1. Եւ խաւսեցաւ Տէր ընդ Մովսէսի` եւ ասէ:
2. Առ զվրէժ որդւոցն Իսրայէղի ի Մադիանացւոց անտի. եւ ապա յաւելցիս ի ժողովուրդ քո:
3. Եւ խաւսեցաւ Մովսէս ընդ ժողովրդեանն` եւ ասէ. Վառեցէք ի ձէնջ արս` ճակատեալ առաջի Տեառն ի վերայ Մադիամու. հատուցանել զվրէժ ի Տեառնէ Մադիամու.
4. հազար այր ի ցեղէ, յամենայն ցեղիցն Իսրայէղի, առաքեցէք տալ պատերազմ:
5. Եւ համարեսցին ի հազարաւորացն Իսրայէղի հազար այր ի ցեղէ. երկոտասան հազար վառեալ ի պատերազմ:
6. Եւ արձակեաց զնոսա Մովսէս, հազար այր ի ցեղէ հանդերձ զաւրու իւրեանց. եւ զՓենէէս որդի Եղէազարու որդւոյ Ահարովնի քահանայի, եւ զսպասն սրբութեան, եւ փողքն ազդեցութեան ի ձեռս նոցա:
7. Եւ ճակատեցան ընդդէմ Մադիանացւոցն. որպէս հրամայեաց Տէր Մովսէսի: Եւ կոտորեցին զամենայն արու,
8. եւ զթագաւորն Մադիանացւոյ կոտորեցին հանդերձ վիրաւորաւք նոցա. եւ զԵւին, եւ զՍուբ, եւ զՐոկոմ, եւ զՈւր, եւ զՌոբուք, զհինգ թագաւորս Մադիամու: եւ զԲաաղաամ որդի Բէուրա սպանին սրով, հանդերձ վիրաւորաւք նոցա:
9. Եւ զանասուն նոցա եւ զախ նոցա, եւ զամենայն ստացուածս նոցա, եւ զզաւրս նոցա առին յաւարի:
10. եւ զամենայն քաղաքս նոցա տամբք իւրեանց, եւ զաւանս նոցա հրձիգ արարին.
11. եւ առին զամենայն զաւար նոցա. եւ զամենայն կապուտ նոցա ի մարդւոյ մինչչեւ յանասուն:
12. Եւ ածին առ Մովսէս եւ առ Եղէազար քահանայ, եւ առ ամենայն որդիսն Իսրայէղի, զգերին եւ զկապուտ եւ զաւար բանակին Յռաբովթ Մովաբ, որ է յանդիման Երիքովի առ եզերբ Յորդանանու:
13. Եւ ելին Մովսէս եւ Եղիազար քահանայ, եւ ամենայն իշխանք ժողովրդեանն ընդ առաջ նոցա արտաքոյ բանակին:
14. եւ բարկացաւ Մովսէս ի վերայ ոստիկանաց զաւրուն` հազարապետաց եւ հարիւրապետաց, եկելոց ի ճակատէ պատերազմին:
15. Եւ ասէ ցնոսա Մովսէս. Ընդէ՞ր ապրեցուցէք զամենայն էգ.
16. զի նոքա էին որդւոցն Իսրայէղի ըստ բանիցն Բաղաամու, առ ի վրիպեցուցանելոյ, եւ արհամարհելոյ զբանն Տեառն վասն Փոգովրայ. եւ եղեւ հարուած ժողովրդեանն Տեառն:
17. Եւ արդ` կոտորեցէք զամենայն արու յամենայն աղխիդ. եւ զամենայն կին որ գիտացեալ իցէ զաւրութիւն արուի` կոտորեցէք:
18. եւ զամենայն աղխ կանանց, որոց չիցէ գիտացեալ զաւրութիւն արուի` ապրեցուցէք:
19. Եւ դուք բնակեցարուք արտաքոյ բանակին զեւթն աւր: ամենայնի որոյ սպանեալ իցէ եւ մերձեալ ի վիրաւոր, սրբեսցի յաւուրն եւթներորդի. դուք եւ գերիդ ձեզ:
20. եւ ամենայն հանդերձ, եւ ամենայն անաւթ մաշկեղէն, եւ ամենայն կահմզագործ, եւ զամենայն փայտակերտ սրբեսջիք:
21. Եւ ասէ Եղիազար քահանայ ցարս զաւրուն եկելոց ի ճակատէ պատերազմին. Այս իրաւունք աւրինի են զոր հրամայեաց Տէր Մովսեսի:
22. բայց յոսկւոյ եւ յարծաթոյ, եւ ի պղնձոյ, եւ յերկաթոյ, եւ ի կապարոյ, եւ յանագէ.
23. ամենայն որ անցանէ ի հուր` եւ սրբեսցի. այլ եւ ջրովն սրսկմամբ սրբեսցի. եւ ամենայն որ ոչ անցանիցէ ընդ հուր, եւ լուանայցէ ջրով.
24. լուասջիք եւ զհանդերձս յաւուրն եւթներորդի, եւ սուրբք լինիջիք. եւ ապա մտանիցէք ի բանակն:
25. Եւ խաւսեցաւ Տէր ընդ Մովսեսի` եւ ասէ.
26. Առ զհամար աւարի գերութեանդ ի մարդւոյ մինչչեւ յանասուն. դու եւ Եղիազար քահանայ, եւ իշխանք նահապետաց ժողովրդեանդ:
27. եւ բաժանեցէք զաւարդ ի մէջ պատերազմողացդ ելելոց ի պատերազմ. եւ ի մէջ ամենայն ժողովրդեանդ:
28. Եւ առջիք հաս Տեառն յամենայն արանց պատերազմողաց երթելոց ի պատերազմ. ոգի մի` ի հինգ հարիւրոց` ի մարդոյ եւ յանասնոյ, եւ յարջառոյ եւ յոչխարէ եւ յայծեաց:
29. եւ զկէսն նոցա առնուցուս, եւ տայցես Եղիազարու քահանայի զպտուղսն Տեառն:
30. Եւ ի կիսոյ որդւոցն Իսրայէղի առցես մի ի յիսնէ, ի մարդոյ եւ յարջառոյ եւ յոչխարէ եւ յիշոյ, եւ յամենայն անասնոյ. եւ տացես զայն Ղեւտացւոցն որ պահիցեն զպահպանութիւնս խորանին վկայութեան Տեառն:
31. Եւ արարին Մովսէս եւ Եղիազար քահանայ` որպէս հրամայեաց Տէր Մովսէսի:
32. եւ եղեւ աւելորդ աւարին զոր ածին յաւարի արքն պատերազմողք: յոչխարաց վեց հարիւր հազար, եւ եւթանասուն եւ հինգ հազար.
33. եւ արջառ` եւթանասուն հազար եւ երկու հազարք.
34. եւ էշք` վաթսուն եւ մի հազար:
35. եւ ոգիք մարդկան` ի կանանց որ ոչ գիտէին զարութիւն առն, ամենայն ոգիք` երեսուն եւ երկու հազարք:
36. Եւ եղեւ կէս աւարին երթելոցն ի պատերազմ ի թուոյ ոչխարացն` երեք հարիւր եւ երեսուն հազար, եւ եւթն հարիւր եւ հինգ հազար:
37. եւ եղեւ հաս Տեառն յոչխարէ, վեց հարիւր եւ եւթանասուն եւ հինգ.
38. եւ արջառ երեսուն եւ վեց հազար, եւ հաս Տեառն եւթանասուն եւ երկու.
39. եւ էշք` երեսուն հազար եւ հինգ հարիւր, եւ հաս Տեառն եւթանասուն եւ մի.
40. եւ ոգիք մարդկան` վեշտասան հազար, եւ հաս ի նոցանէ Տեառն երեսուն եւ երկու հոգի:
41. Եւ ետ Մովսէս զհասն Տեառն զնուէրն Աստուծոյ Եղիազարու քահանայի. որպէս հրաման ետ Տէր Մովսեսի.
42. զհասարակած որդւոցն Իսրայէղի, զորս բաժանեաց Մովսէս յարանցն պատերազմողաց:
43. Եւ եղեւ հասարակած ի ժողովրդենէ անտի. յոչխարէ երեք արեւր եւ եւթն հազար եւ հինգ հարիւր.
44. եւ արջառ` երեսուն եւ վեց հազար.
45. եւ էշք` երեսուն հազար եւ հինգ հարիւր.
46. եւ ոգիք մարդկան` վեշտասան հազար:
47. Եւ առ Մովսէ ի հասարակածէ որդւոցն Իսրայէղի. մի ի յիսնէ, ի մարդոյ եւ յանասնոյ. եւ ետ զայն Ղեւտացւոցն որ պահէին զպահպանութիւն խորանին Տեառն. որպէս հրաման ետ Տէր Մովսեսի:
48. Եւ մատեան առ Մովսէս ամենայն վերակացուք հազարապետութեան զաւրուն, հազարապետք եւ հարիւրապետք,
49. եւ ասեն ցՄովսէս. Ծառայք քո կալան զհազար արանց պատերազմողաց առ ի մէնջ, եւ ոչ ծախեցաւ ի նոցանէ եւ ոչ մի.
50. եւ բերաք մատուցանել ընձա Տեառն: այր` որոյ գտանիցի ոսկի մեհեւանդ, կամ ապարանջան, եւ մատանի, եւ կշտապանակ, եւ փողոշուկ մանուածոյ նդելուզեալ. քաւել վասն մեր առաջի Տեառն:
51. Եւ առին Մովսէս եւ Եղիազար քահանայ զոսկին ի նոցանէ, զամենայն անաւթ գործեալ,
52. եւ եղեւ ամենայն ոսկի հասին զոր հանին Տեառն. վեշտասան հազար եւ եւթն հարիւր եւ յսուն սկեղ` հազարապետաց անտի.
53. եւ արք պատերազմողք որ ածին աւար, իւրաքանչիւր ումեք:
54. Եւ առին Մովսէս եւ Եղիազար քահանայ զոսկին, ի հազարապետաց անդի, եւ ի հարիւրապետաց, եւ տարան ի խորանն վկայութեան. յիշատակ առ ի յորդւոցն Իսրայէղի առաջի Տեառն:
Հաղորդում կայքում սխալի վերաբերյալ
Տվյալ հատվածում առկա է սխալ: