1. Վասն որո ո՛չ եւս ունիմք ժոյժ, զի բարւո՛ք թուեցաւ մեզ միա՛յն մնալ յԱթէնս:
2. Եւ առաքեցաք զՏիմոթէ՛ոս զեղբա՛յր մեր եւ զգործակի՛ց աւետարանին Աստուծոյ, եւ հաւրն Քրիստոսի, հաստատել զձեզ՝ եւ մխիթարել վասն հաւատոցն ձերոց:
3. Զի մի՛ տաղտկայցէք ի նեղութիւնսս յայսոսիկ. քանզի դուք ինքնի՛ն իսկ գիտէք, զի ի սո՛յն կամք:
4. Քանզի մինչ առ ձե՛զն իսկ էաք՝ յառաջագո՛յն ասէաք ձեզ, թէ նեղութիւնք հասանելո՛ց են ի վերայ մեր. որպէս եւ եղե՛ւ իսկ՝ եւ գիտացէք:
5. Վասն այնորիկ եւ ես զի ո՛չ ունէի ժոյժ՝ առաքեցի գիտե՛լ զհաւատսն ձեր. գուցէ՛ արդեւք փորձեա՛ց եւ զձեզ փորձիչն, եւ ընդունա՛յն լինիցի ջանն մեր:
6. Բայց արդ՝ իբրեւ ե՛կն Տիմոթէոս ի ձէնջ առ մեզ, եւ ե՛տ մեզ զաւետի՛ս հաւատոցն ձերոյ, եւ զսիրոյ, զի ունիք ի մտի զյիշատա՛կս մեր բարեաց յամենայն ժամ. եւ ցանկացեալ էք տեսանել զմեզ՝ որպէս եւ մեք զձե՛զ.
7. վասն այսորիկ մխիթարեցա՛ք ի ձեզ ե՛ղբարք՝ ի վերայ ամենայն վշտա՛ց եւ նեղութեանց ձերոց, ի ձեռն հաւատոցն ձերոց.
8. զի այժմ՝ կենդանի՛ եմք՝ եթէ դուք հաստատո՛ւն կայցէք ի Տէր:
9. Զի՞նչ կարեմք գոհութիւն մատուցանել Աստուծոյ վասն ձեր, ի վերայ ամենայն խնդութեանն զոր խնդա՛մք վասն ձեր առաջի Աստուծոյ մերոյ.
10. զցայգ եւ զցերեկ առաւե՛լ եւս աղաչեմ՝ տեսանել զերե՛սս ձեր, եւ հաստատե՛լ զպակասութիւն հաւատոցն ձերոց:
11. Այլ ինքն Աստուած եւ հա՛յր մեր՝ եւ Տէր մեր Յիսուս Քրիստոս՝ ուղղեսցէ՛ զճանապարհս մեր առ ձեզ:
12. Եւ զձե՛զ ինքն Տէր բազմապատի՛կս եւ առաւե՛լս արասցէ սիրով ընդ միմեանս եւ առ ամենեսին՝ որպէս եւ մեք ի
13. հաստատել զսիրտս ձեր անարա՛տս ի սրբութիւն առաջի Աստուծոյ եւ հաւր մերոյ՝ ի գալստեա՛նն Տեառն մերոյ Յիսուսի Քրիստոսի՝ հանդերձ ամենայն սրբովք իւրովք:
Հաղորդում կայքում սխալի վերաբերյալ
Տվյալ հատվածում առկա է սխալ: