1. Եւ բանակեցաւ Իսրայէլ ի Սատիմ. եւ պղծեցաւ ժողովուրդն ընդ դստերսն Մովաբու:
2. եւ կոչեցին զնոսա ի զոհս կռոց իւրեանց, եւ եկեր ժողովուրդն ի զոհից նոցա:
3. եւ նուիրեցաւ Իսրայէլ Բեղփեգովրա. եւ բարկացաւ սրտմտութեամբ Տէր ի վերայ Իսրայէղի:
4. Եւ ասէ Տէր ցՄովսէս. Առ զամենայն իշխանս ժողովրդեանդ, եւ առակեա զդոսա առաջի արեգական. եւ դարձցի բարկութիւն սրտմտութեան Տեառն յԻսրայէլէ:
5. Եւ ասէ Մովսէս ցեղսն Իսրայէղի. Կոտորեցէք իւրաքանչիւր զընդանի իւր զնուիրեալ Բեղփեգովրա:
6. Եւ ահա այր Իսրայէլացի, գայր ածէր զեղբայր իւր առ կին Մադիանացի յանդիման Մովսէսի, եւ յանդիման ամենայն ժողովրդեան որդւոցն Իսրայէղի. եւ նոքա լային առ դրան խորանին վկայութեան:
7. Եւ տեսեալ Փենեէսի որդւոյ Եղիազարու որդւոյ Ահարովնի քահանայի, յարեաւ ի միջոյ ժողովրդեանն, առեալ գեղեարդ ի ձեռս իւր,
8. եւ եմուտ զհետ առնն Իսրայէլացւոյ ի հնոցն, եւ խոցեաց զայրն Իսրայէղի` եւ զկինն ընդ արգանդ իւր. եւ դադարեաց հարուածն յորդւոցն Իսրայէղի:
9. Եւ եղեն մեռեալք ի հարուածոցն յայնմանէ քսան եւ չորք հազարք:
10. Եւ խաւսեցաւ Տէր ընդ Մովսէսի` եւ ասէ.
11. Փէնէես` որդի Եղիազարու, որդւոյ Ահարովնի քահանայի` ցածոյց զսրտմտութիւն իմ յորդւոցն Իսրայէղի, նախանձեցուցանել զնախանձ իմ ի նոսա. եւ ոչ սատակեցի զորդիսն Իսրայէղի նախանձու իմով:
12. Եւ արդ` այսպէս ասասցես.Ահա ես տաց նմա ուխտ խաղաղութեան.
13. եւ եղիցի նմա եւ զաւակի նորա յետ նորա ուխտ քահանայութեան յաւիտենական. փոխանակ զի քինախնդիր եղեւ Աստուծոյ իւրում. եւ քաւեաց վասն որդւոցն Իսրայէղի:
14. Եւ անուն առնն Իսրայէլացւոյ հարելոյ որ հարաւ ընդ կնոջն Մադիանացւոյ` Զամբրի որդի Սաղովմայ, իշխան տան ազգի որդւոցն Շմաւովնի:
15. եւ անուն կնոջն Մադիանացւոյ հարելոյ` Քասբի, դուստր Սուրայ իշխանին ազգի Ամովթայ` տան նահապետութեան Մադիամու:
16. Եւ խաւսեցաւ Տէր ընդ Մովսեսի` եւ ասէ.
17. Խաւսեաց ընդ որդիսն Իսրայէղի` եւ ասասցես. թշնամեցայք ընդ Մադիանացիսն, եւ հարկանիցէք զնոսա.
18. զի թշնամին նոքա ընդ ձեզ նենգութեամբ. որ նենգեցին զձեզ Փոգորաւ, եւ Քասբեաւ դստերք իշխանին Մադիամու քերբն իւրեանց հարելով յաւուրն հարուածոց վասն Փոգովրայ:
Հաղորդում կայքում սխալի վերաբերյալ
Տվյալ հատվածում առկա է սխալ: