1․ Այս են պատգամք` զոր խաւսեցաւ Մովսէս ընդ ամենայն որդիսն Իսրայէղի յայնկոյս Յորդանանու յանապատին յարեւմուտս` մերձ ի ծովն Կարմիր, ի մէջ Փառանտոփողա, եւ Ղոբոնա, եւ հանգրուանացն եւ ոսկեկայ,
2․ մետասանաւրեայ ճանապարհ ի Քորեբայ ցլեառն Սէիր եւ մինչչեւ ցԿադէսբառնեայ:
3․ Եւ եղեւ ի քառասներորդում ամի, ցամսեանն մետասաներորդում, որ աւր մի էր ամսոյն: Խաւսեցաւ Մովսէս ընդ ամենայն որդիսն Իսրայէղի. ըստ ամենայնի զոր պատուիրեաց Տէր առ նոսա.
4․ յետ հարկանելոյն զՍեհոն արքայն Ամուրհացւոց զբանակեալն յԵսեբովն: եւ զՈվգք` արքայ Բասանու զբնակեալն յԱստարովթ եւ յԵդրացին.
5․ յայնկոյս Յորդանանու յերկրին Մովաբու. սկսաւ Մովսէս մեկնել զաւրէնս զայսոսիկ` եւ ասէ:
6․ Տէր Աստուած մեր խաւսեցաւ ընդ մեզ ի Քորեբ` եւ ասէ. Շատ լիցի ձեզ բնակել ի լերինս յայսմիկ.
7․ դարձարուք եւ չուեցէք դուք աստի, եւ մտանիցէք ի լեառնն Ամուրհացւոց, եւ առ ամենեսին որ շուրջ բնակեալ իցեն զԱրաբացւովքն ի լերինս եւ ի դաշտս, եւ ընդ հարաւ եւ ընդ ծովեզեր Քանանացւոց, յաներն Լիբանանու` մինչչեւ ցգետն մեծ ցգետն Եփրատ:
8․ Տեսէք զի ահա մատնեցի առաջի ձեր զերկիրն, մտէք ժառանգեցէք զերկիրն` զոր երդուայ ես տալ հարցն ձերոց, Աբրահամու եւ Սահակայ եւ Յակովբա. տալ նոցա եւ զաւակի նոցա յետ նոցա զերկիրն` որ բղխէ զկաթն եւ զմեղր:
9․ Եւ խաւսեցայ ընդ ձեզ ի ժամանակին յայնմիկ` եւ ասեմ.
10․ Ոչ կարեմ միայն հանդարտել ձեզ. Տէր Աստուած մեր բազմացոյց զձեզ. եւ ահաւադիկ էք դուք այսաւր իբրեւ զաստեղս երկնից բազմութեամբ:
11․ տէր Աստուած հարցն մերոց յաւելցէ ի ձեզ եւս քան որչափ էքդ հազարապատիկ, եւ աւրհնեսցէ զձեզ` որպէս խաւսեցաւ ընդ ձեզ:
12․ Եւ զի՞արդ կարիցեմ միայն կրել զաշխատութիւնդ ձեր, եւ զաղխս ձեր, եւ զհակառակութիւնս ձեր:
13․ արդ` տուք ի ձէնջ ձեզ արս իմաստունս, խորհրդականս, եւ հանճարեղս ի վերայ ցեղից ձերոց. եւ կացուցից ի վերայ ձեր զիշխանս ձեր:
14․ Եւ պատասխանի ետուք ինձ եւ ասացէք. Բարիոք է բանդ զոր խաւսեցար առնել:
15․ Եւ առի ի ձէնջ զցեղապետս ձեր, արս իմաստունս եւ հանճարեղս, եւ խորհրդականս. եւ կացուցի զնոսա ի վերայ ձեր, առաջնորդս, հազարապետս, եւ հարիւրապետս, եւ յսնապետս, եւ տասնապետս, եւ ատենադպիրս դատաւորացն ձերոց:
16․ Եւ պատուիրեցի դատաւորացն ձերոց ի ժամանակին յայնմիկ` եւ ասեմ. Լուարուք ատեան ի մէջ եղբարցն ձերոց. եւ դատեցարուք արդարութեամբ ի մէջ առն եւ եղբաւր իւրոյ. եւ ի մէջ եկին իւրոյ.
17․ եւ մի առնուցուս ակն ի դատաստանի, ըստ փոքուն եւ ըստ մեծին դատեսցիս. եւ մի խորշիցիս յերեսաց մարդւոյ. զի դատաստան Աստուծոյ է. եւ բան ինչ որ ծանրագոյն է քան զձեզ, հասուսջիք առ իս` եւ լուայց:
18․ Եւ պատուիրեցի ձեզ ի ժամանակին յայնմիկ զամենայն բանս` զոր առնիցէք:
19․ Եւ չուեալ ի Քորեբայ շրջեցաք ընդ ամենայն անապատն ընդ մեծ եւ ընդ ահագին, զոր դուք իսկ տեսէք, զճանապարհ լերինն Ամուրհացւոց. որպէս պատուիրեաց տէր Աստուած մեր մեզ, եւ եկաք մինչչեւ ցԿադէսբառնեայ:
20․ Եւ ասացից ցձեզ. Եկայք մինչչեւ ցլեառնն Ամուրհացւոց` զոր տէր Աստուած մեր տացէ ձեզ.
21․ տեսէք` զի մատնեաց տէր Աստուած մեր առաջի երեսաց ձերոց զերկիրն. ելէք ժառանգեցէք` որպէս ասաց տէր Աստուած հարցն մերոց ձեզ. մի երկնչիցիք` եւ մի զանգիտիցէք:
22․ Եւ մատեաք առ իս ամենեքեան` եւ ասացէք. Առաքեսցուք յառաջագոյն քան զմեզ արս, եւ դիտեսցեն մեզ զերկիրն. եւ պատմեսցեն մեզ զհանգամայնս ճանապարհին ընդ որ ելանիցեմք անդր, զքաղաքացն յորս մտանիցեմք:
23․ Եւ հաճոյ թուեցաւ առաջի իմ բանն. եւ առի ի ձէնջ երկոտասան այրս, այր մի ըստ ցեղի:
24․ եւ գնացին ելին ի լեառնն, եւ հասին մինչչեւ ի ձորն Ողկուզի, եւ լրտեսեցին զնա.
25․ եւ առին ի ձեռս իւրեանց ի պտղոյ երկրին, եւ իջին առ մեզ` եւ բերին մեզ զրոյց. ասեն. Բարի է երկիրն` զոր տէր Աստուած տալոց է մեզ:
26․ Եւ ոչ կամեցայք ելանել, եւ հեստեցէք բանին տեառն Աստուծոյ մերոյ.
27․ եւ տրտնջեցէք ի վրանս ձեր եւ ասացէք. Առ ատելութեան Տեառն էհան զմեզ յերկրէն Եգիպտացւոց, մատնել զմեզ ի ձեռս Ամուրհացւոց, սատակել զմեզ.
28․ արդ` յո՞ ելանիցեմք: Եւ եղբարք ձեր զանգիտեցուցին զսիրտս ձեր` եւ ասեն. Ազգ մեծ եւ բազում, եւ զաւրագոյն քան զմեզ, եւ քաղաքք մեծամեծ եւ պարսպաւորք մինչչեւ ցյերկինս. այլ եւ որդիս սկայից տեսաք մեք անդ:
29․ Եւ ասացի ցձեզ. Մի զանգիտիցէք եւ մի զարհուրիք ի նոցանէ.
30․ տէր Աստուած մեր որ երթայ առաջի երեսաց ձերոց, նա տայ պատերազմ ընդ նոսա փոխանակ ձեր. Ըստ ամենայնի զոր արար ձեզ յերկրին Եգիպտացւոց առաջի աչաց մերոց.
31․ եւ յանապատիս յայսմիկ զոր տեսէք: զի սնոյց զքեզ տէր Աստուած քո, որպէս սնուցանիցէ ոք զորդի իւր, ըստ ամենայն ճանապարհին զոր եւ գնայցէք` մինչչեւ եկիք ի տեղիս յայս:
32․ Եւ բանի յայսմիկ ոչ հաւատացէք տեառն Աստուծոյ ձերում,
33․ որ երթայ առաջի ձեր ի ճանապարհիդ, ընդրել ձեզ զտեղին. առաջնորդել ձեզ հրով ի գիշերի, ցուցանել ձեզ զճանապարհն ընդ որ գնայցէք. եւ ամպով ի տուէ:
34․ Եւ լուաւ Տէր ձայնի բանիցն ձերոց. Եւ բարկացեալ երդուաւ` եւ ասէ.
35․ Էթէ Տեսանիցէ ոք յարանցդ յայդցանէ զերկիրն բարի` զոր երդուայ տալ հարցն նոցա,
36․ բայց Քաղեբ որդի Յեփովնեա, նա տեսցէ զնա. եւ նմա տաց զերկիրն յոր էհաս եւ որդւոց նորա, վասն յարելոյ նորա ի Տէր:
37․ Եւ ինձ բարկացաւ Տէր վասն ձեր` եւ ասէ. Եւ դու մի մտցես անդր.
38․ այլ Յեսու որդի Նաւեայ սպասաւոր քո, նա մտցէ անդր. զնա զաւրացոյ, զի նա ժառանգեցուսցէ զնա Իսրայէղի:
39․ Եւ ծնունդք ձեր եւ որդիք ձեր զորոց ասացէք թէ ի յափշտակութիւն լինիցին, եւ ամենայն մանուկ մատաղ որ ոչ գիտիցէ այսաւր զբարի եւ զչար, նոքա մտցեն անդր. եւ նոցա տաց զնա, եւ նոքա ժառանգեսցեն զնա:
40․ Եւ դուք դարձարուք եւ չուեցէք յանապատն ընդ ճանապարհ Կարմիր ծովուն:
41․ Եւ պատասխանի ետուք եւ ասացէք. Մեղաք առաջի տեառն Աստուծոյ մերոյ. ելցուք` տացուք պատերազմ որպէս պատուիրեաց մեզ տէր Աստուած մեր. եւ առեալ իւրաքանչիւր զգործի պատերազմի իւրոյ` գումարեցայք ելէք ի լեառնն:
42․ Եւ ասէ ցիս Տէր. Ասա ցնոսա, մի ելանէք եւ մի մարտնչիք` զի չեմ ընդ ձեզ, գուցէ խորտակիցիք առաջի թշնամեաց ձերոց:
43․ Եւ խաւսեցայ ընդ ձեզ` եւ ոչ լուարուք ինձ, եւ անցէք զբանիւ Տեառն. եւ անսաստեցէք եւ ելէք ի լեառնն:
44․ Եւ ելեալ Ամուրհացին` որ բնակեալ էր ի լերինն յայնմիկ ընդ դէմ ձեր` հալածեաց զձեզ, որպէս պատիցի մեղու, եւ խոցոտեցին զձեզ ի Սէիրայ մինչչեւ ցՀերմա:
45․ եւ նստեալ լայիք առաջի Տեառն. եւ ոչ լուաւ Տէր ձայնի ձերում, եւ ոչ անսայց ձեզ:
46․ Եւ նստայք ի Կադէս աւուրս բազումս. որչափ աւուրս երբեմն նստայք անդ:
Հաղորդում կայքում սխալի վերաբերյալ
Տվյալ հատվածում առկա է սխալ: