1. Եւ չուեալ որդւոցն Իսրայէղի բանակեցան յարեւմտից Մովաբու առ Յորդանանու յանդիման Երեքովի:
2. Եւ տեսեալ Բաղակայ` որդւոյ Սեպփովրայ զամենայն զոր արար Իսրայէղ ընդ Ամուրհացին,
3. երկեաւ Մովաբ յոյժ ի ժողովրդենէ անդի, զի բազում էին: եւ զանգիտեաց Մովաբ յերեսաց որդւոցն Իսրայէղի:
4. Եւ ասէ Մովաբ ցծերակոյտն Մադիամու. Արդ` լիզանէ ժողովուրդս այս զամենեսեան որ շուրջ զմեաւք են, որպէս լիզանէ արջառ զդալար ի դաշտի: Եւ Բաղակ որդի Սեպփովրայ էր արքայ Մովաբու ի ժամանակին յայնմիկ:
5. եւ առաքեաց հրեշտակս առ Բաղաամ որդի Բեովրայ` առ գէտ Փաթուրն. որ էր առ գետեզերբ յերկրի որդւոյ ազգին իւրոյ. կոչել զնա եւ ասել. Ահա` ազգ ել յԵգիպտոսէ, եւ ծածկեաց զերեսս երկրի. եւ նստի մաւտ առ իս:
6. Եւ արդ` եկ անէծ դու ինձ զժողովուրդս զայս. զի զաւրագոյն քան զիս է սա: թերեւս կարասցուք հարկանել նոցա, եւ հանից զնա յերկրէ իմմէ: քանզի գիտեմ թէ զոր աւրհնես դու` աւրհնեալ են, եւ զորս անիծանես` անիծեալ են:
7. Եւ գնացին ծերակոյտն Մովաբու եւ ծերակոյտն Մադիամու, եւ ըղձութիւնք ի ձեռս նոցա: Եւ եկին առ Բաղաամ, եւ ասացին ցնա զպատգամսն Բաղակայ:
8. եւ ասէ ցնոսա Բաղաամ. Ագարուք աստ զայս գիշեր, եւ արարից ձեզ պատասխանի իրացդ, զոր ինչ Տէր խաւսեսցի ընդ իս: եւ ագան իշխանքն Մովաբու առ Բաղաամու:
9. Եւ եկն Աստուած առ Բաղաամ եւ ասէ ցնա. Զի՞ են արքդ այդոքիկ առ քեզ:
10. եւ ասէ Բաղաամ ցԱստուած. Բաղակ որդի Սեպփովրայ արքայ Մովաբու առաքեաց զդոսա առ իս եւ ասէ.
11. Ահա ազգ ել յԵգիպտոսէ եւ ծածկեաց զերեսս երկրի, եւ նստի մաւտ առ իս. արդ` եկ անէծ դու զնա ինձ, թերեւս կարացից հանել զնա` յերկրէ իմմէ:
12. Եւ ասէ Աստուած ցԲաղաամ. Մի երթար ընդ նոսա. եւ մի անիծանէր զժողովուրդն` քանզի աւրհնեալ է:
13. Եւ յարուցեալ Բաղաամ ընդ առաւաւտն, ասէ ցիշխանսն Բաղակայ. Գնացէք անդրէն առ Տէրն ձեր. զի ոչ թողու զիս Աստուած գալ ընդ ձեզ:
14. Եւ յարուցեալ իշխանքն Մովաբու եկին առ Բաղակ` եւ ասեն. Ոչ կամեցաւ Բաղաամ գալ ընդ մեզ:
15. Եւ յաւել առաքել Բաղակ իշխանս բազումս եւ պատուականագոյնս քան զնոսա:
16. եկին առ Բաղաամ, եւ ասեն ցնա. այսպէս ասէ Բաղակ Սեպփովրեան. Աղաչեմ զքեզ` մի դանդաղեսցիս գալ առ իս.
17. զի պատուելով պատուեցից զքեզ, եւ զոր ինչ ասիցես արարից քեզ. եւ արդ` եկ անէծ ինձ զժողովուրդս զայս:
18. Պատասխանի ետ Բաղաամ եւ ասէ ցիշխանսն Մովաբու. Եթէ տացէ ինձ Բաղակ լի տամբ իւրով արծաթ եւ ոսկի, ոչ կարացից անցանել զբանիւ Տեառն Աստուծոյ, առնել զնա փոքր կամ մեծ մտաւք իմովք:
19. Եւ արդ` ագարուք դուք աստ զգիշերս զայս. եւ գիտացից զինչ յաւելցէ Տէր խաւսել ընդ իս:
20. Եւ եկն Աստուած առ Բաղաամ ի գիշերին` եւ ասէ ցնա. Եթէ կոչել զքեզ եկեալ են արքդ այդոքիկ, արի երթ զկնի նոցա. բայց բան զոր ես խաւսեցա ընդ քեզ` զայն արասցես:
21. Եւ յարուցեալ Բաղաամ ընդ առաւաւտն հանդերձեաց զէշ իւր, եւ գնաց ընդ իշխանսն Մովաբու:
22. Եւ բարկացաւ Աստուած սրտմտութեամբ ընդ երթալն նորա. եւ եկաց հրեշտակ Աստուծոյ լինել բանսարկու: եւ նա հեծեալ էր ի վերայ իշոյ իւրոյ, եւ երկու պատանիք նորա ընդ նմա:
23. Եւ տեսեալ իշոյն զհրեշտակն Աստուծոյ զի կայր նմա ընկճեալ ի ճանապարհին, եւ սուր մերկ ի ձեռին իւրում, խուսեաց էշն ի ճանապարհէ անտի` եւ երթայր ընդ դաշտն: եւ էհար գաւազանաւն զէշն ուղղեալ ի ճանապարհն:
24. Եւ եկաց հրեշտակն Տեառն յառուամէջս այգեացն. եւ էր ցանկ աստի` եւ ցանկ անտի:
25. եւ տեսել իշոյն զհրեշտակն Աստուծոյ` նեղեաց զինքն ընդ որմնն եւ ճմլեաց զոտն Բաղամու. եւ յաւել եւս հարկանել զնա:
26. Եւ յաւել հրեշտակն Աստուծոյ երթալ կեալ ի նեղ տեղւոջ. ուստի ոչ գոյր խուսել յաջ կամ յահեակ:
27. Եւ տեսեալ իշոյն զհրեշտակն Աստուծոյ, նստաւ ընդ Բաղաամաւ. եւ բարկացաւ Բաղաամ, եւ էհար զէշն գաւազանաւն:
28. Եւ եբաց Աստուած զբերան իշոյն, եւ ասէ ցԲաղաամ. Զի՞նչ արարի քեզ զի հարեր զիս այս երիցս անգամ:
29. Եւ ասէ Բաղամ ցէշն. Փոխանակ զի խաղ արարեր զիս: եւ թէ էր սուր ի ձեռին իմում, արդ եւ խոցեալ էր իմ զքեզ:
30. Եւ ասէ էշն ցԲաաղամ. Ո՞չ ես այն էշ եմ քո` յորում հեծանէիր ի մանկութենէ քումմէ մինչչեւ ցյայսաւր ժամանակի. միթէ յուլանալով ինչ յուլացայ՞ երբեք առնել քեզ այդպէս: եւ նա ասէ` ոչ:
31. Եւ եբաց Աստուած զաչս Բաաղամու, եւ ետես զհրեշտակն Տեառն ընկիճեալ նմա ի ճանապարհին, եւ սուսեր մերկ ի ձեռին իւրում: եւ անկեալ ի վերայ երեսաց իւրոց երկիր եպագ նմա:
32. Եւ ասէ ցնա հրեշտակն Աստուծոյ. Ընդէ՞ր հարեր դու զէշսդ` այս երիցս անգամ. եւ ահա ելի ես ի բանսարկութիւն քեզ, զի ոչ է ճանապարհդ քո ուղիղ առաջի իմ.
33. եւ տեսեալ զիս իշոյդ` խուսափեաց այդ երիցս անգամ. եւ թէ չէր խուսափեալ յինէն, արդ` իմ զքեզ սպանեալ էր, եւ զդա ապրեցուցեալ:
34. Եւ ասէ Բաաղամ ցհրեշտակն Տեառն. Մեղայ. զի ոչ գիտէի` թէ դու ինձ ընկիճեալ կայցես ի ճանապարհիս: եւ արդ` եթէ չիցէ քեզ հաճոյ` դարձայց անդրէն:
35. Եւ ասէ հրեշտակն Տեառն ցԲաաղամ. Երթ դու ընդ արսդ ընդ այդոսիկ. բայց բանի զոր ես ասացից քեզ, այնմ զգուշ լինիջիր խաւսելոյ: եւ գնաց Բաաղամ ընդ իշխանսն Բաղակայ:
36. Եւ լուեալ Բաղակայ թագաւորի թէ գայ Բաաղամ, ել նմա ընդ առաջ ի քաղաքն Մովաբու` որ էր ի սահմանս Առնովնա յեզր միում սահմանացն:
37. Եւ ասէ Բաղակ ցԲաղաամ. Ո՞չ առաքեցի առ քեզ կոչել զքեզ. եւ ընդէ՞ր ոչ գայիր առ իս, որպէս թէ ո՞չ էի արդեւք կարող պատուել զքեզ:
38. Եւ ասէ Բաղաամ ցԲաղակ. Ահաւասիկ եկի առ քեզ. արդ` կարո՞ղ իցեմ խաւսել բան ինչ, բայց եթէ զոր արկանիցէ Աստուած ի բերան իմ զայն խաւսեցայց:
39. Եւ գնաց Բաաղամ ընդ Բաղակայ, եւ եկն ի քաղաքս հանգրուանացն:
40. Եւ եզեն Բաղակ արջառ եւ ոչխար, եւ առաքեաց Բաաղամու եւ իշխանացն որ ընդ նմայն էին:
41. եւ իբրեւ այգ եղեւ, առեալ ընդ իւր Բաղակ զԲաաղամ եւ եհան զնա յարձանն Բահաղու. եւ եցոյց նմա զմասն ինչ ժողովրդեանն:
Հաղորդում կայքում սխալի վերաբերյալ
Տվյալ հատվածում առկա է սխալ: