1. Եւ խաւսեցաւ Տէր ընդ Մովսեսի` յանապատին Սինայի, ի խորանն վկայութեան, ի միում ամսեանն երկրորդի. յամին երկրորդի ելանելոյ նոցա յերկրէն Եգիպտացւոց. ասէ.
2. Առէք զհամար ամենայն ժողովրդեան որդւոցն Իսրայէլի, ըստ ազգս: Ըստ տանց նահապետաց, ըստ թուոց յանուանէ` ըստ գլխոցն նոցա.
3. ամենայն արու ի քսանամենից եւ ի վեր, ամենայն որ ելանիցէ ի զաւրսդ Իսրայէլի, հանդէս առնել նոցա հանդերձ զաւրութեամբ իւրեանց: Դու եւ Ահարոն առնիցէք նոցա հանդէս
4. եւ ընդ ձեզ լինիցին իւրաքանչիւր ըստ ցեղի, իւրաքանչիւր իշխանի, ըստ տանց նահապետաց լինիցին:
5. Եւ այս են անուանք արանցն որ յանդիման լինիցին ընդ ձեզ. Ըռոբենի` Եղիսուր որդի Սեդիուրա,
6. Շմաւովնի` Սամաղիէլ որդի Սուրիսադայի,
7. Յուդայի` Նաասովն որդի Ամինադաբայ,
8. Իսաքարայ` Նաթանայէլ որդի Սովգարայ,
9. Զաբաւղովնի` Եղիաբ որդի Քեղղովնայ,
10. որդւոյն Յովսեփայ, Եփրեմի` Եղիսամ որդի Եմիուդայ, Մանասէի` Գամաղիէլ որդի Փադասուրայ,
11. Բենիամենի` Աբիդան որդի Գեդեւովնի,
12. Դանայ` Աքիեզեր որդի Միսադա,
13. Ասերայ` Փագէել որդի Եքրանայ,
14. Գադա` Եղիսափան որդի Ռագուելի,
15. Նեփթաղիմա` Աքիրէ որդի Ենանա:
16. Սոքա են անուանիք ժողովրդեանն. իշխանք ցեղիցն ըստ նահապետաց հազարապետք Իսրայէղի:
17. Եւ առին Մովսես եւ Ահարովն զարսն զայնոսիկ, որք յանուանէ կոչեցան:
18. Եւ զամենայն ժողովուրդն ժողովեցին եւ ի միում ամսեանն երկրորդի, յամին երկրորդի, եւ մտին ի հանդէս ըստ ազգաց իւրեանց, ըստ նահապետաց իւրեանց, ըստ թուոյ անուանց նոցա, ի քսանամենից եւ ի վեր, ամենայն արու ըստ գլխոց իւրեանց,
19. որպէս հրամայեաց Տէր Մովսեսի, եւ մտին ի հանդէս յանապատին Սինաի:
20. Եւ եղեն որդիք Ռովբենի անդրանկանն Իսրայէղի ըստ ազգս իւրեանց, ըստ գնդից իւրեանց, ըստ տանց նահապետաց իւրեանց, ըստ թուոյ անուանց իւրեանց, ամենայն արու ի քսանամենից եւ ի վեր, ամենայն որ ելանէր ի զաւրս Իսրայէղի, հանդէս նոցա
21. յազգէն Ռովբենի քառասուն եւ վեց հազար եւ հինգ հարիւր:
22. Եւ որդւոցն Շմաւովնի` ըստ ազգս իւրեանց, ըստ գնդից իւրեանց, ըստ տանց նահապետաց իւրեանց, ըստ թուոյ անուանց իւրեանց, ըստ գլխոց իւրեանց, ամենայն արու ի քսանամենից եւ ի վեր, ամենայն որ ելանէր ի զաւրս, հանդէս նոցա
23. ի ցեղէն Շմաւովնի, յսուն եւ ինն հազար եւ երեք հարիւր:
24. Եւ որդւոցն Յուդայ` ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց նոցա, ըստ գլխոց իւրեանց, ամենայն արու ի քսանամենից եւ ի վեր, ամենայն որ ելանէր ի զաւրս հանդէս նոցա
25. ի ցեղէն Յուդայ, եւթանասուն եւ չորք հազարք եւ վեց հարիւր:
26. Եւ որդւոցն Իսաքարայ` ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց իւրեանց, ըստ գլխոց իւրեանց, ամենայն արու ի քսանամենից եւ ի վեր, ամենայն որ ելանէր ի զաւրս հանդէս նոցա
27. ի ցեղէն Իսաքարայ, յսուն եւ չորք հազարք եւ չորեք հարիւր:
28. Եւ որդւոցն Զաբաւղովնի` ըստ գունդս իւրեանց, ըստ ազգս իւրեանց, ըստ տանց նահապետաց իւրեանց, ըստ թուոյ անուանաց իւրեանց, ըստ գլխոց իւրեանց, ամենայն արու ի քսանամենից եւ ի վեր, ամենայնի որ ելանէր ի զաւրու հանդէս նոցա
29. ի ցեղէն Զաբաւղովնի, յսուն եւ եւթն հազար եւ չորեք հարիւր:
30. Եւ որդւոցն Յովսեփու` որդւոցն Եփրեմի` ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց նոցա, ըստ գլխոց իւրեանց, ամենայն արու ի քսանամենից եւ ի վեր, ամենայնի որ ելանէր ի զաւրու հանդէս նոցա
31. ի ցեղէն Եփրեմի քառասուն հազար եւ հինգ հարիւր:
32. Եւ որդւոցն Մանասէի` ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց իւրեանց, ըստ գլխոց իւրեանց, ամենայն արու ի քսանամենից եւ ի վեր, ամենայնի որ ելանէր ի զաւրու հանդէս նոցա
33. ի ցեղէն Մանասէի, երեսուն եւ երկու հազարք եւ երեք հարիւր:
34. Եւ որդւոցն Բենիամենի` ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց իւրեանց, ըստ գլխոց իւրեանց, ամենայն արու ի քսանամենից եւ ի վեր, ամենայնի որ ելանէր ի զաւրու հանդէս նոցա
35. ի ցեղէն Բենիամենի, երեսուն եւ հինգ հազար եւ չորեք հարիւր:
36. Եւ որդւոցն Գադայ` ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց իւրեանց, ըստ գլխոց իւրեանց, ամենայն արու ի քսանամենից եւ ի վեր, ամենայնի որ ելանէր ի զաւրու հանդէս նոցա
37. ի ցեղէն Գադայ, քառասուն եւ հինգ հազար եւ վեց հարիւր եւ յսուն:
38. Եւ որդւոցն Դանայ` ըստ ազգս իւրեանց, ըստ գունդս իւրեանց, ըստ անց նահապետաց իւրեանց, ըստ թուոյ անուանց իւրեանց, ըստ գլխոց իւրեանց ամենայն արու ի քսանամենից եւ ի վեր, ամենայնի որ ելանէր ի զաւրու հանդէս նոցա
39. ի ցեղէն Դանայ, վաթսուն եւ երկու հազարք եւ եւթն հարիւր:
40. Եւ որդւոցն Ասերայ` ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ գլխոց իւրեանց, ըստ թուոյ անուանց իւրեանց, ամենայն արու ի քսանամենից եւ ի վեր, ամենայնի որ ելանէր ի զաւրու հանդէս նոցա
41. ի ցեղէն Ասերայ, քառասուն եւ մի հազար եւ հինգ հարիւր:
42. Եւ որդւոցն Նեփթաղիմայ` ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց նոցա, ըստ գլուխս իւրեանց, ամենայն արու ի քսանամենից եւ ի վեր, ամենայնի որ ելանէր ի զաւրու հանդէս նոցա
43 ի ցեղէն Նեփթաղիմայ, յսուն եւ երեք հազարք եւ չորեք հարիւր:
44. Այս է հանդէս, զոր արարին Մովսես եւ Ահարովն եւ իշխանքն Իսրայէղի, երկոյտասանք իշխանք. այր մի ըստ միում ազգի, ըստ ցեղի տանց նահապետաց իւրեանց էին:
45. Եւ եղեւ ամենայն հանդէս որդւոցն Իսրայէղի հանդերձ զարու իւրեանց ի քսանամենից եւ ի վեր, ամենայն որ ելանէր տալ պատերազմ ի միջոյ Իսրայէղի:
46. Եւ եղեն ամենայն անցեալքն ի հանդիսի, վեց հարիւր հազար եւ երեք հազարք եւ վեց հարիւր եւ յսուն:
47. Բայց Ղեւտացիքն ի ցեղէ իւրեանց ազգին ոչ անցին ի հանդիսի ընդ որդիսն Իսրայէղի:
48. Եւ խաւսեցաւ Տէր ընդ Մովսեսի եւ ասէ.
49. Տեսջիր զազգն Ղեւեայ մի խառնիցես ընդ նոսա ի հանդէս, եւ զհամար նոցա մի առնուցուս ի մէջ որդւոցն Իսրայէղի:
50. եւ կացուսցես զՂեւտացիսն ի վերայ խորանին վկայութեան, եւ ի վերայ ամենայն կահի նորա, եւ ի վերայ ամենայնի որ ինչ է ի նմա: Նոքա բարձցեն զխորանն, եւ զամենայն զկահ նորա, եւ նոքա պաշտեսցեն ի նմա. եւ շուրջ զխորանաւն բանակեսցին:
51. Եւ ի չուել խորանին` իջուսցեն զնա Ղեւտացիքն, եւ ի բանակել խորանին` կանգնեսցեն զնա Ղեւտացիքն. եւ այլազգի որ մերձեսցի ի նմա` մեռցի:
52. Եւ բանակեսցին որդիքն Իսրայէղի այր ըստ իւրաքանչիւր կարգի, եւ այր ըստ իւրաքանչիւր նահապետութեան հանդերձ զաւրու իւրեանց:
53. Բայց Ղեւտացիքն բանակեսցին շուրջ զխորանաւն վկայութեան յանդիման Տեառն. եւ ոչ լինիցին մեղք ի մէջ որդւոցն Իսրայէղի: եւ պահեսցեն Ղեւտացիքն զպահպանութիւնս խորանին վկայութեան:
54. Եւ արարին որդիքն Իսրայէղի ըստ ամենայնի, որպէս պատուիրեաց Տէր Մովսեսի եւ Ահարովնի նոյնպէս եւ արարին:
Հաղորդում կայքում սխալի վերաբերյալ
Տվյալ հատվածում առկա է սխալ: