1. Եւ խաւսեցաւ Կորխ` որդի Սահառայ որդւոյ Կահաթու որդւոյ Ղեւեայ եւ Դադան եւ Աբիրովն որդիք Եղիաբայ որդւոյ Ռովբենի, եւ Աւնան որդի Փաղեթայ որդւոյ Ռովբենի,
2. եւ կացին հակառակ Մովսեսի. եւ երկերի իւր եւ յիսուն այր յորդւոցն Իսրայէղի գլխաւորք ժողովրդեանն` խորհրդականք խորհրդոց, եւ արք անուանիք:
3. Կուտեցան ի վերայ Մովսեսի եւ Ահարովնի` եւ ասեն. Շատ լիցի ձեզ. զի ամենայն ժողովուրդն եւ ամենեքեան սուրբք են. եւ Տէր ի միջի նոցա. եւ արդ` ընդէ՞ր ճոխացեալ էք ի վերայ ժողովրդեանդ Տեառն:
4. Եւ լուեալ Մովսեսի` անկաւ ի վերայ երեսաց իւրոց.
5. եւ խաւսեցաւ ընդ Կորխայ եւ ընդ ամենայն ժողովրդեան նորա, եւ ասէ. Յայց ել եւ ծանեաւ Աստուած զիւրն, եւ զսուրբս. եւ մերձեցոյց առ ինքն. եւ զորս ոչ ընդրեաց` իւր ոչ մերձեցոյց առ ինքն:
6. Արդ` զայս արարէք. առէք զբուրուառս ձեր. Կորխ եւ ամենայն ժողովուրդդ իւր.
7. եւ դիք ի նոսա հուր, եւ արկէք ի նոսա խունկ` առաջի Տեառն ի վաղիւ. եւ եղիցի այրն զոր ընդրեսցէ Տէր` նա է սուրբ. շատ լիցի ձեզ որդիքն Ղեւեայ:
8. Եւ ասէ Մովսէս ցԿորխ. Լուարուք որդիք Ղեւեայ.
9. միթէ փոքր ինչ իցէ ձեզ այդ. զի զատոյց զձեզ Աստուած Իսրայէղի ի ժողովրդենէն Իսրայէղի, եւ մերձեցոյց զձեզ առ ինքն պաշտել զպաշտաւն խորանին Տեառն. եւ կալ առաջի Տեառն ժողովրդեանն պաշտել զնա.
10. եւ մերձեցոյց զձեզ առ իւր, եւ զամենայն եղբարս քո որդիս Ղեւեայ ընդ քեզ. եւ քահանայանալ եւս խնդրէք:
11. Եւ այսպէս դու եւ ժողովուրդ քո գումարեալ էք զԱստուծոյ. եւ Ահարովն ո՞վ իցէ զի տրտնջէք զնմանէ:
12. Եւ առաքեաց Մովսէս կոչել զԴադան եւ զԱբիրովն զորդիսն Եղիաբու. եւ ասեն. Ոչ եկեսցուք.
13. միթէ փո՞քր իցէ այն` զի հաներ զմեզ յերկրէն որ բղխէր զկաթն զմեղր, սպանանելզմեզ յանապատի աստ եւ արդ` սաստես մեզ. եւ դո՞ւ ես իշխան.
14. միթէ` յերկի՞րն որ բղխէր զկաթն եւ զմեղր` արարեր զմեզ. եւ ետուր մեզ անդ ժառանգութիւն անդւոց եւ այգեաց. եւ թէ զաչս մեր բրեսցես` ոչ եկեսցուք առ քեզ:
15. Եւ ծանրացասումն եղեւ յոյժ, եւ ասէ Տէր. Մի հայիր ի զոհ նոցա. զի զցանկալի ինչ ուրուք ի նոցանէ ես ոչ առից, եւ ոչ զոք ի նոցանէ չարչարեցի:
16. Եւ ասէ Մովս ցԿորխ. Սրբեա զժողովուրդդ քո, եւ եղիջիք պատրաստք առաջի Տեառն` դու եւ Ահարովն, առ վաղիւ.
17. առէք իւրաքանչիւր զբուրուառ իւր, եւ դիջիք ի վերայ նոցա խունկս. եւ մատուսջիք առաջի Տեառն իւրաքանչիւր զբուրուառ իւր. զերկիր իւր եւ զյսուն բուրուառսն. եւ դու եւ Ահարովն իւրաքանչիւր զբուրուառ իւր:
18. Եւ եդին ի նոսա հուր, եւ արկին ի նոսա խունկս, եւ կացին առ դրան խորանին վկայութեան Մովսես եւ Ահարովն:
19. Եւ կուտեաց ի վերայ նոցա Կորխ զամենայն ժողովուրդն իւր ի դուռն խորանին վկայութեան: եւ երեւեցան փառքն Տեառն ամենայն ժողովրդեանն:
20. Եւ խաւսեցաւ Տէր ընդ Մովսէսի եւ ընդ Ահարովնի` եւ ասէ.
21. Մեկնեցարուք ի միջոյ ժողովրդեանդ այդորիկ, եւ սատակեցից զդոսա միանգամայն:
22. Անկան ի վերայ երեսաց իւրեանց` եւ ասեն. Աստուած Աստուած հոգւոց եւ ամենայն մարմնոց. եթէ մի մարդ մեղաւ, ի վերայ ամենայն ժողովրդե՞անն գայցէ բարկութիւն:
23. Եւ խաւսեցաւ Տէր ընդ Մովսեսի եւ ասէ.
24. Խաւսեաց ընդ ժողովրդեանն եւ ասասցես. Զատեցարուք շուրջ զժողովրդեամբդ Կորխայ եւ Դադանա, եւ Աբիրովնի:
25. Եւ յարեաւ Մովսէս եւ գնաց առ Դադան եւ Աբիրովն, եւ գնացին ընդ նմա ամենայն ծերակոյտն:
26. եւ խաւսեցաւ ընդ ժողովրդեանն` եւ ասէ. Մեկնեցարուք ի վրանաց արանց խստասրտացդ այդոցիկ, եւ մի մերձանայցէք ինչ ի նոսա. զի մի կորնչիջիք ընդ ամենայն մեղս:
27. Եւ իբրեւ մեկնեցան ի ժողովրդենէն Կորխայ շուրջ զնոքաւք. եւ Դադան եւ Աբիրովն ելին եւ կային առ դրան վրանաց իւրեանց, եւ կանայք նոցա եւ մանկունք իւրեանց` եւ աղխ իւրեանց:
28. Եւ ասէ Մովսէս. Այսու գիտասջիք, եթէ Տէր առաքեաց զիս գործել զամենայն գործս զայսոսիկ. եւ եթէ յինէն ոչ է ինչ.
29. եթէ ոչ ըստ մահու ամենայն մարդկան, լինիցի հանդէս նոցա. ապա զիս Տէր ոչ առաքեաց:
30. Այլ թէ նորանշան ինչ ցուցցէ Տէր, եւ բացեալ երկրի զբերանն կլանիցէ զնոսա, եւ զտունս դոցա, եւ զխորանս դոցա, եւ զամենայն ինչ որ դոցա իցէ. եւ իջանիցեն կենդանւոյն ի դժոխս, գիտասջիք` եթէ բարկացուցին արքդ այդոքիկ զՏէր:
31. Եւ իբրեւ դադարեաց ի խաւսելոյ զբանս զայսոսիկ. պատառեցաւ երկիրն ի ներքոյ նոցա,
32. եւ բացաւ երկիրն եւեկուլ զնոսա` եւ զտունս նոցա. եւ զմարդիկն որ էին ընդ Կորխայ` եւ զանասուն նոցա:
33. Եւ իջին նոքա եւ որ ինչ էր նոցա կենդանւոյն ի դժոխս. եւ ծածկեաց զնոսա երկիրն. եւ կորեան ի միջոյ ժողովրդեանն:
34. եւ ամենայն Իսրայէլ որ շուրջ էր զնոքաւք` փախեան ի ձայնէ նոցա. զի զի համարէին թէ գուցէ կլանիցէ զնոսա երկիրն:
35. Եւ հուր ել ի Տեառնէ` եւ եկեր զերկերիւր եւ զյսուն այրն` որ մատուցանէին զխունկսն:
36. Եւ ասէ Տէր ցՄովսէս եւ ցԵղիազար որդին Ահարովնի ցքահանայ
37. բարձէք զբուրուառսդ պղնձիս ի միջոյ այրեցելոցդ, եւ զհուրդ աւտար ցրուեսցես ի բաց. զի սրբեցան
38. բուրուառքդ մեղաւորացդ այդոցիկ յոգիս իւրեանց: Եւ արասցես զայդ դրուակս կռածոյս նուարտանս սեղանւոյն. զի մատուցան առաջի Տեառն եւ սրբեցան. եւ եղիցի նշանակ որդւոցն Իսրայէղի:
39. Եւ առ Եղէազար որդի Ահարովնի քահանայի զբուրուռսն պղնձիս` զոր մատուցին այրեցեալքն, եւ արար դրուագս սեղանւոյն
40. ի յիշատակ որդւոցն Իսրայէղի. զի մի մերձանայցէ այլազգի ոք` որ չիցէ ի զաւակէ Ահարովնի դնել խունկս առաջի Տեառն. եւ մի լինիցի իբրեւ զԿորխ եւ զխուժան նորա. որպէս խաւսեցաւ Տէր ի ձեռն Մովսեսի:
41. Եւ տրտնջեցին որդիքն Իսրայէղի ի վաղիւ անդր զՄովսեսէ եւ զԱհարովնէ, եւ ասեն. Դուք կոտորեցէք զժողովուրդն Տեառն:
42. Եւ եղեւ ի կուտել ժողովրդեանն ի վերայ Մովսեսի եւ Ահարովնի, դիմեցին ի խորանն վկայութեան, եւ զնա ծածկեաց ամպն. եւ երեւեցան փառքն Տեառն:
43. եւ կացին Մովսէս եւ Ահարովն յանդիման խորանին վկայութեան:
44. Եւ խաւսեցաւ Տէր ընդ Մովսեսի եւ ընդ Ահարովնի` եւ ասէ.
45. Մեկնեցարուք ի միջոյ ժողովրդեանդ այդորիկ` եւ սատակեցից զդոսա միանգամայն: եւ անկան ի վերայ երեսաց իւրեանց:
46. Եւ ասէ Մովսես ցԱհարովն. Առ դու զբուրուառն, եւ դիցես ի նմա հուր ի սեղանւոյն անդի, եւ արկ ի նմա խունկ, եւ տար վաղվաղակի ի բանակն, եւ քաւեսցես վասն նոցա: քանզի ել բարկութիւն ի Տեառնէ, եւ սկսաւ սատակել զժողովուրդն:
47. Եւ առ Ահարովն որպէս խաւսեցաւ ընդ նմա Մովսէս. եւ ընթացաւ ի ժողովուրդ անդր, եւ ահա սկսեալ էր սատակումն ի ժողովրդեանն. Եւ էարկ զխունկն, եւ քաւեաց վասն ժողովրդեանն.
48. եւ եկաց ի մէջ մեռելոցն եւ կենդանեացն. եւ դադարեաց սատակումնն:
49. Եւ եղեն մեռեալք ի սատակմանն չորեքտասան հազար եւ եւթն հարիւր. թող զմեռեալսն վասն Կորխայ:
50. Եւ դարձաւ Ահարովն առ նուա ի դուռն խորանին վկայութեան, եւ դադարեաց սատակումնն:
Հաղորդում կայքում սխալի վերաբերյալ
Տվյալ հատվածում առկա է սխալ: