1. Եւ լուաւ Քանանացին արքայն Արադայ` որ բնակեալ էր առ անապատաւն. եւ եթէ եկն Իսրայէլ զճանապարհն Աթարինայ. եւ ետ պատերազմ ընդ Իսրայէղի. եւ առ ի նոցանէ գերի:
2. Եւ ուխտեաց Իսրայէլ ուխտ Տեառն` եւ ասէ. Եթէ մատնեսցե՞ս ընդ ձեռամբ իմով զազգն զայն, նզովեցից զնա եւ զքաղաքս նորա:
3. Եւ լուաւ Տէր ձայնի Իսրայէլի, եւ մատնեաց զՔանանացին ի ձեռս նորա. եւ նզովեաց զնա եւ զքաղաքս նորա. եւ կոչեաց զանուն տեղւոյն Նզովս:
4․ Եւ չուեալ ի Հովր լեռնէ ընդ ճանապարհ Կարմիր ծովուն, պատեցան զԵդովմաւ. եւ յոգնեցաւ ժողովուրդն ի ճանապարհի.
5. եւ բամբասեաց ժողովուրդն զԱստուած եւ զՄովսէս` եւ ասեն. Ընդէ՞ր հաներ զմեզ յԵգիպտոսէ կոտորել զմեզ յանապատիս յայսմիկ. զի ոչ գոյ հաց եւ ոչ ջուր. եւ անձինք մեր տաղտկացեալ են ի սնոտի հացէդ:
6. Եւ առաքեաց Տէր ի ժողովուրդն աւձս կոտորիչս, եւ հարկանէին զժողովուրդն. եւ մեռաւ ժողովուրդ բազում յորդւոցն Իսրայէղի:
7. Եկին առ Մովսէս եւ ասեն. Մեղաք` զի խաւսեցաք չար զՏէր եւ զքէն: արդ` կաց յաղաւթս առ Տէր, եւ բարձցէ ի մէնջ զաւձսդ: եւ եկաց յաղաւթս առ Տէր վասն ժողովրդեանն:
8. Եւ ասէ Տէր ցՄովսէս. Արա դու քեզ աւձ, եւ դիցես զնա ի վերայ նշանակի. եւ
եղիցի յորժամ հարկանիցէ աւձ զմարդ, ամենայն աւձահարն որ տեսանիցէ զնա` կեցցէ:
9. Եւ արար Մովսէս աւձ պղնձի, եւ կացոյց զնա ի վերայ նշանակի: եւ լինէր` յորժամ հարկանէր աւձ զմարդ, հայէր յաւձն պղնձի, եւ կեայր:
10. Եւ չուեցին որդիքն Իսրայէղի եւ եկին բանակեցան յՈբովթ:
11. եւ չուեալ յՈբովթա բանակեցան յԱքեղցաի յայնկոյս յանապատին` որ է յանդիման Մովաբայ յարեւելից կողմանէ:
12. անդի չուեցին` եւ բանակեցան ի ձորն Գարեդ:
13. Եւ անտի չուեալ բանակեցան յայնկոյս Առնովնայ յանապատին, առ ելիւք սահմանացն Ամուրհացւոց. քանզի Առնովն սահման է Մովաբացւոցն: ընդ Մովաբացին եւ ընդ Ամուրհացին:
14. վասն այնորիկ ասի ի գրի: Պատերազմ Տեառն` Զովբ հրձիգ արար եւ զձորն Առնովնա,
15. եւ հաստատեաց զձորսն բնակեալս յԷր, եւ առ ընթեր կայ սահմանացն Մովաբու:
16. Եւ անդի քան զջրհորն. այն է` ջրհոր զորմէ ասաց Տէր ցՄովսէս. Ժողովեա զժողովուրդն` եւ տաց նոցա ջուր ըմպելոյ:
17. Յայնժամ աւրհնեաց Իսրայէլի զաւրհնութիւնս ի վերայ ջրհորոցն: Նուագեցէք նմա
18. զջրհորն զոր իշխանք փորեցին, եւ տաշեցին զնա թագաւորք ազգաց ի թագաւորութեան իւրեանց` եւ ի տիրել իւրեանց: Եւ ի ջրհորոյն ի Մանթանին:
19. եւ ի Մանթանինայ ի Մանանաէն. եւ ի Մանանաէլէ ի Բամովթ:
20. Եւ ի Բամովթայ յԱնէն, որ ի դաշտին Մովաբու, ի կատարէ Կոփածովին` որ հայի ընդ անապատն:
21. Եւ առաքեաց Մովսէս հրեշտակս առ արքայն Ամուրհացւոց բանիւք խաղաղութեան` եւ ասէ:
22. Անցցուք ընդ երկիր քո. զճանապարհայն գնասցուք. ոչ խոտորեսցուք ոչ յանդս եւ ոչ յայգիս. եւ ոչ
արբցուք ջուր ի ջրհորոց. ճանապարհ զարքունի գնասցուք մինչչեւ անցցուք ընդ սահմանս քո:
23. Եւ ոչ ետ Սէհովն անցանել Իսրայէլի ընդ սահմանս իւր: եւ ժողովեաց Սէհովն զամենայն ժողովուրդ իւր. եւ ել տալ պատերազմ ընդ Իսրայէղի յանապատին. եւ եկն ի Սամար, եւ ետ պատերազմ ընդ Իսրայէղի:
24. Եւ եհար զնա Իսրայէլ կոտորմամբ սրոյ, եւ տիրեցին երկրի նորա յԱռնովնայ մինչչեւ ցՅաբոկ. մինչչեւ ցորդիսն Ամովնա. զի Յազերեր է սահման որդւոցն Ամովնա:
25. Եւ էառ Իսրայէլ զամենայն քաղաքսն զայնոսիկ, եւ բնակեցաւ Իսրայէլ յամենայն քաղաքս Ամուրհացւոց: յԵսբովն եւ յամենայն արուարձանեայս նորա.
26. քանզի Եսեբոն էր քաղաք Սեհովնի արքայի Ամուրհացոյ. եւ նա նախ ետ պատերազմ ընդ արքային Մովաբա, եւ առ զամենայն երկիրն նորա յԱրուերա մինչչեւ ցԱռնովն:
27. Վասն այնորիկ ասեն առակարկուք. Եկայք յԵսեբովն զի շինեցաւ, եւ հանդերձեցաւ քաղաքն Սէհովնի.
28. զի հուր ել յԵսեբովնեա` եւ բոց ի քաղաքէն Սէհովնի, եւ եկեր մինչչեւ ցՄովաբ. եւ լափեաց զարձանսն Առնովնեա:
29. Վայ քեզ Մովաբ: կորեար ժողովուրդ Քամովսայ. մատնեցան ուստերք նոցա ի փախուստ, եւ դստերք նոցա ի գերութիւն թագաւորին Ամուրհացւոց.
30. եւ զաւակ նոցա սատակեսցի Եսեբովն մինչչեւ ցԴեբովն. կանայք նոցա եւս բորբոքեցան հրով ի վերայ Մովաբու:
31. Եւ բնակեաց Իսրայէլ յամենայն քաղաքս
Ամուրհացւոց:
32. Եւ առաքեաց Մովսէս լրտեսել զԱզեր. եւ առին զնա եւ զաւանս նորա, եւ հանին զԱմուրհացին որ բնակեալ էր ի նմա:
33. եւ կրկնեցան ելին ընդ ճանապարհն ի Բասան: Եւ ել` Ովգ թագաւոր Բասանու ընդդէմ նոցա, եւ ամենայն ժողովուրդն նորա պատերազմաւ յԵդրային:
34. Եւ ասէ Տէր ցՄովսէս. Մի երկնչիր ի նմանէ, զի ի ձեռս քո մատնեցից զնա եւ զամենայն ժողովուրդն նորա, եւ զամենայն երկիր նորա. եւ արասցես ընդ նա` որպէս արարեր ընդ Սէհովն արքայն Ամուրհացւոց` որ բնակեալ էր յԵսեբովն:
35. Եւ էհար զնա եւ զորդիս նորա, եւ զամենայն ժողովուրդն նորա. մինչչեւ ամէնեւին ոչ մնաց ի նմանէ ապրեալ: եւ ժառանգեցին զերկիրն նոցա:
Հաղորդում կայքում սխալի վերաբերյալ
Տվյալ հատվածում առկա է սխալ: