1. Եւ խաւսեցաւ Տէր ընդ Մովսեսի` եւ ասէ.
2. Խաւսեաց ընդ որդիսն Իսրայէղի` եւ ասասցես ցնոսա: Յորժամ մտանիցէք յերկիրն բնակութեան ձերոյ զոր ես տաց ձեզ.
3. եւ առնիցէք ողջակէզ Տեառն` եւ ողջ ընձա ի զոհ, մեծացուցանել զուխտ կամ զկամաւն, կամ ի տաւնս ձեր առնել հոտ անոշից Տեառն, եթէ յարջառոց եւ եթէ ի հաւտից:
4. Եւ բերիցէ որ մատուցանէ զպատարագս իւր Տեառն, զոհ նաշհոյ զտասանորդ գրուին` զանգեալ եւղով չորորդիւ դորակին.
5. եւ գինի ի նուէրս չորորդ դորակին առնիցէք, ըստ զոհին կամ ըստ ողջակիզին, առ գառն մի այնչափ առնիցես ընձա ի հոտ անոշից Տեառն:
6. Եւ խոյին` յորժամ առնիցես զնա յողջակէզս կամ ի զոհս, արասցէս զոհ նաշհոյն, երկուս տասանորդս զանգեալ եւղով երրորդիւ դորակին.
7. եւ գինի ի նուէրս զերրորդ դորակին մատուցանիցէք ի հոտ անոշից Տեառն:
8. Ապա թէ յարջառոյ առնիցէք յողջակէզս կամ ի զոհ, մեծացուցանել զուխտսն ի փրկութիւն Տեառն,
9. մատուսցէ ըստ զուարակին զոհ նաշհոյ` երիս տասանորդս զանգեալ եւղով կիսով դորակին.
10. եւ գինի ի նուէրս` կէս դորակին, ընձա հոտ անոշից Տեառն:
11. Այնպէս առնիցես
12. միում զուարակին, կամ միում խոյին, կամ միում գառինն, յաւդեաց կամ յայծեաց ըստ թուոյ նոցա, որպէս զինչ առնիցէք` նոյնպէս արասջիք միում իստ իւրաքանչիւր թուոյ նոցա.
13. ամենայն բնակին նոյնպէս արասցէ. նոյնպիսի ընձայս մատուցանել ի հոտ անոշից Տեառն: Եւ եթէ եկ ոք յարեսցի ի ձեզ յերկրի ձերում, որ լինիցի առ ձեզ յազգս ձեր, արասցէ ընծա հոտ անոշից Տեառն:
14. Որպէս դուքն առնիցէք` նոյնպէս առնիցէ եկն, եւ ժողովուրդն Տեառն:
15. աւրէն մի եւ նոյն կացցէ ձեր եւ յեկացն` որ յարէսցին ի ձեզ. եւ աւրէն յաւիտեանական յազգս ձեր. որպէս դուք իցէք, նոյնպէս եւ եկն լինիցի առաջի Տեառն. աւրէն մի եւ նոյն կացցէ, եւ իրաւունք մի եւ նոյն լինիցին` ձեր եւ եկին որ յեցեալ իցէ ի ձեզ:
16. Եւ խաւսեցաւ Տէր ընդ Մովսեսի` եւ ասէ.
17. Խաւսեաց ընդ որդիսն Իսրայէղի` եւ ասասցես ցնոսա:
18. Ի մտանել ձեր յերկիրն զոր ես տարայց զձեզ,
19. եւ եղիցի յորժամ ուտիցէք դուք ի հացէ երկրին, առջիք հաս ի նուէր Տեառն զառաջին զանգուածոյն ձերոյ.
20. եւ տաջիք Տեառն հաց հասի, զատուսջիք զայն որպէս հաս ի կալոյ.
21. նոյնպէս եւ զայն զատուցանիցէք զառաջին զանգուածոյն ձերոյ. եւ տաջիք Տեառն հաս յազգս ձեր:
22. Իսկ յորժամ յանցանիցէք, եւ ոչ առնիցէք զպատուիրանս զայսոսիկ` զոր խաւսեցաւ Տէր ընդ Մովսեսի.
23. որպէս հրաման ետ ձեզ Տէր ի ձեռն ի Մովսեսի, յաւրէ յորմէ հրաման ետ ձեզ եւ առ յապա ժամանակս յազգս ձեր:
24. Եւ եղիցի եթէ յաչաց ժողովրդեանն վրիպեսցի ակամայ ինչ, արասցէ ժողովուրդն զուարակ մի յանդւոյ անարատ յողջակէզ ի հոտ անոշից Տեառն. եւ զոհ նմին, եւ նուէր ըստ նորին պայմանի, եւ նոխազ մի յայծեաց վասն մեղաց:
25. եւ քաւեսցէ քահանայն վասն ամենայն ժողովրդեան որդւոցն Իսրայէղի. եւ թողցի նոցա` ակամայն: Եւ նոքա մատուցին զպատարագն իւրեանց ընծայ Տեառն. վասն մեղացն իւրեանց առաջի Տեառն յաղագս ակամայիցն իւրեանց:
26. եւ թողցի ամենայն ժողովրդեանն որդւոցն Իսրայէղի. եւ եկին յեցելոյ ի ձեզ. զի ամենայն ժողովրդեանն եւ ակամայն:
27. Եւ եթէ մի անձն մեղիցէ ակամայ, մատուսցէ ալոջ մի տարեւոր վասն մեղաց.
28. եւ քաւեսցէ քահանայն ի վերայ անձինն ակամաացելոյ, եւ մեղուցելոյ առաջի Տեառն ակամայ, քաւել վասն նորա:
29. բնակին յորդւոցն Իսրայէղի, եւ եկին յեցելոյ ի նոսա, աւրէն մի եւ նոյն կացցէ նոցա որ ինչ առնիցէ ոք
ակամայ:
30. Եւ անձն` որ առնիցէ ձեռամբ հպարտութեան ի բնակաց կամ յեկաց, բարկացոյց զԱստուած. եւ սատակեսցի անձն այն ի ժողովրդենէ իւրմէ:
31. զի զբանն Տեառն խոտեաց, եւ զպատուիրանս նորա ցրուեաց. ջնջելով ջնջեսցի անձնն այն` զի մեղք նորա ի նմա են:
32. Եւ էին որդիքն Իսրայէղի յանապատի անդ. եւ գտին այր մի որ քաղէր փայտ յաւուր շաբաթու:
33. Եւ մատուցին զնա որք գտինն զի քաղէր փայտ յաւուր շաբաթու` առ Մովսէս եւ Ահարովն, եւ առ ամենայն ժողովուրդ որդւոցն Իսրայէղի:
34. եւ ետուն զնա ի պահ. զի ոչ ընդրեցին թէ զի՞նչ առնիցեն զնա:
35. Եւ խաւսեցաւ Տէր ընդ Մովսեսի` եւ ասէ. Մահու մեռցի այրն, եւ քարամբք քարկոծեսցի այրն
36. արտաքոյ բանակին. եւ քարկոծեցին զնա ամենայն ժողովուրդն արտաքոյ բանակին` որպէս հրամայեաց Տէր Մովսեսի:
37. Եւ խաւսեցաւ Տէր ընդ Մովսէսի` եւ ասէ.
38. Խաւսեց ընդ որդիսն Իսրայէղի` եւ ասասցես ցնոսա, եւ արասցեն տոպս ի տտունս հանդերձից իւրեանց յազգս իւրեանց. եւ դնիցէք ի վերայ ծոպոց տտնոցն ասղանի կապուտակ:
39. Եւ լինիցի այն ձեզ ի ծոպսն, եւ տեսանիցէք զայն, եւ յիշիցէք զպատուիրանս Տեառն առնել զնոսա. եւ ոչ խոտորիցիք զկնի մտաց ձերոց եւ աչաց ձերոց, որովք դուքն պոռնկէիք զկնի նոցա:
40. Զի յիշիցէք եւ առնիցէք զամենայն պատուիրանս իմ. եւ եղիջիք սուրբք Աստուծոյ ձերո.
41. ես եմ Տէր Աստուած ձեր` որ հանի զձեզ յերկրէն Եգիպտացւոց լինել ձեր Աստուած. ես եմ Տէր Աստուած ձեր:
Հաղորդում կայքում սխալի վերաբերյալ
Տվյալ հատվածում առկա է սխալ: