Գլուխ 12

   
1. Եւ բամբասեցին Մարիամ եւ Ահարովն զՄովսէս վասն կնոջն Եթովպացւոյ` զոր առ Մովսէս. զի կին Եթովպացի առ:

2. եւ ասեն` միթէ ընդ Մովսեսի խաւսեցաւ միա՞յն Տէր. ոչ ապաքէն եւ ընդ մե՞զ խաւսեցաւ Տէր: եւ լուաւ Տէր:

3. Եւ այրն Մովսէս հեզ էր յոյժ քան զամենայն մարդիկ` որ էին ի վերայ երկրի:

4. Եւ ասէ Տէր նոյնժամեայն` ցՄովսէս եւ ցԱհարովն եւ ցՄարիամ. Ելէք դուք երեքին ի խորանն վկայութեան: եւ ելին երեքեան ի խորանն վկայութեան:

5. Եւ էջ Տէր սեամբ ամպոյ, եւ եկաց առ դրան խորանին վկայութեան. եւ կոչեցան Ահարովն եւ Մարիամ: եւ ելին երկոքին:

6. Եւ ասէ ցնոսա Տէր. Լուարուք բանից իմոց. եթէ լինիցի ի ձէնջ մարգարէ Տեառն, տեսլեամբ երեւեցայց նմա, եւ երազու խաւսեցայց ընդ նմա:

7. Ոչ այնպէս որպէս ծառայն իմ Մովսէս` որ յամենայն տան իմում:

8. բերան ի բերան խաւսեցայց ընդ նմա, երեսաւք եւ ոչ առակաւք. եւ զփառսն Տեառն ետես: եւ ընդէ՞ր ոչ երկերուք բամբասել զծառայն իմ Մովսէս:

9. Եւ եղեւ բարկութիւն սրտմտութեան Տեառն ի վերայ նոցա` եւ գնացին:

10. եւ ամպն վերացաւ ի խորանէ անդի: եւ ահա Մարիամ բորոտեալ էր իբրեւ զձիւն. եւ հայեցաւ Ահարովն ընդ Մարիամ, եւ ահա` բորոտեալ էր:

11. Եւ ասէ Ահարովն ցՄովս. Խնդրեմ ի քէն Տէր, մի ածեր ի վերայ մեր մեղս. զի անգիտացաք. քանզի մեղաք`

12. մի լինիցի հանգոյն մահու, իբրեւ եւ վիժած որ ելանիցէ յարգանդէ մաւր` եւ ուտիցէ զկէս մարմնոյ նորա:

13 Եւ աղաղակեաց Մովսէս առ Տէր` եւ ասէ. Խնդրեմ ի քէն Աստուած, բժշկեա զնա:

14. Եւ ասէ Տէր ցՄովսէս. Եթէ թքանելով հաւր իւրոյ թքեալ էր ընդ երեսս նորա` չամաչէ՞ր զեւթն աւր: Մեկնեսցի զեւթն աւր արտաքոյ բանակին` եւ ապա մտցէ:

15. Եւ զատուցաւ Մարիամ արտաքոյ բանակին զեւթն աւր: եւ ժողովուրդն ոչ չուեաց` մինչչեւ սրբեցաւ Մարիամ: