1. Յուդա Յիսուսի Քրիստոսի ծառա՛յ, եւ եղբայր Յակոբայ. հեթանոսաց որ յԱստուծոյ հաւրէ էք սիրեցեալք, եւ Յիսուսի Քրիստոսի պահեալք եւ ընտրեալք:
2. Ողորմութիւն ձեզ՝ խաղաղութիւն եւ սէր բազմասցի:
3. Սի՛րելիք՝ զամենայն փոյթ յանձին կալեալ գրե՛լ ձեզ՝ վասն մերոյ հասարակաց փրկութեանն, հա՛րկ յանձին կալայ գրե՛լ ձեզ, եւ աղաչել զի ճգնիցի՛ք ի վերայ հաւատոցն որ միանգամ աւանդեցա՛ւն սրբոց:
4. Քանզի սպրդեցին մտին ոմանք, որ յառաջագոյն իսկ կատարեալ էին ի սո՛յն դատաստան. ամպարիշտք, որ զԱստուծոյ մերոյ շնորհսն դարձուցին յանկարգութիւն. եւ զմի միայն զիշխանն՝ եւ զՏէր մեր Յիսուս Քրիստոս ուրացեա՛լք:
5. Յիշեցուցանե՛լ ձեզ այսուհետեւ կա՛մ է ինձ՝ որ գիտէքդ զամենայն: Զի Աստուած միանգամ զժողովուրդն փրկեա՛ց յԵգիպտոսէ. երկրորդ անգամ զանհաւատսն կորո՛յս:
6. Եւ զհրեշտակս որ ո՛չ պահեցին զիւրեանց իշխանութիւնն, այլ թողին զիւրեանց բնակութիւնն, ի դատաստանս մեծի աւուրն՝ մշտնջենաւո՛ր կապանաւք պահեաց ի խաւարի:
7. Որպէս Սոդոմն եւ Գոմոր, եւ որ շուրջ զնոքաւք քաղաքքն, որ ըստ նմին աւրինակի պոռնկեցան զհե՛տ ընկերացն մարմնոց, կան առաջի աւրինակ՝ զյաւիտենական հրոյն ընկալեալ զդատաստան:
8. Ըստ նմին աւրինակի եւ սոքա իբրեւ քնո՛վ դանդաչեալք՝ զմարմինն պղծե՛ն, զտէրութիւնս քամահե՛ն, զփառսն հայհոյեն:
9. Ուր Միքայէլ հրեշտակապետն յորժամ բանսարկուն սատանայի վիճեա՛լ տայր պատասխանի վասն մովսիսեանն մարմնոյ, ո՛չ ժպրհեցաւ հայհոյութեանն դատաստանի հանդուրժել. այլ ասէ՝ սաստեսցէ՛ ի քեզ Տէր:
10. Իսկ սոքա զոր ինչ ո՛չն իմանան՝ հայհոյե՛ն: Եւ զայլսն եւս զոր բնութեամբ իբրեւ զանխաւս անասուն գիտեն, ի նոսին ապականեսցին:
11. Վա՛յ է նոցա, զի ըստ ճանապարհին Կայենի գնացին, եւ ըստ մոլորութեանն բաղամայ զեղխեցա՛ն զհետ վարձուց, եւ ըստ հակառակութեանն Կորխայ կորեան:
12. Սոքա են ատեցեա՛լք, շոգմո՛գք, երթեա՛լ զհետ ցանկութեանց իւրեանց. ի սէրս իւրեանց՝ խարդախութեամբ, լինին ընդ ձեզ ուրախակիցք. աներկեւղ զանձինս ճարակեն: Ամպք անջրդիք, հողմակոծեա՛լք, ծառք պտղակորո՛յսք, անպտո՛ւղք, կրկնամե՛ռք, խլեա՛լք արմատաքի:
13. Անսա՛ստ ալիք ծովու, որ միշտ փրփրե՛ն զիւրեանց անձանցն զամաւթ. աստե՛ղք մոլարք, որոց վի՛հ խաւարին յաւիտենից պահեալ է:
14. Մարգարէացա՛ւ վասն նոցա եւ եւթներո՛րդն յԱդամայ Ենովք՝ եւ ասէ: Ահաւասիկ եկն Տէր բիւրովք սրբովք հրեշտակաւք,
15. առնել դատաստա՛ն ըստ ամենայնի, եւ յանդիմանե՛լ զամենայն ամպարիշտս վասն գործոց իւրեանց՝ զոր ամպարշտեցին. եւ վասն ամենայն խի՛ստ բանից, զոր խաւսեցան զնմանէ մեղաւորք եւ ամպարիշտք:
16. Սոքա են տրտնջա՛ւղք եւ շոգմո՛գք, երթեա՛լ ըստ իւրեանց անձանց ցանկութեանց. եւ բերանք նոցա զամբարտաւա՛նս բարբառին. առնուն ա՛կն երեսաց վասն աւգտի:
17. Բայց դուք սի՛րելիք՝ յիշեցէ՛ք զկանխասաց բանս զառաքելոցն Տեառն մերոյ Յիսուսի Քրիստոսի.
18. զի ասէին ձեզ, եթէ ի յետին ժամանակս եղիցին մարդք արհամարհա՛ւղք, երթեա՛լք ըստ իւրեանց ամպարշտութեանցն ցանկութեանց:
19. Սոքա են նշաւակեալք շնչաւո՛րք, որ զոգին ո՛չ ունիցին:
20. Այլ մեք սի՛րելիք՝ եղիցուք շինե՛լ զանձինս սրբութեամբն հաւատոց ի հոգին սուրբ. կացցո՛ւք յաղաւթս,
21. պահե՛լ զանձինս սիրովն Աստուծոյ. ա՛կն ունել ողորմութեանն Տեառն մերոյ Յիսուսի Քրիստոսի ի կեանսն յաւիտենական:
22. Եւ ոմանց դատապարտելոց լինիջի՛ք կշտամբի՛չք,
23 եւ զոմանս ապրեցուցանիջի՛ք՝ յափշտակեալ ի հրոյ. եւ ոմանց ողորմեսջի՛ք երկիւղիւ դատել, եւ զպատմուճանն որ ի մարմնոյն իցէ աղտեղեալ:
24 Եւ այնմ որ կարաւղն իցէ պահել զձեզ անարատս եւ անբիծս, հաստատեալ առաջի իւրոց փառաց աներկեւա՛նն ցնծութեամբ.
25 միոյն Աստուծոյ եւ փրկչին մերոյ Յիսուսի Քրիստոսի Տեառն մերոյ՝ փա՛ռք, մեծութիւն, զաւրութիւն, եւ իշխանութիւն՝ յառա՛ջ քան զամենայն յաւիտեանս, եւ այժմ եւ յամենա՛յն յաւիտեանս. ա՛մէն:
Հաղորդում կայքում սխալի վերաբերյալ
Տվյալ հատվածում առկա է սխալ: