1. Եւ այս են բանակատեղք որդւոցն Իսրայէղի` յորմէ հետէ ելին յերկրէն Եգիպտացւոց հանդերձ զաւրուն իւրեանց ի ձեռն Մովսէսի եւ Ահարովնի:
2. Եւ գրեաց Մովսէս զչուս նոցա, եւ զբանակատեղս իւրեանց բանիւ Տեառն: եւ այս են բանակատեղք գնացից նոցա:
3. Չուեցին յՌամեսա յամսեանն առաջնոյ, ի հինգետասաներորդում աւուր` ամսոյն առաջնոյ. զայգուց զատկին ելին որդիքն Իսրայէղի բարձրացեալ ձեռամբ առաջի ամենայն Եգիպտացւոցն:
4. եւ Եգիպտացիքն թաղէին զամենայն մեռեալս ի նոցանէ. զորս կոտորեաց Տէր զամենայն անդրանիկս յերկրին Եգիպտացւոց. եւ ի դից նոցա արար վրէժխնդրութիւն Տէր.
5. եւ չուեալ որդւոցն Իսրայէղի յՌամեսա բանակեցան ի Սոկքովթ:
6. Եւ չուեալ ի Սոկքովթայ` բանակեցան ի Բովթան, որ է մասն ինչ անապատին:
7. Եւ չուեցին ի Բովթանայ, եւ բանակեցան առ բերանով Եպերովթա, որ է յանդիման Փեեղսեփովնեա, եւ բանակեցան հանդէպ Մագդովղայ:
8. Եւ չուեցին հանդէպ Եպերովթա, եւ անցին ընդ մէջ ծովուն յանապատն, եւ գնացին նոքա երեքաւրեայ ճանապարհ ընդ անապատն, եւ բանակեցան զԴառն աղբերբքն:
9. Եւ չուեցին ի Դառն աղբերացն` եկին Յեղիմ. եւ էին յԵղիմ երկոտասան ակն ջուրց, եւ եւթանասուն ծառ արմաւենեաց. եւ բանակեցան անդ առ ջրովն:
10. Եւ չուեցին յԵղիմայ, եւ բանակեցան զափամբ Կարմիր ծովուն:
11. Եւ չուեցին ի Կարմիր ծովէն եւ բանակեցան յանապատին Սինա:
12. Չուեցին ի Սինա անապատէն, եւ բանակեցան ի Հռափա:
13. Եւ չուեցին ի Հռափայ, եւ բանակեցան յԵղիմ:
14. Չուեցին յԵղիմա, եւ բանակեցան յՌափիդին. եւ ոչ գոյր ջուր ըմպելոյ ժողովրդեանն:
15. Չուեցին յՌափիդինա, եւ բանակեցան յանապատին Սինա:
16. Եւ չուեցին յանապատէն Սինաէ, եւ բանակեցան ի Գերեզմանս Ցանկութեան:
17. Չուեցին ի Գերեզմանացն Ցանկութեան, եւ բանակեցան յԱսերովթ:
18. Չուեցին յԱսերովթայ, եւ բանակեցան յՌաթամա:
19. Չուեցին յՌաթամայ, եւ բանակեցան յՌեմովնփարէս:
20. Չուեցին յՌեմովնփարէսէ, եւ բանակեցան ի Լոբենա:
21. Չուեցին ի Ղոբենա, եւ բանակեցան ի Դէսսա:
22. Չուեցին ի Դեսսա, եւ բանակեցան ի Մակէղղաթ:
23. Չուեցին ի Մակեղղաթա, եւ բանակեցան ի Սափար:
24. Չուեցին ի Սափարա, եւ բանակեցան ի Քարադաթ:
25. Չուեցին ի Քարադաթայ, եւ բանակեցան ի Մակեղղովթ:
26. Չուեցին ի Մակեղղովթա, եւ բանակեցան ի Կատտաաթ:
27. Չուեցին ի Կատտաաթայ, եւ բանակեցան ի Տարաթ:
28. Չուեցին ի Տարաաթա, եւ բանակեցան ի Մատէկ:
29. Չուեցին ի Մատեկայ, եւ բանակեցան ի Սաղմովնա:
30. Չուեցին ի Սաղմովնա, եւ բանակեցան ի Մասուրութ:
31. Չուեցին ի Մասուրութայ, եւ բանակեցան ի Բանեա:
32. Չուեցին ի Բանեայ, եւ բանակեցան ի Գադգադ:
33. Չուեցին ի լեռնէն Գադգադայ, եւ բանակեցան յԵտբաթա:
34. Չուեցին յԵտբաթա, եւ բանակեցան յԵփրովնեայ:
35. Չուեցին յԵբրովնա, եւ բանակեցան ի Գեսիովնգաբեր:
36. Չուեցին ի Գեսիովնգեբերա, եւ բանակեցան յանապատին Սինա:
37. Չուեցին ի Սինա անապատէն. եւ բանակեցան յանապատին Փառանա, այն է Կադէս: Չուեցին ի Կադէսայ, եւ բանակեցան ի Հովր լերինն, մերձ առ երկրաւն Եդովմա:
38. Եւ ել Ահարովն քահանայ ի լեառնն հրամանաւ Տեառն` եւ մեռաւ անդ. ի քառասներորդի ամի ելանելոյ որդւոցն Իսրայէղի յերկրէն Եգիպտացւոց. յամսեանն հինգերորդի` որ աւր մի էր ամսոյն:
39. Եւ Ահարոն էր հարիւր եւ քսան եւ երից ամաց յորժամ մեռաւ ի Հովր լերինն:
40. Եւ լուաւ Քանանիս արքայ Արադայ, եւ ինքն բնակեալ էր յերկրին Քանանացւոց, յորժամ մտանէին որդիքն Իսրայէղի:
41. Եւ չուեցին ի Հովր լեռնէ, եւ բանակեցան ի Սեղմովնա:
42. Չուեցին ի Սեղմովնա, եւ բանակեցան ի Փենով:
43. Չուեցին ի Փենովայ, եւ բանակեցան յՈվբովթ:
44. Չուեցին յՈբովթայ եւ բանակեցան ի Գայի` յայն կոյս սահմանացն Մովաբու:
45. Չուեցին ի Գայիա, եւ բանակեցան իԴէմովնգադ:
46. Չուեցին ի Դէբովնգադա, եւ բանակեցան ի Գեղմովնդէբղաթէմ:
47. Չուեցին ի ի Գեղմովնգադա եւ բանակեցան ի լերինն Սաբարիմա յանդիման Նաբաւայ:
48. Չուեցին ի լերանցն Սաբարիմա, եւ բանակեցան յարեւմտից Մովաբու առ Յորդանանու յանդիման Երեքովի:
49. եւ բանակեցան զՅորդանանաւ ի մէջ Եսիմովթայ. մինչչեւ ցՄեղսաովտ յարեւելից Մովաբու:
50. Եւ խաւսեցաւ Տէր ընդ Մովսեսի յարեւմուտս Մովաբու առ Յորդանանու յանդիման Երեքովի` եւ ասէ:
51. Խաւսեաց ընդ որդիսն Իսրայէղի` եւ ասասցես ցնոսա. Դուք աւադիկ անցանէք ընդ Յորդանան յերկրին Քանանացւոց.
52. եւ կորուսջիք զամենայն բնակիչս երկրին յերեսաց ձերոց. եւ կործանեսջիք զդիս նոցա. եւ զամենայն կուռս ձուլածոյս նոցա կորուսջիք. եւ զամենայն արձանս նոցա` բառնայցէք ի միջոյ:
53. Եւ կորուսջիք զբնակիչս երկրին, եւ բնակեսջիք ի նմա. զի ձեզ ետու զերկիրն նոցա ի վիճակ.
54. ըստ ցեղից ձերոց, ըստ բազմաց` բազմացուցանիջիք զկալուածս իւրեանց. եւ ըստ սակաւուց` սակաւացուցանիջիք զկալուածս իւրեանց: Որպէս ելանիցէ յանուն ուրուք` անդ լինիցի. ըստ ցեղից նահապետութեան ձերոյ ժառանգեսջիք:
55. Եւ եթէ ոչ կորուսանիջիք զբնակիչս երկրին յերեսաց ձերոց, եղիցին զորս թողուցուքն ի նոցանէ` խոչ յական ձերում, եւ նետք ի կողս ձեր. եւ եղիցին ձեզ թշնամիք յերկրին յորում դուք բնակիջիք.
56. եւ եղիցի որպէս խորհէի առնել նոցա` նոյնպէս ձեզ արարից:
Հաղորդում կայքում սխալի վերաբերյալ
Տվյալ հատվածում առկա է սխալ: