1. Այսուհետեւ ե՛ղբարք՝ աղաչեմ զձեզ, եւ մխիթարեմ ի Քրիստոս Յիսուս. զի որպէս ընկալարուք ի մէնջ, թէ ո՞րպէս պարտ իցէ ձեզ գնալ՝ եւ հաճո՛յ լինել Աստուծոյ. որպէս եւ գնա՛յք իսկ, զի ե՛ւս քան զեւս յաւելուցուք ի նոյն:
2. Եւ գիտէ՛ք՝ թէ որպիսի պատուիրանս տուաք ձեզ ի Տէր Յիսուս:
3. Զի ա՛յս են կամք Աստուծոյ, սրբութի՛ւն ձեր. ի բա՛ց լինել ձեզ ի պոռնկութենէ,
4. գիտե՛լ իւրաքանչիւր ումեք ի ձէնջ զիւր աման ստանալ սրբութեամբ եւ պատուով.
5. մի՛ ի ցաւս ցանկութեան՝ որպէս եւ ա՛յլ հեթանոսք որ ո՛չ գիտեն զԱստուած:
6. Մի՛ զանցանել եւ զրկել յիրի՛դ յայդմիկ զեղբայր իւր. քանզի վրէժխնդիր է Տէր ի վերայ ամենայնի այդորիկ. որպէս յառաջագո՛յն ասացաք ձեզ, եւ եդաք վկայութիւն:
7. Քանզի ո՛չ կոչեաց զմեզ Աստուած ի պղծութիւն՝ այլ ի սրբութի՛ւն:
8. Այսուհետեւ որ անարգէ, ո՛չ զմա՛րդ անարգէ, այլ զԱստուած՝ որ եւ ետ զհոգին սուրբ ի ձեզ:
9. Այլ վասն եղբայրսիրութեան՝ չէ՛ ինչ պիտոյ գրել առ զի դուք ինքնի՛ն իսկ Աստուածուսոյցք էք՝ առ ի զմիմեանս սիրելոյ:
10. Քանզի եւ առնէ՛ք իսկ զդո՛յն յամենայն եղբարս, որ են յամենայն կողմանս Մակեդովնացւոց: Աղաչեմ զձեզ եղբարք՝ առաւե՛լ եւս առաւելուլ եւ առատանալ. հանդարտել,
11. եւ գործել զիւրաքանչիւր. եւ գործե՛լ ձեռա՛ւք ձերովք, որպէս եւ պատուիրեցաք ձեզ, զի գնայցէք պարկեշտութեամբ առ արտաքինսն, եւ մի՛ իւիք կարաւտեալք իցէք:
12. Ո՛չ կամիմ եղբարք՝ եթէ տգէտք իցէք վասն ննջեցելոցն. զի մի՛ տրտմիցիք որպէս եւ այլքն որոց ո՛չ գոյ յոյս:
13. Եթէ հաւատամք՝ եթէ Յիսուս մեռաւ եւ յարեաւ. նոյնպէս եւ Աստուած զննջեցեալսն ի ձեռն Յիսուսի ածցէ՛ ընդ նմա:
14. Բայց զայս ասեմք Տեառն բանիւ, թէ մեք որ կենդանիքս եմք մնացեալք ի գալստեանն Տեառն ոչ ժամանեմք ննջեցելոցն:
15. Զի ինքն Տէր հրամանաւ ի ձայն հրեշտակապետի, եւ ի փող Աստուծոյ իջանէ յերկնից. եւ մեռեալք ի Քրիստոս յարիցե՛ն յառաջագոյն:
16. Ապա եւ մեք որ կենդանւոյն մնացեալ իցեմք՝ նոքա՛ւք հանդերձ յափշտակեսցուք ամպովք ընդ առաջ Տեառն յաւդս. եւ այնպէս յամենայն ժամ ընդ Տեառն լինիցիմք:
17. Այսուհետեւ մխիթարեցէ՛ք զմիմեանս բանիւքս այսոքիւք:
Հաղորդում կայքում սխալի վերաբերյալ
Տվյալ հատվածում առկա է սխալ: