1. Եւ խաւսեցաւ Տէր ընդ Մովսեսի` եւ ասէ.
2. Խաւսեաց ընդ որդիսն Իսրայէղի, եւ առցես ի նոցանէ գաւազան ըստ տանց նահապետաց իւրեանց, յամենայն իշխանաց իւրեանց. երկոտասան գաւազան. եւ զիւրաքանչիւր գրեսցես ի վերայ գաւազանի իւրոյ:
3. Եւ զանուն Ահարովնի գրեսցես ի վերայ իւրոյ գաւազանին: եւ իցէ գաւազանն մի ըստ ցեղ ի ցեղի` զոր տանց նահապետաց իւրեանց տացեն:
4. եւ դիցես զնոսա ի խորանին վկայութեան` որովք երեւեցայց անդ քեզ:
5. Եւ եղիցի մարդոյ զոր ընտրեցից` գաւազանն իւր ծաղկեսցի: եւ բարձից յինէն զտրտունջ որդւոցն Իսրայէղի զոր տրտնջեն նոքա զձէնջ:
6. Եւ խաւսեցաւ Մովսէս ընդ որդիսն Իսրայէղի, եւ ետուն ցնա ամենայն իշխանքն նոցա զգաւազան, միոյ իշխանի գաւազան ըստ իշխանի ըստ տանց նահապետաց իւրեանց. ցերկոտասան գաւազան. եւ գաւազանն Ահարովնի ի մէջ գաւազանացն նոցա:
7. Եւ եդ Մովսէս զգաւազանսն առաջի Տեառն ի խորանին վկայութեան:
8. եւ եղեւ ի վաղիւ անդր եւ մտին Մովսէս եւ Ահարովն ի խորանն վկայութեան: Եւ ահա դալարացաւ գաւազանն Ահարովնի ի տան Ղեւեայ, եւ արձակեաց շառաւեղել, եւ ծաղկեաց ծաղիկ, եւ երեւեցոյց ընգոյզ:
9. Եւ եհան Մովսէս զգաւազանսն յերեսաց Տեառն առ ամենայն որդիսն Իսրայէղի, եւ տեսին. եւ էառ իւրաքանչիւր ոք զգաւազան իւր:
10. Եւ ասէ Տէր ցՄովսէս. Դիր զգաւազանդ Ահարովնի առաջի վկայութեանցն ի պահեստ, ի նշանակ որդւոցն անհնազանդից. եւ դադարեսցէ տրտնջիւն նոցա յինէն` եւ մի մեռանիցին:
11. Եւ արարին Մովսէս եւ Ահարովն, որպէս հրաման ետ Տէր Մովսէսի` նոյնպէս եւ արարին:
12. Եւ խաւսեցան որդիքն Իսրայէղի եւ ասեն ցՄովսէս. Ահաւասիկ սատակիմք, կորնչիմք, ծախիմք:
13. ամենայն որ մերձանա ի խորանն Տեառն, մեռանի. մինչչեւ ի սպառ մեռանիցի՞մք:
Հաղորդում կայքում սխալի վերաբերյալ
Տվյալ հատվածում առկա է սխալ: