1. Եւ տեսեալ Բաղաամա թէ բարիոք թուի առաջի Տեառն աւրհնել զԻսրայէլ, ոչ չոգաւ ըստ սովորութեանն ընդ առաջ հմայիցն, դարձոյց զերեսս իւր յանապատն:
2. Եւ համբարձեալ Բաղաամու զաչս իւր եւ ետես զԻսրայէլ բանակեալ ըստ ցեղից ցեղից: եւ եղեւ հոգի Աստուծոյ ի վերայ նորա,
3. եւ ամբարձեալ զառակս իւր` ասէր. Ասէ Բաղաամ որդի Բէովրայ.
4. ասէ այրն ճշմարտատես. որ զտեսիլ Աստուծոյ ետես ի քուն աչաւք իւրովք բացովք:
5. Իբրեւ զի գեղեցիկ են տուն քո Յակովբ եւ խորանք քո Իսրայէլ.
6. իբրեւ զանտառս հովանաւորս, եւ իբրեւ զբուրաստանս առ գետովք, իբրեւ զխորանս զոր կանկնեաց Տէր, եւ իբրեւ զմայրս ի գնացս ջուրց:
7. Ելցէ այր ի զաւակէ նորա, եւ տիրեսցէ ազգաց բազմաց. եւ բարձրասցի քան զԴովգա թագաւորութիւն նորա. եւ աճեսցէ թագաւորութիւն նորա:
8. Աստուած առաջնորդեաց նմա յԵգիպտոսէ. իբրեւ փառք մի եղջերու ի վերայ նորա: կերիցէ զազգս թշնամեաց իւրոց, եւ զպարարտութիւն նոցա ուղղածուծ արասցէ. եւ նետիւք իւրովք նետաձիգք լինիցի ի թշնամիս իւր:
9. եւ բազմեալ հանգեաւ իբրեւ զառիւծ, եւ իբրեւ զկորիւն առիւծու, եւ ո յարուցանիցէ զնա. աւրհնիչք նորա` աւրհնին, եւ անիծիչք նորա` անիծեսցին:
10. Եւ բարկացաւ Բաղակ ի վերա Բաղաամու, եւ ծափ զծափի հարկանէր. եւ ասէր Բաղակ ցԲաղաամ. Անիծանել զթշնամիս կոչեցի զքեզ, եւ ահա աւրհնելով աւրհնեցեր զնա` այս երիցս անգամ:
11. Արդ` փախիր դու ի տեղի քո: ասացի պատուել զքեզ, եւ վրիպեցոյց զքեզ Տէր ի փառաց:
12. Եւ ասէ Բաղաամ ցԲաղակ. Ո՞չ ընդ հրեշտակսն քո զոր առաքեցեր առ իս` խաւսեցայ եւ ասացի,
13. եթէ տացէ ինձ Բաղակ լի տամբ իւրով արծաթ եւ ոսկի, ոչ կարացից անցանել զբանիւ Տեառն` առնել զայդ չար կամ բարի յանձնէ իմմէ. այլ զոր ինչ ասիցէ Աստուած` զայն խաւսեցայց:
14. Եւ ահա գնամ ի տեղի իմ. եկ տաց խրատ քեզ, թէ զինչ առնելոց է ժողովուրդն այն ընդ ժողովուրդդ քո ի վախճանի աւուրց.
15. եւ ամբարձեալ զառակս իւր ասէ. Ասէ Բաղաամ որդի Բէովրայ. ասէ այր ճշմարտատես.
16. Որ լուաւ զպատգամս Աստուծոյ, եւ հմուտ է գիտութեան բարձրելոյն. եւ զտեսիլ Աստուծոյ ետես ի քուն աչաւք իւրովք բացաւք:
17. Ցուցի նմա` եւ ոչ այժմ. երանեցից, եւ ոչ ի մաւտոյ: Ծագեսցէ աստղի Յակովբու, եւ յարիցէ այր յԻսրայէլէ, եւ հարցէ զիշխանս Մովաբու. եւ առցէ աւար զամենայն որդիս Սեթայ:
18. եւ եղիցի նմա Եդովմ ժառանգութիւն Եսաւայ թշնամւոյ իւրոյ. եւ Իսրայէլ արար զաւրութեամբ:
19. եւ յարիցէ ի Յակովբա, եւ կորուսցէ զապրեալսն ի քաղաքէ անտի:
20. Եւ տեսեալ զԱմաղէկ, ամբարձեալ զառակս իւր` ասէ. Գլուխ ազգաց Ամաղէկ, եւ զաւակ նոցա կորիցէ:
21. Եւ տեսեալ զԿինացին, ամբարձեալ զառակս իւր` ասէ. Հզաւր է բնակութիւն քո. եւ եթէ դիցես ի քարանձաւս զբոյն քո,
22. եւ եթէ լինիցի ի Բէովր բոյն խարդախութեան քո, Ասորեստանեայք գերեսցեն:
23. Եւ ամբարձեալ զառակս իւր ասէ. Ո ոք կեցցէ յորժամ դնիցէ զայն Աստուած,
24. եւ ելցէ ի ձեռաց Կիտացւոց, եւ չարչարեսցեն զԱսուր. եւ չարչարեսցեն զԵբրայեցիս: եւ ինքեանք միանգամայն կորիցեն: Եւ յարուցեալ Բաղաամ դարձաւ գնաց ի տեղի իւր: եւ Բաղակ գնաց ընդ իւր կողմն:
Հաղորդում կայքում սխալի վերաբերյալ
Տվյալ հատվածում առկա է սխալ: