Գլուխ 36

   
1․ Եւ մատեան իշխանք ցեղի որդւոցն Գաղաադու որդւոյ Մաքիրայ` որդւոյ Մանասէի ի ցեղէ որդւոցն Յովսեփա. եւ խաւսեցան առաջի Մովսեսի, եւ առաջի Եղիազարու քահանահաի, եւ առաջի իշխանաց տանց նահապետաց որդւոցն Իսրայէղի,

2․ եւ ասեն. Տեառն մերում հրաման ետ Տէր, տալ զերկիրն ժառանգութիւն վիճակ որդւոցն Իսրայէղի, եւ Տեառնդ հրաման ետ Տէր` տալ ժոռանգութիւն դստերացն Սաղպաադու եղբաւր մերոյ:

3․ Եւ արդ` թէ լինիցին միում ի ցեղիցն Իսրայէղի կանայք. եւ բառնայցէ՞ վիճակ նոցա ի կալուածոց հարցն մերոց. եւ յաւելուցու ի ժառանգութիւն այրն ցեղի որոց լինիցինն կանայք. եւ ի վիճակէ ժառանգութեանն մերոյ բառնայցէ՞:

4․ եւ թէ լինիցի թողութիւն որդւոցն Իսրայէղի, յաւելուցու ժառանգութիւն նոցա ի ժառանգութիւն ցեղին, որոց լինիցինն կանայք. եւ ի ժառանգութենէ ցեղի ազգիս մերոյ բառնայցէ զժառանգութիւն նոցա:

5․ Եւ պատուիրեաց Մովսէս որդւոցն Իսրայէղի հրամանաւ Տեառն` եւ ասէ. Առ այն զորս ասաց ցեղ որդւոցն Յովսեփու:

6․ Այս բան է զոր հրաման ետ Տէր դստերացն Սաղպաադու, եւ ասէ: Որոց հաճոյ թուեսցի յաչս նոցա` եղիցին նոքա կանայք. բայց ի ցեղէ հաւրն իւրեանց եղիցին կանայք:

7․ Եւ մի փոխեսցի ժառանգութիւն որդւոցն Իսրայէղի ցեղէ ի ցեղ. զի յիւրաքանչիւր ժառանգութիւն հայրենի ցեղին իւրոյ յարեսցին որդիքն Իսրայէղի:

8․ Եւ ամենայն աւրորդ մերձաւոր ժառանգութեան ցեղի որդւոցն Իսրայէղի միում ումեք յազգականաց հաւր իւրոյ լինիցի կին. զի մերձաւորեցուսցեն որդիք Իսրայէղի զիւրաքանչիւր հայրենի ժառանգութիւն իւր:

9․ Եւ մի փոփոխեսցեն որդիքն Իսրայէղի զվիճակ ի ցեղէ ի ցեղ. այլ իւրաքանչիւր յիւր ժառանգութիւն յարեսցին որդիքն Իսրայէղի:

10․ Եւ որպէս հրաման ետ Տէր Մովսէսի, նոյնպէս արարին դստերքն Սաղպաադու:

11․ Եւ եղեն Թերսա, եւ Եգղաւ, եւ Մեղքա, եւ Նուաւ, եւ Մաաղա, դստերք Սաղպաադու` հաւր եղբարձ որդւոց իւրեանց կանայք:

12․ ի ցեղէն Մանասէի որդւոցն Յովսեփու եղեն կանայք: եւ եղեն ժառանգութիւնք նոցա յազգատոհմի հաւրն իւրեանց:
13․ Այս են պատուիրանք եւ իրաւունք եւ դատաստանք զոր պատուիրեաց Տէր ի ձեռն Մովսէսի, յարեւմուտս Մովաբու, առ եզերբ Յորդանանու յանդիման Երեքովի: