Գլուխ 19

   
1․ Եւ խաւսեցաւ Տէր ընդ Մովսեսի եւ ընդ Ահարովնի` եւ ասէ.

2․ Այս որոշումն է աւրինին` զոր պատուիրեաց Տէր` եւ ասէ. Խաւսեաց ընդ որդիսդ Իսրայէղի` եւ առցեն քեզ երինջ մի կարմիր անարատ, յորում ոչ գուցէ բիծ ինչ, եւ ոչ իցէ մտեալ ընդ լծով:

3․ Եւ տացես զնա ցԵղիազար քահանայ: եւ հանցեն զնա արտաքոյ քաղաքին ի տեղի սուրբ: եւ սպանցեն զնա առաջի նորա:

4․ եւ առցէ Եղիազար յարենէ նորա, եւ ցանեսցէ յանդիման խորանին վկայութեան յարենէ նորա եւթն անգամ.

5․ եւ այրեսցեն զնա առաջի նորա. եւ մորթ նորա, եւ միս նորա, եւ արիւն նորա հանդերձ ապաւառաւն իւրով այրեսցի:

6․ Եւ առցէ քահանայն փայտ եղեւնա, եւ զոպա, եւ կարմիր. եւ արկցեն ի մէջ այրեցածի երնջոյն:

7․ եւ ողողեսցէ զհանդերձս իւր քահանայն, եւ լուասցէ զմարմին իւր ջրով, եւ ապա մտցէ ի բանակն. եւ անսուրբ լիցի քահանայն մինչչեւ ցերեկոյ:

8․ եւ որ այրիցէն զնա, ողողեսցէ զհանդերձս իւր, եւ լուասցէ զմարմին իւր ջրով, եւ անսուրբ լիցի մինչչեւ ցերեկոյ:

9․ Եւ ժողովեսցէ այր սուրբ զմոխիր երնջոյն, եւ կուտեսցէ արտաքոյ բանակին ի սուրբ տեղւոջ. եւ եղիցի ժողովրդեան որդւոցն Իսրայէղի ի պահեստ ջուր սրսկման` զի սրբութիւն է:

10․ Եւ լուասցէ զմարմին իւր որ ժողովեսցէ զմոխիր երնջոյն, եւ ողողեսցէ զհանդերձս իւր. եւ անսուրբ լիցի մինչչեւ ցերեկոյ. եւ եղիցի ժողովրդեան որդւոցն Իսրայէղի եւ եկացն եւ յեցելոց ի նոսա, աւրէն յաւիտենական:

11․ Եւ որ մերձանայցէ ի մեռեալ ամենայն անձին մարդոյ, անսուրբ լիցի զեւթն աւր.

12․ եւ սրբեսցի նա յաւուրն երրորդի` եւ յաւուրն եւթներորդի, եւ ապա սուրբ լիցի: ապա թէ ոչ սրբեսցի յաւուրն երրորդի եւ յաւուրն եւթներորդի, մի լիցի սուրբ:

13․ Ամենայն որ մերձանայցէ ի մեռեալ անձին մարդոյ որ մեռանիցի, եւ ոչ սրբեսցի` զխորանն Տեառն պղծեաց. սատակեսցի անձն այն յԻսրայէլէ. զի ջուրն սրսկման ոչ սրսկեցաւ ի վերայ նորա, անսուրբ է զի պղծութիւն նորա ի նմա էր:

14․ Եւ այս աւրէն իցէ մարդոյ որ մեռանիցի ի տան. ամենայն որ մտանիցէ ի տունն եւ որ ինչ կայցէ ի տունն, անսուրբ լիցի զեւթն աւր.

15․ եւ ամենայն աման` որ չիցէ խփեալ կամ սերեկեալ, պիղծ լիցի:

16․ Եւ ամենայն որ մերձանայցէ ընդ երեսս դաշտի ի վիրաւոր կամ ի մեռեալ` կամ յոսկր մարդոյ կամ ի գերեզման, պիղծ լիցի զեւթն աւր:

17․ Եւ առցեն պղծելոյն ի մոխրոյ այրեցելոյն սրբութեան. եւ արկցեն ի վերայ նորա ջուր յամանի.

18․ եւ առցեն զոպա, եւ թացցէ ի ջուրն այր սուրբ, եւ ցանեսցէ զտամբն, եւ զկահիւն, եւ զամանովք, եւ զանձամբքն որ իցեն անդ. եւ զմերձեցելովն յոսկր մարդոյ, կամ ի վիրաւոր, կամ ի մեռեալ, կամ ի գերեզման:

19․ եւ ցանեսցէ սուրբն զպղծովն` յաւուրն երրորդի եւ յաւուրն եւթներորդի. եւ սրբեսցի յաւուրն եւթներորդի. եւ ողողեսցէ զհանդերձս իւր, եւ լուասցէ զմարմին իւր ջրով. եւ անսուրբ լիցի մինչչեւ ցերեկոյ:

20․ Եւ մարդ` որ պղծեսցի եւ ոչ սրբեսցի, սատակեսցի անձն այն ի ժողովրդենէ իւրմէ. զի զսրբութիւն Տեառն պղծեաց, եւ ջուր սրսկման ոչ սրսկեցաւ զնովաւ, անսուրբ է.

21․ եւ եղիցի ձեզ այն աւրէն յաւիտենական: Եւ որ սրսկիցէ զջուրս սրսկմանն` լուասցէ զձորձս իւր. եւ որ մերձանայցէ ի ջուրն սրսկման, անսուրբ լիցի մինչչեւ ցերեկոյ:

22․ Եւ յամենայն ինչ յոր մերձանայցէ պղծեալն, անսուրբ լիցի մինչչեւ ցերեկոյ: եւ անձն որ մերձանայցէ ի նա, անսուրբ լիցի մինչչեւ ցերեկոյ: