1. Եւ խաւսեցաւ Տէր ընդ Մովսեսի` եւ ասէ.
2. Պատուիրեա որդւոցն Իսրայէղի եւ ասասցես ցնոսա. Զպատարագս իմ զդահամունս իմ, զնծայս իմ ի հոտ անոշից` զգուշասջիք մատուցանել ի տաւնս իմ:
3. Եւ ասասցես ցնոսա. Այս են ընձայք զոր մատուցանիցէք Տեառն. գառինս երկուս անարատս հանապազ յողջակէզ անպակաս:
4. զմի գառնն արասցես ընդ առաւաւտս, եւ զերկրորդ գառնն արասցես ընդ երեկոյս:
5. Եւ արասցես տասանորդ գրուի նաշիհ զանգեալ իւղով մզելով` չորրորդաւ դորակի,
6. ողջակէզ անպակասութեան. որպէս լինէր ի լերինն Սինա ի հոտ անոշից Տեառն:
7. Եւ նուէր նորուն չորրորդ դորակին առ մի գառնն ի սրբութեանն. եւ նուիրեսցես զնուէրն ըմպելի Տեառն:
8. եւ զգառնն երկրորդ արասցես ընդ երեկոյս. ըստ զոհին իւրում եւ ըստ նուիրին իւրում արասջիք ի հոտ անոշից Տեառն:
9. Եւ յաւուրն շաբաթուց մատուսջիք երկուս գառինս տարեւորս անարատս, եւ երկուստասանորդս նաշհոյ զանգեալ իւղով ի զոհ.
10. եւ զնուէր ողջակիզին շաբացուց ի շաբաթս, ի վերայ հանապազորդ ողջակիզին, եւ զնորուն նուէր:
11. Եւ յամսամուտս մատուսջիք ողջակէզս Տեառն, զուարակս երկուս յանդւոյ, եւ խոյ մի. գառինս տարեւորս անարատս եւթն.
12. եւ երիս տասանորդս նաշհոյ զանգեալ իւղով առ զուարակ մի. եւ երկուս տասանորդս զանգեալ իւղով առ խոյ մի:
13. եւ տասանորդ նաշոհ զանգելոյ իւղոյ առ գառն մի, ի զոհ անոշից Տեառն ընձա:
14. Եւ նուէր նոցա կէս դորակին լիցի առ զուարակ մի, եւ երկրորդ դորակին լիցի առ խոյ մի, եւ չորրորդ դորակին գինւո լինիցի առ գառն մի: այս ողջակէզք իցեն ամիս յամսոյ` յամիսս տարւոյն:
15. եւ նոխազ մի յայծեաց Տեառն, վասն մեղաց իւրեանց ի վերայ հանապազորդ ողջակիզին առնիցի, եւ նուէր նորա:
16. Եւ յամսեանն առաջնում, ի չորէքտասաներրորդում աւուր ամսեանն` զատիկ տեառն.
17. եւ ի հինգէտասաներորդում աւուր նորին ամսոյ` տաւն. զեւթն աւր բաղարջ կերիջիք.
18. եւ աւրն առաջին կոչեցեալ սուրբ լիցի ձեզ. զամենայն գործ սպասաւորութեան մի գործիցէք ի նմա:
19. Եւ մատուսջիք ողջակէզս եւ ընձայս Տեառն. զուարակս երկուս յանդւոյ, եւ խոյ մի. գառինս տարեւորս անարատս եւթն:
20. Եւ զոհ նոցա, նաշիհ զանգեալ իւղով` երիս տասանորդս առ զուարակ մի. եւ երկուս տասանորդս առ խոյ մի:
21. եւ տասանորդ տասանորդ արասցես առ գառն մի եւթանեցունց գառանցն.
22. եւ նոխազ մի յայծեաց, քաւել վասն նոցա.
23. թող զհանապազորդ առաւաւտին ողջակէզն, որ է ողջակէզ յաճախութեանն:
24. Զայս ըստ այսմ աւրինակի արասջիք աւուր աւուր` զեւթն աւր, պատարագ ողջակէզ ի հոտ անոշից. ի վերայ հանապազորդ ողջակիզին առնիցէք զնուէր նորին:
25. եւ աւրն եւթներորդ կոչեցեալ սուրբ եղիցի ձեզ. զամենայն գործ սպասաւորութեան մի գործիցէք ի նմա:
26. Եւ յաւուրն նորեաց յորժամ մատուցանիցէք զոհս զեւթներորդացն, կոչեցեալ սուրբ եղիցի ձեզ. զամենայն գործ սպասաւորութեան մի գործիցէք:
27. Եւ մատուսջիք ողջակէզս ի հոտ անոշից Տեառն. զուարակս երկուս յանդւոյ եւ խոյ մի, գառինս տարեւորս անարատս եւթն:
28. Եւ զոհ նոցա նաշիհ զանգեալ իւղով երեք տասանորդք առ զուարակ մի, եւ երկոտասանորդք առ խոյ մի,
29. եւ տասանորդ տասանորդ առ գառն մի, եւթանեցունց գառանցն.
30. եւ նոխազ մի յայծեաց վասն մեղաց, քաւել վասն նոցա. թող զհանապազորդ ողջակէզն,
31. եւ զզոհ նոցա զոր առնիցէք, եւ զնուէրս նոցա. եւ անարատք լինիցին ձեզ:
Հաղորդում կայքում սխալի վերաբերյալ
Տվյալ հատվածում առկա է սխալ: