1. Եւ ասէ Բաաղամ ցԲաղակ. Շինեա ինձ աստ եւթն բագին, եւ պատրաստեա ինձ աստ` եւթն զուարակ եւ եւթն խոյ:
2. Եւ արար Բաղակ որպէս ասաց նմա Բաաղամ. եւ եհան զուարակ եւ խոյ ի բագինն:
3. Եւ ասէ Բաաղամ ցԲաղակ. Կաց ի վերայ զոհիդ քո, եւ ես երթայց` թերեւս յայտնեսցէ ինձ Աստուած ընդ առաջ ելեալ. եւ բանն զոր ցուցցէ ինձ` պատմեցից քեզ: եւ եկաց Բաղակ ի վերայ զոհին իւրոյ: Եւ գնաց Բաղաամ հարցանել զԱստուած:
4. եւ երթայր ուղղորդ. եւ երեւեցաւ Աստուած Բաղաամու: եւ ասէ ցնա Բաաղամ. Եւթն բագին պատրաստեցի, եւ հանի զուարակ եւ խոյ ի բագին մի:
5. Եւ էարկ Աստուած բան ի բերան Բաաղամու, եւ ասէ. Դարձիր առ Բաղակ, եւ այսպէս խաւսեսցիս:
6. եւ դարձաւ առ նա. եւ նա կայր ի վերայ ողջակիզացն իւրոց. եւ ամենայն իշխանքն Մովաբացւոց ընդ նմա:
7. Եւ եղեւ հոգի Աստուծոյ ի վերայ նորա, եւ ամբարձեալ զառակս իւր` ասէ: Ի միջագետաց կոչեաց զիս Բաղակ արքայ Մովաբացւոց, ի լերանցն արեւելից, եւ ասէ. Եկ նզովեա ինձ զՅակովբ. եւ եկ անէծ ինձ զԻսրայէլ:
8. Զի՞նչ նզովեցից` զոր ոչ նզովէ Տէր. կամ զի՞նչ անիծեցից` զոր ոչ անիծանէ Տէր.
9. զի ի լերանց տեսի զնա, եւ ի բլրոց յառաջագոյն նաեցա ի նա: եւ ահա ժողովուրդ բնակեսցէ առանձինն, եւ ընդ ազգս մի համարեսցի:
10. Ո¯ ճշգրտեաց զզաւակն Յակովբա, եւ ո համարեսցի զգունդսն Իսրայէղի. մեռցի անձն իմ ընդ անձին արդարոցն, եւ եղիցի զաւակ իմ իբրեւ զզաւակ նոցա:
11. Եւ ասէ Բաղակ ցԲաաղամ. Զի՞նչ գործեցեր ընդ իս. յանիծանել թշնամեաց կոչեցի զքեզ, եւ դու ահա աւրհնեցեր աւրհնութիւն:
12. Եւ ասէ Բաաղամ ցԲաղակ. Ոչ ապաքէն ասացի թէ զինչ արկանիցէ Աստուած ի բերան իմ` զայն զգուշացայց խաւսել:
13. Եւ ասէ ցնա Բաղակ. Եկ դարձել ընդ իս յայլ տեղի, ուստի ոչ տեսանիցես զնա. այլ զմասն ինչ ի նմանէ տեսցես. եւ զամենեսեան ոչ տեսանիցես, եւ անէծ ինձ զնա անդի:
14. Եւ առ գնաց զնա յագարակս դիտանոցին, ի կատար կոփածոյին, եւ շինեաց անդ եւթն բագին, եւ էհան զուարակ եւ խոյ ի բագինն:
15. Եւ ասէ Բաղաամ ցԲաղակ. Կաց ի վերայ զոհիդ քո, եւ ես երթայց հարցանել զԱստուած:
16. Եւ ընդ առաջ եղեւ Աստուած Բաղաամու, եւ էարկ բան ի բերան նորա. եւ ասէ. Դարձիր անդրէն առ Բաղակ, եւ այսպէս խաւսեսցիս:
17. եւ դարձաւ առ նա. եւ նա կայր ի վերայ ողջակիզին իւրոյ, եւ ամենայն իշխանքն Մովաբացւոց ընդ նմա: Եւ ասէ ցնա Բաղակ. Զի՞նչ խաւսեցաւ Տէր:
18. եւ ամբարձեալ զառակս իւր` ասէ: Արի Բաղակ լուր. ունկն դիր վկայդ որդի Սեպփովրա.
19. ոչ իբրեւ զմարդ է Աստուած ի զարթնուլ, եւ ոչ իբրեւ զորդի մարդոյ ի սպառնալ, դու ասացեր թէ ոչ արասցէ, խաւսեսցի եւ ոչ կացուսցէ:
20. ահա` յաւրհնեալ առեալ եմ. աւրհնեցից եւ ոչ դարձուցից:
21. Ոչ լիցի աշխատութիւն ի Յակովբ, եւ մի երեւեսցի վաստակ ի մէջ Իսրայէղի: Տէր Աստուած նորա ընդ նմա. փառաւորութիւնք իշխանաց ի նմա.
22. եւ Աստուած որ էհան զնոսա յԵգիպտոսէ` իբրեւ փառք մի եղջեւրու ի վերայ նորա:
23. Զի ոչ գոյն հմայք ի Յակովբ` եւ ոչ ըղձութիւնք ի մէջ Իսրայէղի. ըստ ժամանակի պատմեսցի Յակովբա` եւ Իսրայէղի զինչ կատարելոց իցէ Աստուած:
24. Ահա ժողովուրդն իբրեւ զկորիւն առիւծու յարիցէ, եւ իբրեւ զառիւծ նազեսցի. ոչ ննջեսցէ մինչչեւ կերիցէ որս, եւ զարիւն վիրաւորաց արբցէ:
25. Եւ ասէ Բաղակ զԲաղաամ. Մի անիծանելով անիծաներ ինձ զնա, եւ մի աւրհնելով աւրհնեսցես զնա:
26. Պատասխանի ետ Բաղաամ եւ ասէ ցԲաղակ. Ո՞չ խաւսեցայ ընդ քեզ բանս` եւ ասացի, թէ զոր ինչ խաւսեսցի ընդ իս Աստուած` զայն արարից:
27. Եւ ասէ Բաղակ ցԲաաղամ. Եկ տարայց զքեզ յայլ տեղի` թերեւս հաճոյ լիցի Աստուծոյ, եւ անիծանիցես ինձ զնոսա անդի:
28. եւ տարաւ Բաղակ զԲաղաամ ի կատարն Փոգովրայ` որ ձգի յանապատն:
29. Եւ ասէ Բաղաամ ցԲաղակ. Շինեայ ինձ աստ եւթն բագին, եւ պատրաստեա ինձ աստ եւթն զուարակ եւ եւթն խոյ:
30. Եւ արար Բաղակ որպէս ասաց նմա Բաղաամ, եւ էհան զուարակ եւ խոյ ի բագինն:
Հաղորդում կայքում սխալի վերաբերյալ
Տվյալ հատվածում առկա է սխալ: