1. Եւ այս են պատուիրանք եւ իրաւունք եւ դատաստանք` զոր պատուիրեաց ձեզ տէր Աստուած մեր, ուսուցանել զձեզ` առնել այսպէս յերկրին յոր դուք մտանիցէք ժառանգել:
2. Զի երկնչիջիք ի տեառնէ Աստուծոյ մերոյ, պահել զամենայն իրաւունս նորա, եւ զպատուիրանս նորա զոր ես պատուիրեմ ձեզ այսաւր: դու եւ որդիք քո, եւ որդիք որդւոց քոց, զամենայն աւուրս կենաց քոց. զի երկայնաւրեայք լինիցիք:
3. Եւ լուր Իսրայէլ եւ զգոյշ լեր առնելոյ. զի բարի լինիցի ձեզ, եւ բազմանայցէք յոյժ, որպէս խաւսեցաւ Աստուած հարցն քոց տալ քեզ զերկիրն որ բղխէ զկաթն եւ զմեղր: Այս իրաւունք եւ դատաստանք են` զոր պատուիրեաց Մովսէս որդւոցն Իսրայէղի յանապատին, յելանել նոցա յերկրէն Եգիպտացւոց:
4. Լուր Իսրայէլ, տէր Աստուած մեր` Տէր մի է:
5. սիրեսցես զտէր Աստուած քո յամենայն սրտէ քումմէ, եւ յամենայն անձնէ քումմէ, եւ յամենայն զաւրութենէ քումմէ եւ յամենայն մտաց քոց:
6. Եւ եղիցին պատգամքս այսոքիկ զոր ես պատուիրեմ քեզ այսաւր ի սրտի քում եւ յանձին քում:
7. եւ իմացուսցես զայս որդւոց քոց. եւ խաւսեսցիս սոքաւք, ի նստել ի տան, եւ գնալ ի ճանապարհի, եւ ի ննջել եւ ի յառնել:
8. Եւ արկցես զսոսա նշան ի ձեռին քում. եւ եղիցի անշարժ առաջի աչաց քոց:
9. եւ գրեսցես զսոսա ի վերայ Սեմոց տանց քոց, եւ ի դրունս քո:
10. Եւ եղիցի յորժամ տանիցի զքեզ տէր Աստուած քո յերկիրն զոր երդուաւ հարցն քոց Աբրահամու, եւ Սահակայ, եւ Յակովբա տալ քեզ զքաղաքս մեծամեծս եւ գեղեցիկս զորս ոչ շինեցեր:
11. Եւ տունս լի ամենայն բարութեամբ զորս ոչ լցեր, եւ ջրհորս փորեալս զորս ոչ փորեցեր. եւ այգիս եւ թզենիս զորս ոչ տնկեցեր:
12. եւ ուտիցես եւ յագեսցիս:
13. Զգոյշ լինիջիր անձին. գուցէ մոռանայցես զտէր Աստուած քո, որ էհան զքեզ յերկրէն Եգիպտացւոց ի տանէ ծառայութեան: Ի տեառնէ Աստուծոյ քումմէ երկիցես, եւ զնա պաշտեսցես, եւ ի նա յարեսցիս, եւ յանուն նորա երդնուցուս:
14. Մի երթայցէք զհետ աստուածոց աւտարաց, եւ զհետ աստուածոց ազգացն որ շուրջ զձիւք իցեն:
15. Զի Աստուած նախանձոտ, տէր Աստուած քո ի միջի քում. գուցէ բարկացեալ սրտմտիցի տէր Աստուած քո սատակել զքեզ յերեսաց երկրէ:
16. Մի փորձեսցես զտէր Աստուած քո` որպէս փորձեցէք ի փորձութեանն:
17. Պահելով պահեսցես զպատուիրանս տեառն Աստուծոյ քո, զվկայութիւնս եւ զիրաւունս եւ զդատաստանս զոր պատուիրեաց քեզ.
18. եւ արասցես զհաճոյն եւ զբարին առաջի տեառն Աստուծոյ քո. զի քեզ բարի լիցի, եւ մտցես եւ ժառանգեսցես զերկիրն բարի` զոր երդուաւ Տէր հարցն մերոց.
19. հալածել զամենայն թշնամիս յերեսաց քոց, որպէս եւ խաւսեցաւ:
20. Եւ եղիցի յորժամ հարցանիցէ ցքեզ վաղիւ որդին քո եւ ասիցէ. Զի՞նչ են վկայութիւնքն եւ իրաւունքն եւ դատաստանքն` զոր պատուիրեաց տէր Աստուած մեր մեզ:
21. Եւ ասասցես ցորդին քո. Ծառայք էաք փարաւովնի յԵգիպտոսէ, եւ էհան զմեզ Տէր անդի հզաւր ձեռամբ եւ բարձր բազկաւ եւ մեծամեծ տեսլեամբք.
22. եւ ետ Տէր նշանս եւ արուեստս մեծամեծս եւ չարաչարս յերկրին Եգիպտացւոց, ի փարաւոն եւ ի տուն նորա առաջի մեր.
23. եւ էհան զմեզ անտի, զի ածցէ այսր` տալ մեզ զերկիրս զայս զոր երդուաւ տալ հարցն մերոց:
24. Եւ պատուիրեաց մեզ Տէր առնել զամենայն զիրաւունս զայսոսիկ. երկնչել ի տեառնէ Աստուծոյ մերմէ, զի բարի լիցի մեզ զամենայն աւուրս. զի կեցցուք որպէս եւ այսաւրս:
25. Եւ ողորմութիւն եղիցի մեզ, եթէ զգուշասցուք առնել զամենայն պատուիրանս զայսոսիկ առաջի տեառն Աստուծոյ մերոյ, որպէս եւ պատուիրեաց մեզ:
Հաղորդում կայքում սխալի վերաբերյալ
Տվյալ հատվածում առկա է սխալ: