1. Եւ ձայն բարձին ժողովուրդն ամենայն, եւ ելաց ազգն զգիշերն զայն ողջոյն.
2. եւ տրտնջեաց ժողովուրդն զՄովսէսէ եւ զԱհարովնէ ամենայն որդւովքն Իսրայէղի: Եւ ասեն ցնոսա ամենայն ժողովուրդն. Լաւ էր թէ մեռեալ էաք յերկրին Եգիպտացւոց. կամ թէ աստէն յանապատի աստ իսկ մեռանէաք.
3. եւ ընդէ՞ր Տէր տանի զմեզ յերկիրն յայն կլանել զմեզ պատերազմաւ. եւ կանայք մեր եւ որդիք մեր լինիցին ի յափշտակութիւն. եւ արդ` լաւ իցէ մեզ դառնալ յԵգիպտոս անդրէն:
4. Եւ ասէ այր ցընկեր իւր. Արասցուք զաւրավար, եւ դարձցուք յԵգիպտոս:
5. Եւ անկան Մովսէս եւ Ահարովն ի վերայ երեսաց իւրեանց առաջի ամենայն ժողովուրդեանն որդւոցն Իսրայէղի:
6. Բայց Եսու որդի Նաւեայ, եւ Քաղէբ Յեփոնեայ ի լրտեսաց երկրին` պատառեցին զհանդերձս իւրեանց,
7. եւ խաւսեցան ընդ ամենայն ժողովրդեանն որդւոցն Իսրայէղի` եւ ասեն. Երկիր զոր մեք լրտեսեցաք` բարի է յոյժ.
8. եթէ հաճեսցի միայն ընդ մեզ Տէր, եւ տարցի յերկիրն յայն, եւ տացէ զնա մեզ. երկիր` որ բղխէ զկաթն եւ զմեղր:
9. բայց ի տեառնէ միայն ապստամբք մի լինիք, եւ ի ժողովրդենէ երկրին ոչ երկնչիջիք. քանզի ի կերակուր մեր են: Զի մեկնեցաւ ի նոցանէ Տէր եւ ընդ մեզ է Տէր. մի զանգիտէք ի նոցանէ:
10. Եւ ասաց ամենայն ժողովուրդն քարկոծել զնոսա քարամբք: եւ փառքն Տեառն երեւեցան ամպով ի վերայ խորանին վկայութեան յանդիման ամենայն որդւոցն Իսրայէղի:
11. Եւ ասէ Տէր ցՄովսէս. Մինչչեւ ցերբ բարկացուցանեն զիս ժողովուրդդ. եւ մինչչեւ ցերբ ոչ հաւատան ինձ ամենայն նշանաւք զոր արարի ի մէջ դոցա:
12. թոյլ տուր ինձ` զի հարից զդոսա մահուամբ, եւ կորուսից զդոսա. եւ զքեզ եւ զտուն հաւր քո արարից յազգ մեծ եւ ի բազում քան զայդ:
13. Եւ ասէ Մովսէս ցՏէր. Իսկ արդ` ասիցեն Եգիպտացիքն` եթէ հաներ զաւրութեամբ քով զժողովուրդս զայս ի նոցանէ:
14. այլ եւ ամենայն բնակիչք երկրիս այսորիկ լսիցեն` թէ դու Տէր ի ժողովրդեանս յայսմիկ ես` որ դէմ յանդիման երեւիս դու Տէր. եւ ամպ քո կայ ի վերայ դոցա. եւ սեամբ ամպով երթաս դու առաջի դոցա ի տուէ, եւ սեամբ հրոյ ի գիշերի.
15. եւ սատակիցես զժողովուրդ քո զայս` իբրեւ զայր մի. Եւ խաւսիցին ազգքն որ լուան զանուանէ քումմէ, եւ ասիցեն.
16, Վասն զի ոչ կարէր տանել զժողովուրդն զայն` յերկիրն զոր երդուաւ նոցա, եւ արկ զնոսա տապաստ յանապատին:
17. Եւ արդ` բարձրասցի ձեռն քո Տէր, որպէս խաւսեցար եւ ասացեր:
18. թէ Տէր երկայնամիտ է եւ բազում ողորմ եւ ճշմարիտ, բառնայ զանաւրէնութիւնս եւ զանիրաւութիւնս եւ զմեղս, եւ սրբելով ոչ սրբէ զպարտաւորն. հատուցանէ զմեղս հարանց որդւոց մինչչեւ ցերիս եւ ցչորս ազգս:
19. եւ արդ` Տէր թող զմեղս ժողովրդեան քո, ըստ մեծի ողորմութեան քում. որպէս ներեցեր դոցա յԵգիպտոս մինչչեւ ցայժմ:
20. Եւ ասէ Տէր ցՄովսէս. Ներեցից դոցա ըստ բանի քում.
21. բայց կենդանի եմ ես, եւ կենդանի է անուն իմ. եւ լցցեն փառք Տեառն զամենայն երկիր:
22. Զի ամենայն արք որ տեսին զփառսն իմ, եւ զնշանս զոր արարի ես յԵգիպտոս եւ յանապատի յայսմիկ, եւ փորձեցին զիս` այս տասն անգամ, եւ ոչ լուան ձայնի իմում:
23. թէ տեսանիցեն զերկիրն զոր երդուայ հարցն նոցա. այլ որդիք նոցա որ են աստ ընդ իս` որ ոչ գիտեն զչար կամ զբարի, ամենայն մանուկ տխմար` նոցա տաց զերկիրն. եւ ամենեքին որ բարկացուցին զիս` ոչ տեսցեն զնա:
24. Բայց ծառայ իմ Քաղէբ յորում եղեւ հոգի այլ, եւ եկն զհետ իմ. տարայց զնա յերկիրն` յոր եմուտ. եւ զաւակ նորա ժառանգեսցէ զնա:
25. Եւ Ամաղէկ եւ Քանանացին բնակեալ են ի ձորն: բայց դուք վաղիւ բարձարուք եւ չուեցէք յանապատն ընդ ճանապարհ Կարմի ծովու:
26. Խաւսեցաւ Տէր ընդ Մովսէսի եւ ընդ Ահարովնի` եւ ասէ.
27. Մինչչեւ ցե՞րբ զժողովուրդդ զայդ չար կրիցեմ. եւ դոքա տրտնջեն առաջի իմ: Զտրտունջ որդւոցն Իսրայէղի լուա որ տրտնջեն զձէնջ:
28. արդ` ասասցես ցնոսա. Կեդանի եմ ես ասէ Տէր, թէ ոչ որպէս խաւսեցայք յականջս իմ, նոյնպէս արարից ձեզ:
29. յանապատիս յայսմիկ անկանիցին ոսկերք ձեր, եւ ամենայն հանդէս ձեր, եւ մտեալքն ի ձէնջ ի համար ի քսանամենից եւ ի վեր որ տրտնջեցին զինէն:
30. թէ մտանիցեն յերկիրն` յոր համբարձի զձեռն իմ բնակեցուցանել զձեզ ի նմա. բայց Քաղէբ` որդի Յեփոնա, եւ Յեսու Նաւեան:
31. Եւ զորդիսն զորմէ ասացէք թէ ի յափշտակութիւն լինիցին, տարայց զնոսա յերկիրն. եւ ժառանգեսցեն զերկիրն, յորմէ դուքն յափրացարուք:
32. եւ ոսկերք ձեր անկցին աստէն յանապատի աստ.
33. եւ որդիքն ձեր ճարակեսցին յանապատի աստ` ամս քառասուն, եւ բարձցեն զպոռնկութիւն ձեր, մինչչեւ մաշեսցին ոսկերք ձեր յանապատի աստ:
34. ըստ թուոյ աւուրցն քառասնից. աւր ընդ տարւոյ ընդունիցիք զմեղս ձեր զքառասուն ամ, եւ ծանիջիք զսրտմտութիւն բարկութեան իմոյ:
35. Ես Տէր խաւսեցայ. եթէ ո՞չ արարից ժողովրդեանդ այդմիկ չարի յարուցելոյ ի վերայ իմ. յանապատի աստ ծախեսցին, եւ աստէն մեռանիցին:
36. Եւ արքն զորս առաքեաց Մովսէս լրտեսել զերկիրն, եկեալ բամբասեցին զնմանէ առ ժողովուրդն, հանել համբաւ չար զերկրէն.
37. մեռան արքն այնոքիկ` որ հանին համբաւ չար զերկրէն, հարուածովք առաջի Տեառն:
38. Եւ Յեսու որդի Նաւեայ` եւ Քաղէբ որդի Յեփոնեայ միայն ապրեցան յարանցն յայնցանէ որ երթեալ էին լրտեսել զերկիրն:
39. Եւ խաւսեցաւ Մովս զպատգամս զայս առաջի ամենայն որդւոցն Իսրայէղի, եւ սուգ առ ժողովուրդն յոյժ.
40. եւ կանխեալ ընդ առաւաւտն ելին ի գլուխ լերինն. եւ ասեն. Աւասիկ մեք կամք` ելցուք ի տեղին զոր ասաց Տէր` զի մեղաք:
41. Եւ ասէ Մովսէս. Ընդէ՞ր անցէք դուք զբանիւ Տեառն` եւ ոչ յաջողեսցի ձեզ.
42. եւ ելանէք` զի ոչ է Տէր ընդ ձեզ, եւ անկանիցիք առաջի թշնամեաց ձերոց.
43. զի Ամաղէկ եւ Քանանացին են անդ առաջի ձեր, եւ անկանիցիք սրով. փոխանակ զի դարձայք յետս եւ հեստեցէք Տեառն, եւ ոչ լինիցի Տէր ընդ ձեզ:
44. Եւ անսաստեալ ելին ի գլուխ լերինն. բայց տապանակն կտակարանացն Տեառն` եւ Մովսէս ոչ շարժեցան ի բանակէ անդի:
45. էջ Ամաղէկ եւ Քանանացին` որ բնակեալ էին ի լերինն. եւ հարին զնոսա եւ կոտորեցին զնոսա մինչչեւ ցՀերմա:
46. եւ դարձան անդրէն ի բանակն:
Հաղորդում կայքում սխալի վերաբերյալ
Տվյալ հատվածում առկա է սխալ: