեցէ՛ք զժամանակս, զի աւուրքս չարութեա՛ն են:

17. Վասն այնորիկ մի՛ լինիք անմիտք, այլ իմացարո՛ւք զինչ են կամք Տեառն:

18. Եւ մի՛ արբենայք գինւով, յորում զեղխութի՛ւն այլ մանաւանդ լցարո՛ւք հոգւով.

19. խաւսել ի սիրտս ձեր սաղմոսիւք եւ աւրհնութեամբք, եւ երգովք հոգեւորաւք, երգել եւ սաղմոսել ի սիրտս ձեր Տեառն:

20. Գոհացարո՛ւք յամենայն ժամ ի վերայ ամենայնի, յանուն Տեառն մերոյ Յիսուսի Քրիստոսի՝ հա՛ւրն եւ Աստուծոյ.

21. հնազանդ լերուք միմեանց երկիւղիւն Քրիստոսի:

22. Կանայք՝ իւրեանց արանց հնազա՛նդ լիցին իբրեւ Տեառն.

23. զի այր է գլուխ կնոջ, որպէս եւ Քրիստոս գլո՛ւխ է եկեղեցւոյ. եւ ինքն է փրկիչ մարմնոյ:

24. Այլ որպէս եկեղեցին հնազանդ լինի Քրիստոսի, նոյնպէս եւ կանայք իւրեանց արանց յամենայնի:

25. Արք՝ սիրեցէ՛ք զկանայս ձեր. որպէս եւ Քրիստոս սիրեաց զեկեղեցի, եւ զանձն իւր մատնեաց վասն նորա.

26. զի զնա սրբեսցէ՛ սրբութեամբ աւազանին բանիւ.

27. զի կացուսցէ ինքն իւր յանդիման փառաւո՛ր զեկեղեցի, զի մի՛ ունիցի ինչ արատ, կամ աղտեղութիւն, կամ ա՛յլ ինչ յայսպիսեաց. այլ զի իցէ սո՛ւրբ եւ անարատ:

28. Նոյնպէս պարտին արք սիրել զիւրեանց կանայս, իբրեւ զիւրեանց մարմինս: Որ սիրէ զկին իւր, զանձն իւր սիրէ:

29. Զի ո՛չոք երբէք ատեայ զանձն իւր, այլ սնուցանէ եւ դարմանէ՛ զնա, որպէս եւ Քրիստոս զեկեղեցի.

30. զի անդա՛մք եմք մարմնոյ նորա, ի մարմնոյ նորա եւ յոսկերաց նորա:

31. Վասն ա՛յսորիկ թողցէ այր զհայր եւ զմայր իւր, եւ երթիցէ զհետ կնոջ իւրոյ, եւ եղիցին երկոքին ի մարմին մի:

32. Խորհուրդս այս՝ մե՛ծ է, բայց ես ասեմ իսկ ի Քրիստոս, եւ յեկեղեցի:

33. Այլ եւ դուք նոյնպէս մի ըստ միոջէ. զի իւրաքանչի՛ւրոք զի՛ւր կին՝ այնպէս սիրեսցէ՝ իբրեւ զի՛ւր անձն. եւ կին երկնչիցի՛ յառնէ իւրմէ: