1․ Եւ խաւսեցաւ Տէր ընդ Մովսեսի յարեւմուտս` առ եզերբ Յորդանանու յանդիման Երեքովի` եւ ասէ:
2․ Հրաման տուր որդւոցն Իսրայէղի. եւ տացեն Ղեւտացւոցն ի վիճակաց կալուածոց իւրեանց քաղաքս բնակութեանս, եւ բուրաստանս շուրջ զքաղաքաւք իւրեանց տացեն Ղեւտացւոցն:
3․ Եւ եղիցին նոցա քաղաք բնակութեան. եւ զատուցեալքն նոցա եղիցին խաշանց նոցա, եւ ամենայն չորքոտանեաց նոցա:
4․ Եւ արուարձանք քաղաքացն զորս տացէք Ղեւտացւոցն ի պարսպէ քաղաքին. եւ արտաքոյ պարսպին երկուս հազարս կանկունս շուրջանակի:
5․ Եւ չափեսջիք արտաքոյ քաղաքին, յարեւելից կողմանէ երկուս հազարս կանկունս. եւ ընդ ծովակողմն երկուս հազարս կանկունս. եւ ընդ կողմն հիսւսու` երկուս հազարս կանգունս. եւ ընդ կողմն հարաւու` երկուս հազարս կանգունս: եւ քաղաք ի մէջ այնորիկ լինիցի ձեզ: եւ զարուարձանս քաղաքացն:
6․ Եւ զքաղաքսն զոր տայցէք Ղեւտացւոցն զվեց քաղաքս ապաստանից զոր տայցէք` փախչել անդր սպանողին: եւ այնւ քառասուն եւ երկուս քաղաքս:
7․ ընդ ամենայն քաղաքս` քառասուն եւ ութ քաղաք տայցէք Ղեւտացւոցն: եւ զնոսա` եւ զբուրաստանս իւրեանց:
8․ Եւ զքաղաքս` զոր տայցէք ի կալուած որդւոցն Իսրայէղի. ի բազմաց` բազումս, եւ ի սակաւուց` սակաւս. ըստ իւրաքանչիւր ժառանգութեան զոր ժառանգիցեն, տացեն ի քաղաքաց անտի Ղեւտացւոցն:
9․ Եւ խաւսեցաւ Տէր ընդ Մովսեսի` եւ ասէ.
10․ խաւսեաց ընդ որդիսն Իսրայէղի` եւ ասասցես ցնոսա: Դուք աւադիկ անցանէք ընդ Յորդանան յերկիրն Քանանացւոց,
11․ եւ զատուսջիք ձեզ քաղաքս, որ լինիցի ձեզ ապաստանաց` փախչել անդր սպանողի: Ամենայն որ հարկանիցէ զանձն ուրուք ակամայ,
12․ եղիցին ձեզ քաղաք ապաստանի ի մերձաւորէ արեանն. եւ մի մեռանիցի սպանողն` մինչ կացցէ առաջի ժողովրդեանն ի դատաստանի:
13․ Եւ քաղաքքն զոր տայցէք` վեց քաղաքք ապաստանի լինիցին ձեզ.
14․ երիս քաղաքս տաջիք յայնկոյս Յորդանանու, եւ երիս քաղաքս տաջիք յերկրին Քանանացւոց:
15․ Եւ եղիցի այն ապաւինութիւն որդւոցն Իսրայէղի, եկին եւ պանդխտին ի միջի ձերում. եղիցին քաղաքքն այնոքիկ ապաստանք, փախչել անդր ամենայնի որ հարկանիցէ զանձն ուրուք ակամայ:
16․ Եւ եթէ երկաթեղէն անաւթով ոք հարկանիցի` եւ սպանանիցէ զնա, սպանող է. մահու մեռցի սպանողն:
17․ Եւ եթէ բռնաքարաւ որով մեռցի ոք հարկանիցէ զնա եւ մեռանիցի, սպանող է. մահու մեռցի սպանողն:
18․ Եւ եթէ փայտեղէն անաւթով ի ձեռանէ որով մեռանիցի ոք` հարկանիցէ զնա եւ մեռանիցի, սպանող է. մահու մեռցի սպանողն:
19․ Մերձաւոր արեանն սպանցէ զսպանողն. յորժամ պատահեսցէ նմա սպանցէ զնա:
20․ Եւ եթէ առ թշնամութեան մղեսցէ զնա. եւ ձգեսցէ նմա զամենայն անաւթ խարդախութեամբ` եւ մեռանիցի.
21․ կամ առ քինալ հարկանիցէ զնա ձեռամբ իւրով եւ մեռանիցի, մահու մեռցի որ էհարն. սպանող է, մահու մեռցի որ սպանանիցէ. մերձաւոր արեանն սպանցէ զնա ի պատահել նորա նմա:
22․ Ապա թէ վրիպակաւ` եւ ոչ առ թշնամութեան մղեսցէ զնա, եւ ձգիցէ նմա զամենայն անաւթ եւ ոչ խարդախութեամբ.
23․ կամ զամենայն քար որով մեռանիցի, եւ ոչ գիտութեամբ հարկանիցէ զնա` եւ մեռանիցի. եւ նա չէր նմա թշնամի, եւ ոչ խնդրէր չար առնել նմա.
24․ դատեսցի ժողովուրդն ի մէջ հարկանելեացն, եւ ի մէջ մերձաւորի արեանն ըստ դատաստանացս այսոցիկ.
25․ եւ ապրեցուսցէ ժողովուրդն զսպանողն ի մերձաւորէ արեանն: Եւ յուղարկեսցէ զնա ժողովուրդն անդրէն ի քաղաքն ապաստանի յոր ապաւինեալ էր. եւ բնակեսցէ անդ մինչչեւ մեռանիցի քահանա մեծ զոր աւծին եւղովն սրբութեան:
26․ Եւ եթէ ելանելով ելանիցէ սպանողն ըստ սահմանս քաղաքին յոր ապաւինեցաւ.
27․ եւ գտցէ զնա մերձաւոր արեանն արտաքոյ սահմանաց քաղաքին ապաստանի իւրոյ, սպանցէ մերձաւոր արեանն զսպանողն. եւ մի լիցի մահապարտ:
28․ Վասն այնորիկ ի քաղաքի ապաւինի իւրոյ բնակեսցէ` մինչչեւ մեռանիցի քահանայն մեծ. եւ յետ մեռանելոյ քահանային մեծի, դարձցի անդրէն սպանողն յերկիր կալուածոյ իւրոյ:
29․ Եւ եղիցի այս ձեզ յիրաւունս դատաստանի յազգս ձեր, յամենայն բնակութեան ձերում:
30․ Ամենայն որ հարկանիցէ զանձն. վկայիւք սպանցեն զսպանողն. եւ մի միայն վկայն` մի վկայեսցէ սպանել զանձն:
31․ Եւ փրկանս ընդ անձին ի սպանողէն` որ մահապարտ իցէ, մի առնուցուք. այլ մահու մեռանիցի:
32․ Եւ մի առնուցուք փրկանս վասն փախչելոյն ի քաղաքն ապաստանի, առ միւսանգամ բնակելոյն յերկրին, մինչչեւ մեռանիցի քահանայն մեծ:
33․ Եւ մի շաղախիցէք զերկիրն. եւ ոչ քաւիցի երկիրն յարենէն հեղլոյ ի վերայ նորա, եթէ ոչ արեամբն հեղելով:
34․ Եւ մի պղծիցէք զերկիրն յորում բնակիցէք ի նմա. յորում ես բնակեցայց ի միջի ձերում. զի ես եմ Տէր Աստուած, որ բնակեալ եմ ի մէջ որդւոցն Իսրայէղի:
Հաղորդում կայքում սխալի վերաբերյալ
Տվյալ հատվածում առկա է սխալ: