1. Եւ անասուն բազում էր որդւոցն Իսրայէղի, Ռովբենի, եւ որդւոցն Գադայ զեղեալ յոյժ: եւ տեսին զերկիրն Յազերայ, եւ զերկիրն Գաղաադու. եւ էր տեղին` տեղի խաշանց:
2. Եւ մատուցեալ որդիքն Ռովբենի եւ որդիքն Գադայ` ասեն ցՄովսէս եւ ցԵղիազար քահանայ, եւ ցիշխանս ժողովրդեանն:
3. Ատարովթ, եւ Դիբովն, եւ Յազեր, եւ Նեմբրա, եւ Սեբովն, եւ Եղիդաբովն, եւ Սեբամա, եւ Նաբաւ, եւ Բեան.
4. երկիրն զոր մատնեաց Տէր որդւոցն Իսրայէղի, երկիր` անասնոյ է. եւ ծառայից քոց խաշինք են:
5. եւ ասեն. Գտաք շնորհս առաջի քո, տացի երկիրն այն ծառայից քոց ի կալուած:
6. Եւ ասէ Մովսէս ցորդիսն Գադայ եւ ցորդիսն Ռովբենի. Եղբարք ձեր երթայցեն ի պատերազմ, եւ դուք նստիցի՞ք աստ:
7. եւ ընդէ՞ր խոտորեցուցէք զմիտս որդւոցն Իսրայէղի չանցանել յերկիրն` զոր Տէր Աստուած տալոց է նոցա:
8. Ո՞չ այդպէս արարին հարքն ձեր` յորժամ առաքեցի զնոսա ի Կադէսբառնեայ դիտել զերկիրն.
9. եւ զանգիտեցուցին զսիրտս որդւոցն Իսրայէղի, զի մի մտանիցեն յերկիրն զոր ետ նոցա Տէր:
10. յաւուր յայնմիկ, երդուաւ` եւ ասէ:
11. Մի տեսցեն արք որ ելին յԵգիպտոսէ` ի քսանամենից եւ վեր, որ գիտիցեն զչար եւ զբարի. զերկիրն զոր երդու տալ Աբրահամու եւ Սահակայ եւ Յակովբա. զի ոչ եկին զհետ իմ:
12. բայց Քաղէբ` որդի Յոփենա զատուցեալն, եւ Յեսու Նաւեա, զի եկին զկնի Տեառն:
13. եւ բարկացաւ սրտմտութեամբ Տէր ի վերայ Իսրայէղի, եւ ցածեցոյց զնոսա յանապատի ամս քառասուն. մինչչեւ սատակեցաւ ամենայն ազգքն որ արարին զչարիս առաջի Տեառն:
14. Եւ արդ` դուք յարուցեալ էք փոխանակ հարցն ձերոց, ժողովուրդք մարդկան մեղաւորաց, յաւելուլ միւսանգամ ի բարկութիւն սրտմտութեան Տեառն ի վերայ Իսրայէղի:
15. զի դարձեալ էք ի նմանէ, յաւելուլ միւսանգամ լքանել նմա զձեզ յանապատի աստ. եւ անաւրինիք յամենայն ժողովուրդս յայս:
16. Եւ մատեան առաջի նորա` եւ ասեն: Դադարս ոչխարաց շինեսցուք` եւ անասնոց մերոց, եւ քաղաքս աղխից մերոց:
17. եւ մեք վառեալք, առաջապահք երթիցուք ի պատերազմ ընդ որդւոցն Իսրայէղի, մինչչեւ հանցուք զնոսա յիւրաքանչիւր տեղի: եւ բնակեսցէ աղխ մեր ի քաղաքս պարսպաւորս վասն բնակչաց երկրիս:
18. Եւ ոչ դարձցուք ի տունս մեր` մինչչեւ բաժանեսցեն որդիքն Իսրայէղի զիւրաքանչիւր ժառանգութիւն:
19. եւ ոչ եւս ժառանգեսցուք ի մէջ նոցա յանցիցն Յորդանանու եւ անդր. զի ունիմք զվիճակ մեր յայս կոյս Յորդանանու յարեւելից:
20. Եւ ասէ ցնոսա Մովսէս. Եթէ արասցէք ըստ բանիդ ըստ այդմիկ. եթէ վառիցիք առաջի Տեառն ի պատերազմ.
21. եւ անցցէ ձեր ամենայն վառեալ ընդ Յորդանան առաջի Տեառն, մինչչեւ սատակեսցի թշնամի նորա յերեսաց նորա,
22. եւ նուաճեսցի երկիրն առաջի Տեառն, եւ ապա դառնայցէք, քաւեալ լիջիք առաջի Տեառն եւ յԻսրայէլէ. եղիցի ձեզ երկիրս այս ի կալուած առաջի Տեառն:
23. Ապա թէ ոչ առնիցէք այնպէս, յանցաւոր գտանիջիք առաջի Տեառն. եւ ծանիջիք զմեղս ձեր` յորժամ հասանիցեն ձեզ չարիք:
24. Եւ շինեսջիք դուք ձեզ քաղաքս աղխի ձերում, եւ դադարս խաշանց ձերոց. եւ որ ինչ ել ի բերանոյ ձերոյ
առնիցէք:
25. Եւ խաւսեցան որդիքն Ռովբենի եւ որդիքն Գադայ ընդ Մովսեսի` եւ ասեն: Արասցեն ծառայք քո` որպէս հրամայեաց մեզ տէրդ մեր.
26. աղխ մեր եւ կանայք մեր եւ ամենայն անասուն մեր` կացցեն ի քաղաքս Գաղաադու.
27. եւ ծառայք քո անցցեն վառեալք եւ կազմեալք առաջի Տեառն ի պատերազմ, որպէս եւ տէրդ ասէ:
28. Եւ յանդիման արար նոցա Մովսէս զԵղիազար քահանայ, եւ զՅեսու Նաւեա, եւ զիշխանս նահապետաց ցեղիցն Իսրայէղի:
29. Եւ ասէ ցնոսա Մովսէս. Եթէ անցցեն որդիքդ Ռովբենի եւ որդիքդ Գադայ ընդ ձեզ ըստ Յորդանան, ամենայն վառեալ ի պատերազմ առաջի Տեառն, եւ տիրեցէք երկրին, առաջի ձեր տաջիք դոցա զերկիրն Գաղաադու ի կալուած:
30. Ապա թէ ոչ անցցեն ընդ ձեզ վառեալք ի պատերազմ առաջի Տեառն, անցուսցջիք զաղխ դոցա եւ զկանայս դոցա, եւ զանասունս դոցա յառաջագոյն յերկիրն Քանանացւոց. եւ ժառանգեսցեն ընդ ձեզ յերկրին Քանանացւոց:
31. Պատասխանի ետուն որդիքն Ռովբենի եւ որդիքն Գադայ` եւ ասեն. Զոր ինչ ասէ Տէրդ ցծառայս իւր` արասցուք:
32. մեք անցցուք վառեալք առաջի Տեառն յերկիրն Քանանացւոց, եւ տաջիք մեզ կալուածս յայն կոյս Յորդանանու:
33. Եւ ետ Մովսէս որդւոցն Գադայ եւ որդւոցն Ռովբենի` եւ կիսոյ ցեղին Մանասէի որդւոցն Յովսեփայ, զթագաւորութիւն Սեհովնի արքային Ամուրհացւոց, եւ զթագաւորութիւնն Ովգայ արքաի Բասանու. զերկիրն եւ զքաղաքս սահմանաւք իւրովք, եւ զքաղաքս երկրին շուրջանակի:
34. Եւ շինեցին որդիքն Գադայ զԴեբովն, եւ զԱստարովթ,
35. եւ զԱրուէր, եւ զՍոփար, եւ զՅազեր:
36. եւ բարձրացուցին զնոսա. եւ զԱմրան, եւ զԲաւթառան, քաղաքս ամուրս, եւ դադարս հաւտից:
37. Եւ որդիքն Ռովբենի շինեցին զԵսեբովն, եւ զԵղեաղէն, եւ զԿարիէթամ.
38. եւ զԲէեղմէովն, շուրջ ամրացուցեալս, եւ զՍեբամայ. եւ անուանեցին ըստ անուանց իւրեանց զանուանս քաղաքացն` զորս շինեցին:
39. Եւ գնաց որդի Մաքիրայ որդւոյ Մանասէի ի Գաղաադ` եւ առ զնա, եւ կորոյս զԱմուրհացին որ բնակեալ էր ի նմա:
40. եւ ետ Մովսէս զԳաղաադ Մաքիրայ որդւոյ Մանասէի. եւ բնակեցաւ անդ:
41. Եւ Յայիր Մանասէեան չոգաւ` առ զքաղաքս նոցա, եւ անուանեաց զնոսա աւանս Յայիրայ:
42. Եւ Նաբաւ գնաց` եւ առ զԿանաթ եւ զաւանս նորա, եւ անուանեաց զնոսա Նաբովթըս ըստ անուան իւրոյ:
Հաղորդում կայքում սխալի վերաբերյալ
Տվյալ հատվածում առկա է սխալ: