Գլուխ 13

   
1. Եւ ապա չուեաց ժողովուրդն յԱսերովթայ, եւ բանակեցան յանապատին Փարանու:

2. Եւ ասէ Տէր ցՄովսէս.

3. Առաքեա արս` եւ լրտեսեսցեն զերկիրն Քանանացւոց, զոր ես տաց որդւոցն Իսրայէղի ի կալուած. այր մի` ըստ ցեղի, ըստ տանց նահապետաց իւրեանց առաքեսցես զնոսա` զամենայն գլխաւորս ի նոցանէ:

4. Եւ առաքեաց զնոսա Մովսէս յանապատէն Փարանու` ըստ բանի Տեառն. ամենեքեան արգ գլխաւորք էին նոքա յորդւոցն Իսրայէղի: Եւ այս են անուանք նոցա:

5. Ցեղին Ռովբենի, Սաղամիէլ որդի Աքուրայ:

6. Ցեղին Շմաւովնի, Սափատ որդի Սուրեայ:

7. Ցեղին Յուդայ, Քաղէբ որդի Յեփունեա:

8. Ցեղին Իսաքարայ, Գաղամ որդի Յովսեփու:

9. Ցեղին Եփրեմի, Աւսէս որդի Նաւեայ:

10. Ցեղին Բենիամէնի, Փաղտի որդի Ռափուայ:

11. Ցեղին Զաբաւղովնի, Յուդիէլ որդի Նուդա:

12. Ցեղին Յովսեփայ` որդւոցն Մանասէի, Գադդէ որդի Սուսիա:

13. Ցեղին Դանա, Սաթուր որդի Միքիաէլի:

14. Ցեղին Ասերա, Ամիէլ որդի Գամ:

15. Ցեղին Նեփթաղեմի, Աբի որդի Մակքեայ:

16. Ցեղին Գադայ, Գուբիէլ որդի Աբիա:

17. Այս անուանք են արանցն` զոր առաքեաց Տէր լրտեսել զերկիրն Քանանացւոց. եւ անուանեաց Մովսէս զանուն Աւսեայ որդւոյ Նաւեայ` Յեսու:

18. Եւ առաքեաց զնոսա յանապատէն Փարանու լրտեսել զերկիրն Քանանացւոց: եւ ասէ ցնոսա. Ելէք ընդ անապատն, եւ ամբարձայք ի լեառն,

19. եւ տեսջիք զերկիրն զի՞նչ իցէ. եւ զժողովուրդն որ նստի ի նմա, թէ զաւրագոյն իցէ` եթէ անաւագ, եթէ սակա՞ւք իցեն` թէ բազումք:

20. Եւ զի՞նչ իցէ երկիրն յորում նոքա բնակեալ են, եթէ բարի՞ իցէ` եթէ չար. եւ զի՞նչ իցեն քաղաքքն յորս նոքա բնակեալ են. պարսպովք իցեն` թէ անպարիսպք:

21. եւ զի՞նչ իցէ երկիրն, պարարտ իցէ` եթէ տկար. եթէ իցէ՞ ի նմա ծառատունկ` եթէ ոչ: եւ ժրասջիք առջիք ի պտղոց երկրին: Եւ աւուրքն գարնանայոյ էին աւուրքն խայծածուաց խաղողոյ:

22. Եւ ելեալ լրտեսեցին զերկիրն յանապատին Սինաէ մինչչեւ ցՐոովբ, ի մուտս Եժրաթա:

23. ելին ընդ անապատն` եւ եկին մինչչեւ ցՔեբրովն: եւ անդ Աքիման, եւ Սեսի, եւ Թաղամին, ազգք Ենակայ: եւ Քեբրովն եւթն ամաւ յառաջ շինեալ էր քան զտանիս Եգիպտացւոց:

24. Եւ եկին մինչչեւ ցՁորն ողկուզոյ, եւ լրտեսեցին զնա. եւ հատին անտի ուռ որթւոյ, եւ ողկոյզ մի խաղողոյ ի նմա, եւ բարձին զնա լծակովք` եւ ի նռանէ եւ ի թզոյ:

25. եւ անուանեաց զանուն տեղւոյն` Ձոր Ողկուզոյ. վասն ողկուզին զոր հատին անտի որդիքն Իսրայէղի:

26. Եւ դարձան անդր որդիքն Իսրայէղի լրտեսել զերկիրն յետ աւուրց քառասնից.

27. եւ հասեալ եկին առ Մովսես եւ Ահարովն, եւ առ ամենայն ժողովուրդ որդւոցն Իսրայէղի յանապատն Փարան ի Կաթդէս. եւ ետուն նոցա զրոյց եւ ամենայն ժողովրդեանն: Եւ ցուցին զպտուղ երկրին,

28. եւ պատմեցին նոցա, եւ ասեն ցնոսա. Չոգաք յերկիրն զոր առաքեցեր զմեզ, երկիր` որ բղխէ զկաթն եւ զմեղր. եւ այս է պտուղ նորա:

29. Բայց ազգն սաստիկ էր որ բնակեալ էր ի նմա. եւ քաղաքք ամուրք եւ պարսպաւորք եւ մեծամեծք յոյժ: եւ զազգն Ենակայ տեսաք անդ:

30. Եւ Ամաղէկ բնակեալ էր յերկրին ընդ հարաւակողմն. եւ Քետացին եւ Խեւացին եւ Յեբուսացին բնակեալ էին առ լերամբն, եւ Քանանացին` առ ծովեզերբն եւ առ Յորդանանաւ:

31. Եւ լռեցոյց Քաղէբ զժողովուրդն Մովսեսի, եւ ասէ ցնա. Ոչ այդպէս է. այլ ելանելով ելցուք, եւ ժառանգեսցուք զնա. զի կարող եմք յաղթել նոցա:

32. Եւ արքն որ ընդ նմա երթեալ էին` ասէին. Ոչ ելցուք, քանզի ոչ կարեմք երթեալ ի վերայ ազգին, զի զաւրագոյն քան

զմեզ է յոյժ:

33. Եւ զարհուրեցուցին երկրաւն զոր լրտեսեցին` զորդիսն Իսրայէլի` եւ ասեն. Ընդ երկիր ընդ որ մեք անցաք լրտեսել զնա, երկիր` մարդածախ է ի բնակչաց իւրոց. եւ զամենայն ազգքն զոր տեսաք ի նմա` արք յաղթահասակք են:

34. տեսաք անդ` սկայս, եւ էաք յաչս նոցա իբրեւ զմարախ: