1. Եւ խաւսեցաւ Տէր ընդ Ահարովնի` եւ ասէ. Դու եւ որդի քո, եւ տուն նահապետութեան քո ընդ քեզ առնուցուք զմեղս սրբութեանցն. եւ դու եւ որդիք քո առնուցուք զմեղս քահանայութեան ձերոյ:
2. Եւզեղբարս քո զցեղն Ղեւեայ զգունդ հաւր քո մատուսցես առ քեզ, եւ յաւելցին ի քեզ. եւ պաշտեսցեն զքեզ: Եւ դու եւ որդիք քո ընդ քեզ, յանդիման խորանին վկայութեան.
3. եւ պահեսցեն զպահպանութիւնս քո, եւ զպահպանութիւնս խորանին վկայութեան. բայց ի սպասնն իմ ի սուրբ` եւ ի սեղանն մի մերձեսցին, զի մի մեռանիցին. նոքա, եւ դուք:
4. Եւ յաւելցին ի քեզ, եւ պահեսցեն զպահպանութիւնս խորանին վկայութեան, ըստ ամենայն պաշտաման խորանին. եւ աւտարազգին մի մերձեսցի առ քեզ:
5. Եւ պահեսջիք զպահպանութիւնս սրբութեանցն, եւ զպահպանութիւնս սեղանւոյն. եւ ոչ եւս լինիցի բարկութիւն յորդիսն Իսրայէղի:
6. Եւ ես` առի զեղբարս ձեր զՂեւտացիսն ի միջոյ որդւոցն Իսրայէղի` փոխանակս տուեալ Տեառն, պաշտել զպաշտաւն խորանին վկայութեան:
7. Եւ դու եւ որդիք քո ընդ քեզ պահեսջիք զպահպանութիւնս ձեր ըստ ամենայն պայմանի սեղանւոյն, եւ զներքին կողմն վարագուրին. եւ պաշտիցէք զպաշտաւն քահանայութեան ձերոյ: եւ այլազգին որ մերձանայցէ` մեռցի:
8. Եւ խաւսեցաւ Տէր ընդ Ահարովնի` եւ ասէ. Ես ահաւասիկ ետու ձեզ զպահեստ պտղոց իմոց. յամենայն նուիրելոցն ինչ յորդւոցն Իսրայէղի` քեզ ետու զայն ի պատիւ, եւ որդւոց քոց յետ քո աւրէն յաւիտենական:
9. Եւ այս եղիցի ձեզ ի նուիրելոց սրբութեանցն ընձաից, յամենայն պատարագաց նոցա, եւ յամենայն զոհից նոցա, եւ յամենայնէ առ ի յանցանաց նոցա, եւ յամենայնէ առ ի մեղաց նոցա. զոր տայցեն յամենայն է ինչ սրբութեանց` քեզ լինիցի եւ որդւոց քոց:
10. Ի սրբութեանց սրբութեանցն կերիջիք զայն: ամենայն արու ուտիցէ զայն. դու եւ որդիք քո` զի սրբութիւն եղիցի քեզ.
11. եւ այն եղիցի ձեզ ի պտղոց տրոց նոցա, յամենայն նուիրաց որդւոցն Իսրայէղի, քեզ ետու զայն. եւ ուստերաց քոց եւ դստերաց քոց ընդ քեզ, աւրէն յաւիտենական. ամենայն սուրբ ի տան քում կերիցէ զայն:
12. Եւ զամենայն պտուղ իւղոյ, եւ զամենայն պտուղ գինոյ եւ ցորենւոյ` զոր տայցեն Տեառն զպտուղ իւրեանց. քեզ ետու զայն ամենայն:
13. առաջինք արմտեաց յերկրին իւրեանց զոր մատուսցեն Տեառն` քեզ լիցի. եւ ամենայն սուրբ ի տան քում կերիցէ զայն:
14. եւ ամենայն նուիրեալն յորդւոցն Իսրայէղի քեզ լիցի:
15. Եւ ամենայն որ բանայ զարգանդ` յամենայն մարմնոյ, զոր մատուցանիցեն Տեառն ի մարդոյ մինչչեւ յանասուն` քեզ լիցի: այլ փրկելով փրկեսցէ զանդրանիկս մարդկան. եւ զանդրանիկս անասնոց սրբոց փրկեսցես.
16. եւ փրկանք նորա յամսաւրէից, եւ գին նորա հինգ սիկղ ըստ սրբութեան սկեղն, որ է քսան դանկ:
17. Բայց զանդրանիկս արջառոյ, եւ զանդրանիկս աւդեաց, եւ զանդրանիկս այծեաց, ոչ փրկեսցես` զի սուրբ են. եւ զարիւն նորա հեղցես առ սեղանովն. եւ զճարպն հանցես ընձա ի հոտ անոշից Տեառն.
18. եւ միսն եղիցի քո, որպէս երբուծ նեւէրին` եւ երին աջոյ քեզ լիցի:
19. Զամենայն ինչ հաս ի սրբութեանցն զոր հանիցեն Տեառն որդիքն Իսրայէղի` քեզ ետու եւ որդւոց քոց, եւ ուստերաց քոց եւ դստերաց քոց ընդ քեզ, աւրէն յաւիտենական է. քանզի ուխտ աղի է առաջի Տեառն. քեզ եւ զաւակի քում յետ քո:
20. Եւ խաւսեցաւ Տէր ընդ Ահարովնի` եւ ասէ. Յերկրի նոցա` մի ժառանգեսցես. եւ բաժին քո ընդ նոսա` մի լիցի. զի ես եմ բաժին քո եւ ժառանգութիւն ի մէջ որդւոցն Իսրայէղի:
21. Եւ որդւոցն Ղեւեայ` ահա ետու զամենայն տասանորդս Իսրայէղի ի ժառանգութիւն. փոխանակ պաշտամանց նոցա զոր նոքայն պաշտեցին ի խորանին վկայութեան.
22. եւ մի եւս մերձեսցին որդիքն Իսրայէղի ի խորանն վկայութեան ընդունել զմեղս մահաբերս:
23. Եւ պաշտեսցեն Ղեւտացիքն զպաշտաւն խորանին վկայութեան, եւ նոքա առցեն զմեղս նոցա. աւրէն յաւիտենական յազգս իւրեանց ի մէջ որդւոցն Իսրայէղի. եւ մի ժառանգեսցեն ժառանգութիւն:
24. Զի զտասանորդս որդոցն Իսրայէղի` զոր զատուսցեն Տեառն հաս, ետու Ղեւտացւոցն ի ժառանգութիւն. վասն այնորիկ ասացի թէ ի մէջ որդւոցն Իսրայէղի` մի ժառանգեսցեն վիճակ:
25. Եւ խաւսեցաւ Տէր ընդ Մովսեսի` եւ ասէ:
26. Եւ ընդ Ղեւտացիսն խաւսեաց` եւ ասասցես ցնոսա. Եթէ առնուցուք յորդւոցն Իսրայէղի տասանորդս զոր ետու ձեզ, հանիցէք եւ դուք անդի հաս Տեառն. զտասանորդն ի տասանորդէ.
27. եւ համարեսցի ձեզ հասն ձեր իբրեւ զցորեան ի կալոյ, եւ իբրեւ զպտուղ ի հնձանէ:
28. Այնպէս եւ դուք հանիցէք ի հասից անտի Տեառն, յամենայն տասանորդաց ձերոց` զոր առնուցուք յորդւոցն Իսրայէղի, եւ տայցէք ի նոցանէ հաս Տեառն. Ահարովնի քահանայի.
29. յամենայն տրոցն ձերոց հանիցէք հաս. եւ յամենայն պտղոցն զնուիրեալն ի նմանէ:
30. Եւ ասասցես ցնոսա. Յորժամ հանիցէք զպտուղն ի նմանէ, համարեսցի Ղեւտացւոցն իւր եւ զարդիւնն ի կալոյ, իբրեւ զպտուղ ի հնձանէ:
31. եւ կերիջիք զայն յամենայն տեղւոջ, դուք եւ տունք ձեր. զի վարձ ձեր է այն, փոխանակ պաշտամանց ձերոց ի խորանին վկայութեան:
32. Եւ մի առնուցուք մեղս վասն այնոցիկ: յորժամ հանիցէք զպտուղն ի նմանէ զսրբութիւնս որդւոցն Իսրայէղի. մի պղծիցէք` զի մի մեռանիցէք:
Հաղորդում կայքում սխալի վերաբերյալ
Տվյալ հատվածում առկա է սխալ: