1․ Եւ եկին որդիքն Իսրայէղի ամենայն ժողովրդեամբն յանապատն Սինա, յառաջնումն ամսեանն. եւ բանակեցաւ ժողովուրդն ի Կադէս: Եւ վախճանեցաւ անդ Մարիամ, եւ անդ թաղեցաւ:
2․ Եւ ոչ գոյր ջուր անդ ժողովրդեանն ըմպելոյ. եւ կուտեցան ի վերայ Մովսեսի եւ Ահարովնի.
3․ եւ բամբասեաց ժողովուրդն զՄովսէս` եւ ասեն. Լաւ էր թէ մեռեալ էաք ի կորստեան եղբարց մերոց առաջի Տեառն:
4․ Եւ ընդէ՞ր ածէք զժողովուրդս Տեառն յայս անապատ կոտորել զմեզ` եւ զանասունս մեր.
5․ եւ ընդէ՞ր հանէք զմեզ յերկրէն Եգիպտացւոց, գալ ի տեղիս յայս չար. ի տեղի ուր ոչ սերմն սերմանի, եւ ոչ սեղխենիք, եւ ոչ այգիք, եւ ոչ նռնենիք, եւ ոչ ջուր գոյ ըմպելոյ:
6․ Եւ մտին Մովսէս եւ Ահարովն յերեսաց ժողովրդեանն ի դուռն խորանին վկայութեան, եւ անկան ի վերայ երեսաց իւրեանց: Եւ երեւեցան փառքն Տեառն ի վերայ նոցա:
7․ եւ խաւսեցաւ Տէր ընդ Մովսէսի` եւ ասէ.
8․ Առ դու զգաւազանդ, եւ եկեղեցացոյ զժողովուրդն, դու եւ Ահարովն եղբայր քո. եւ բարբառեսջիք ի վերայ վիմին յանդիման նոցա, եւ տացէ զջուրս իւր. եւ հանջիք նոցա ջուր ի վիմէ անտի. եւ արբուսջիք ժողովրդեանդ եւ անասնոյ նոցա:
9․ Եւ էառ Մովսէս զգաւազանն յանդիման Տեառն` որպէս հրամայեաց նոցա Տէր:
10․ եւ ժողովեցին Մովսէս եւ Ահարովն զժողովուրդն հանդէպ վիմին: Եւ ասէ. Լուարուք ինձ անհաւատք. միթէ ի վիմէ՞ս յայսմանէ հանիցեմ ձեզ ջուր:
11․ Եւ ամբարձեալ Մովսեսի զձեռն իւր, եհար երկիցս անգամ. եւ ել ջուր բազում. եւ էարբ ժողովուրդն եւ անասուն նոցա:
12․ Եւ ասէ Տէր ցՄովսէս եւ ցԱհարովն. Փոխանակ զի ոչ հաւատացէք դուք ինձ, սուրբ առնել զիս առաջի որդւոցն Իսրայէղի. վասն այդորիկ ոչ տանիցիք դուք զժողովուրդն` զոր ետու նոցա:
13․ Այն է ջուրն բամբասանաց. զի բամբասեցին որդիքն Իսրայէղի առաջի Տեառն. եւ սրբեցաւ ի նոսա:
14․ Եւ առաքեաց Մովսէս հրեշտակս ի Կադէս առ արքայն Եդովմա` եւ ասէ. Այսպէս ասէ եղբայր քո Իսրայէլ. դու ինքնին գիտես զամենայն աշխատութիւնս որ գտին զմեզ:
15․ եւ որպէս իջին հարքն մեր յԵգիպտոս. եւ պանդխտեցաք յԵգիպտոս աւուրս բազումս, եւ չարչարեցին զմեզ Եգիպտացիքն, եւ զհարսն մեր,
16․ եւ բողոքեցաք առ Տէր. եւ լուաւ ձայնի մերում, եւ առաքեալ հրեշտակ էհան զմեզ յԵգիպտոսէ: եւ արդ` եմք մեք ի Կադէս քաղաքի, ի կողմն մի ի սահմանաց քոց:
17․ Արդ` անցցուք ընդ երկիր քո: ոչ անցցուք ընդ անդս քո, եւ ոչ ընդ այգիս, եւ ոչ արբցուք ջուր ի ջրհորոց քոց: ճանապարհ զարքունի գնասցուք. եւ ոչ խոտորեսցուք յաջ կամ յահեկ, մինչչեւ անցցուք ըստ սահմանս քո:
18․ Եւ ասէ ցնա Եդովմ. Մի անցանիցես ընդ իս. ապա թէ ոչ` պատերազմաւ ելից ընդդէմ քո:
19․ Եւ ասեն ցնա որդիքն Իսրայէղի. Առ լերամբդ անցցուք. եւ եթէ արբցուք ի ջրհրոյ քումմէ ես եւ խաշինք իմ, տաց քեզ գինս: արդ` ոչինչ են իրքդ, անցցուք առ լերամբդ:
20․ եւ նա ասէ. Ոչ անցցես ընդ իս: Եւ ել Եդովմ ընդդէմ նորա ծանր ամբոխիւ եւ հզաւր ձեռամբ:
21․ եւ ոչ կամեցաւ Եդովմ տալ անց Իսրայէղի ընդ սահմանս իւր. եւ խոյս ետ Իսրայէլ ի նմանէ:
22․ Եւ չուեցին որդիքն Իսրայէղի ի Կադէսայ, եւ եկին ամենայն ժողովրդեամբն ի Հովր լեառն:
23․ Եւ խաւսեցաւ Տէր ընդ Մովսէսի եւ ընդ Ահարովնի ի Հովր լերինն, ի սահմանս երկրին Եդովմացւոց` եւ ասէ.
24․ Ահարովն յաւելցի առ ժողովուրդ իւր, զի մի մտանիցէք դուք յերկիրն զոր ետու որդւոցն Իսրայէղի. քանզի բարկացուցէք զիս ի վերայ ջուրցն բամբասանաց:
25․ Առ դու զԱհարովն` եւ զԵղիազար որդի նորա. եւ հան զնոսա ի Հովր լեառն յանդիման ամենայն ժողովրդեանն.
26․ եւ մերկացոյ յԱհարովնէ զպատմուճան նորա, եւ զգեցոյ Եղիազարու որդւոյ նորա: եւ Ահարովն յաւելեալ մեռցի անդ:
27․ Եւ արար Մովսէս որպէս հրամաեաց նմա Տէր, եւ էհան զնա ի Հովր լեառն առաջի ամենայն ժողովրդեանն:
28․ եւ մերկացոյց յԱհարովնէ զհանդերձս նորա, եւ զգեցոյց Եղիազարու որդւոյ նորա:
29․ Եւ մեռաւ Ահարովն ի գլուխ լերինն: եւ իջին Մովսէս եւ Եղիազար ի լեռնէն:
30․ եւ ետես ամենայն ժողովուրդն եթէ վախճանեցաւ Ահարովն. եւ լացին զԱհարովն զերեսուն աւր ամենայն տունն Իսրայէղի:
Հաղորդում կայքում սխալի վերաբերյալ
Տվյալ հատվածում առկա է սխալ: