1. Եւ խաւսեցաւ Տէր ընդ Մովսեսի` եւ ասէ.
2. Արա դու քեզ երկուս փողս կռածոյս, արծաթիս արասցես զնոսա. եւ եղիցին քեզ ազդ առնելոյ ժողովրդեանդ, եւ չուելոյ բանակացն:
3. եւ հարկանիցեն փող նոքաւք, եւ ժողովեսցին նոքաւք ամենայն ժողովուրդն` ի դուռն խորանին վկայութեան:
4. Եթէ ի միումն հարկանիցեն փող` եկեսցեն առ քեզ զաւրավարքն իշխանքն Իսրայէղի:
5. Եւ հարջիք փող ազդեցութեան, եւ չուեսցեն բանակքն բանակեալք ընդ արեւելս:
6. Եւ հարկանիցէք զերկրորդ փողն ազդեցութեան, չուեսցեն բանակքն բանակեալք ընդ հարաւ: Եւ հարկանիցէք զերրորդ փողն ազդեցութեան, եւ չուեսցեն բանակքն բանակեալք ընդ ծովակողմն: Եւ հարկանիցէք զչորորդ փողն
ազդեցութեան, եւ չուեսցեն բանակքն բանակեալք ընդ հիւսիւսի: ազդեցութեան փող հարկանիցեն ի չուել իւրեանց:
7. Եւ յորժամ ժողովիցէք զժողովուրդն` հարկանիցէք փող` եւ ոչ ազդեցութեան:
8. Եւ որդիքն Ահարովնի քահանայք հարցեն փող, եւ եղիցի ձեզ աւրէն յաւիտենական յազգս ձեր:
9. Եւ եթէ ելանիցէք ի պատարազմ յերկրին ձերում, ընդդիմակացսն որ կայցեն ձեզ հակառակ, ազդեսջիք փողովք եւ
յիշատակեսջիք առաջի Տեառն. եւ ապրիցիք ի թշնամեացն ձերոց:
10. Եւ յաւուրս ուրախութեան ձերոյ, եւ յամսագլուխս ձեր հարկանիցէք փող. ի վերայ ողջակիզացն, եւ ի վերայ զոհիցն փրկութեանցն ձերոց. եւ եղիցի ձեզ յիշատակ առաջի Աստուծոյ ձերոյ. ես եմ Տէր Աստուած ձեր:
11. Եւ եղեւ յամին յերկրորդի յամսեանն երկրորդում` որ աւր քսան էր ամսոյն` վերացաւ ամպն ի խորանէն վկայութեան:
12. Եւ չուեցին որդիքն Իսրայէղի հանդերձ աղխիւն իւրեանց յանապատէն Սինաէ: եւ եկաց ամպն յանապատին Փառանա:
13. եւ չուեցին նախ ըստ բանի Տեառն ի ձեռն Մովսեսի:
14 Եւ չուեցին գունդք բանակի որդւոցն Յուդայ յառաջագոյն զաւրուն իւրեանց. եւ ի վերայ զաւրուց նոցա Նայասովն որդի Ամինադաբայ:
15 եւ ի վերա որդւոցն Իսաքարայ` Նաթանաէղ որդի Սոգովրա:
16. եւ ի վերայ զաւրու ցեղի որդւոցն Զաբաւղովնի` Եղիաբ որդի Քեղղովնի:
17. Եւ իջուցանէին զխորանն, եւ չուէին: որդիքն Գեդսովնի եւ որդիքն Մերարեայ բառնային զխորանն:
18. Եւ չուեցին գունդք բանակի որդւոցն Ռովբենի հանդերձ զաւրուն իւրեանց. եւ ի վերայ զաւրու նոցա Եղիսուր որդի Սեդիուրայ.
19. եւ ի վերայ զաւրու ցեղիցն Շմաւովնի` Սաղամիէլ որդի Սուրիսադայի:
20 եւ ի վերայ զաւրու ցեղի որդւոցն Գադայ Եղիսափան որդի Ռագուէլի:
21. Եւ չուեսցեն որդիքն Կահաթու բարձեալ զսրբութիւնսն. եւ կանկնեսցեն զխորանն մինչչեւ այլքն հասանիցեն:
22. Եւ չուեսցեն գունդք բանակին Եփրեմի հանդերձ զաւրուն իւրեանց. եւ ի վերայ զաւրու նոցա Եղիսամա որդի Սեմիուդա.
23. եւ ի վերայ զաւրու ցեղի որդւոցն Մանասէի Գամաղիէլ որդի Փառասուրա:
24. եւ ի վերայ զաւրու ցեղի որդւոցն Բենիամենի Աբիդան որդի Գետսովնի:
25. Եւ չուեսցեն գունդք բանակի որդւոցն Դանայ յետոյ քան զամենայն բանակսն հանդերձ զաւրուն իւրեանց. եւ ի վերայ զաւրուն նոցա Աքիեզեր որդի Ամիսադայի:
26. եւ ի վերա զաւրու ցեղի որդւոցն Ասերայ Փագեէլ որդի Աքրանայ:
27. եւ ի վերայ զաւրու ցեղի որդւոցն Նեփթաղեմի Աքիրան որդի Ենանայ:
28. Այս են զաւրք որդւոցն Իսրայէղի. եւ չուեցին հանդերձ զաւրուն իւրեանց:
29. Եւ ասէ Մովսէս ցՅովբաբ որդի Ռագուելի Մադիանացի ցաներն Մովսեսի. Ահա մեք չուեմք ի տեղին զոր ասաց Տէր տաց զնա ձեզ, եկ ընդ մեզ. եւ բարի արասցուք քեզ. զի Տէր խոստացաւ բարութիւնս Իսրայէղի:
30. Եւ նայ ասէ. Ոչ երթայց անդր, այլ յերկրին իմ եւ յազգ իմ գնացից:
31. Եւ ասէ ցնա. Մի թողուր զմեզ. քանզի էիր ընդ մեզ յանապատին. եւ եղիցիս ընդ մեզ ծեր:
32. եւ եղիցի թէ երթայցես ընդ մեզ, եւ լինիցին բարութիւնքն զոր ինչ արասցէ մեզ Տէր բարի, արասցուք քեզ:
33. Եւ չուեցին ի լեռնէ անտի Տեառն երեքաւրեայ ճանապարհ. եւ տապանակ ուխտին Տեառն յառաջագոյն քան զնոսա երթայր երեքաւրեայ ճանապարհաւ, դիտել նոցա հանգիստ:
34. Եւ եղեւ ի չուել տապանակին` ասէ Մովսէս. Արի Տէր` եւ ցրուեսցին թշնամիք քո, փախիցեն ամենայն ատելիք քո:
35․ Եւ ի դադարելն ասէ. Դարձիր Տէր ի հազարաւորս եւ ի բեւրաւորս Իսրայէղի:
36. Եւ ամպ հովանի ունէր նոցա ի տուէ եւ ի չուել նոցա ի բանակէ անտի:
Հաղորդում կայքում սխալի վերաբերյալ
Տվյալ հատվածում առկա է սխալ: