1. Եւ խաւսեցաւ Տէր ընդ Մովսեսի եւ Ահարովնի եւ ասէ.
2. Այր իւաքանչիւր ըստ գնդի իւրոյ, ըստ տանց նահապետաց իւրեանց, ըստ բանակաց իւրեանց բանակեսցին որդիքն Իսրայէղի:
3. Եւ որ յառաջագոյն բանակեսցին յարեւելից կողմանէ` ցեղ բանակին Յուդայ իցէ` եւ հանդերձ զաւրուն իւրեանց, եւ իշխան որդւոցն Յուդայ Նայասովն` որդի Ամինադաբայ.
4. եւ զաւրք նոր անցեալ ի հանդիսի, եւթանասուն եւ չորք հազարք եւ վեց հարիւր:
5. Եւ որ բանակիցին զհետ նորա ցեղն Իսաքարայ իցէ, եւ իշխան որդւոցն Իսաքարայ, Նաթանայէլ որդի Սեգովրա.
6. եւ զաւրն նորա անցեալք ի հանդիսի` յսուն եւ չորք հազարք եւ չորեք հարիւր:
7. Եւ բանակեսցին առ նոքաւք ցեղն Զաբաւղովնի, եւ իշխան որդւոցն Զաբաւղովնի Եղիաբ որդի քեղղովնի.
8. եւ զաւրք նորա անցեալ ի հանդիսի` յսուն եւ եւթն հազարք եւ չորեք հարիւր:
9. Ամենեքին անցեալք ի հանդիսի բանակին Յուդայ, հարիւր եւ ութսուն եւ վեց հազար եւ չորեք հարիւր, հանդերձ զաւրուն իւրեանց յառաջագոյն չուեսցեն:
10. Գունդ բանակին Ռովբենի ընդ հարաւակողմն եւ զաւր նոցա, եւ իշխան որդւոցն Ռովբենի, Եղիսուր որդի Սեղիուրա.
11. եւ զաւր նորա անցեալք ի հանդիսի` քառասուն եւ վեց հազար եւ հինգ հարիւր:
12. Եւ բանակեսցին առ նոքաւք ցեղն Շմաւովնի. եւ իշխան որդւոցն Շմաւովնի, Սաղամիէղ որդի Սուրիսադայի.
13. եւ զաւր նորա անցեալք ի հանդիսի, յսուն եւ ինն հազար եւ չորեք հարիւր:
14 . Եւ բանակեալք առ նոքաւք ցեղն Գադայ. եւ իշխան որդւոցն Գադայ, Եղիաբ որդի Ռագուէլի.
15. եւ զաւրն նորա անցեալք ի հանդիսի քառասուն եւ հինգ հազարք եւ վեց հարիւր եւ յսուն:
16. Ամենեքին անցեալք ի հանդիսի ցեղն Ռովբենի, հարիւր եւ յսուն եւ մի հազար եւ չորեք հարիւր եւ յսուն, հանդերձ զաւրու իւրեանց երկրորդք չուեսցեն:
17. Եւ խաղաղասցէ խորանն վկայութեան եւ բանակն Ղեւտացւոց ի մէջ բանակացն, որպէս բանակեսցին, նոյնպէս չուեսցեն, իւրաքանչիւր զհետ միմեանց ըստ պետութեանց:
18. Եւ գունդ բանակին Եփրեմի ընդ ծովակողմն հանդերձ զաւրուն իւրեանց. եւ իշխան որդւոցն Եփրեմի` Եղիսամ որդի Սեմիուդայ.
19. եւ զաւր նորա անցեալք ի հանդիսի` քառասուն հազար եւ հինգ հարիւր:
20. Եւ որ բանակիցին զհետ նոցա` ցեղն Մանասէի իցէ. եւ իշխան որդւոցն Մանասէի` Գամաղիէլ որդի Փադասուրայ.
21. եւ զաւրն նորա անցեալք ի հանդիսի` երեսուն եւ երկու հազարք եւ երեք հարիւր:
22. Եւ որ բանակեսցին զհետ նոցա` գունդն Բենիամենի իցէ. եւ իշխան որդւոցն Բենիամենի, Աբիդան որդի Գեդեւովնի.
23. եւ զաւրք նորա անցեալք ի հանդիսի, երեսուն եւ հինգ հազարք եւ չորեք հարիւր:
24. Ամենեքին անցեալք ի հանդիսի բանակին Եփրեմի, հարիւր եւ ութ հազար եւ երկերիւր, հանդերձ զաւրուն իւրեանց` երրորդք չուեսցեն:
25 . Եւ գունդ բանակին Դանայ ընդ հիւսիւսի հանդերձ զաւրուն իւրեանց. եւ իշխան որդւոցն Դանայ` Աքիեզեր որդի Միսադայի.
26. եւ զաւրն նորա անցեալք ի հանդիսի, վաթսուն եւ երկու հազարք եւ եւթն հարիւր:
27. Եւ որ բանակիցեն զհետ նորա ազգն Ասերայ իցեն. եւ իշխան որդւոցն Ասերայ, Փագիէլ որդի Եքրանայ.
28. եւ զաւրք նորա անցեալք ի հանդիսի, քառասուն եւ մի հազար եւ հինգ հարիւր:
29. Եւ որ բանակիցեն զհետ նորա ցեղն Նեփթաղիմի իցէ. եւ իշխան որդւոցն Նեփթաղեմի` Աքիեր որդի Ենանայ.
30. եւ զաւրն նորա անցեալք ի հանդիսի` յսուն եւ երեք հազարք եւ չորեք հարիւր:
31. Ամենեքին անցեալք ի հանդիսի բանակին Դանայ, հարիւր եւ յսուն եւ եւթն հազար եւ վեց հարիւր. հանդերձ զաւրուն իւրեանց, յետոյ չուեսցեն ըստ գունդս իւրեանց:
32. Այս է հանդէս որդւոցն Իսրայէղի. ըստ տանց նահապետաց իւրեանց. ամենայն հանդէս բանակացն հանդերձ զաւրաւք իւրեանց. վեց հարիւր հազար, եւ երեք հազարք եւ վեց հարիւր եւ յիսուն:
33. Բայց Ղեւտացիքն ոչ անցին ընդ նոսա ի հանդիսի. որպէս եւ պատուիրեաց Տէր Մովսեսի:
34. Եւ արարին որդիքն Իսրայէղի զամենայն` որպէս հրամայեաց Տէր Մովսէսի` այնպէս բանակէին ըստ գունդս իւրեանց, եւ այնպէս չուէին իւրաքանչիւր զհետ ցեղից իւրեանց ըստ տանց նահապետաց իւրեանց:
Հաղորդում կայքում սխալի վերաբերյալ
Տվյալ հատվածում առկա է սխալ: