Գլուխ 4

   
1. Եւ խաւսեցաւ Տէր ընդ Մովսեսի եւ ընդ Ահարովնի` եւ ասէ.

2. Կալ զթիւ գլխոց որդւոցն Կահաթու ի միջոյ որդւոցն Ղեւեայ, ըստ գունդս իւրեանց, ըստ տանց նահապետաց իւրեանց`

3. ի քսանամենից եւ ի հինգ ամենից ի վեր մինչչեւ ցյսնամեանս. ամենայն որ մտանիցէ ի սպաս գործել զգործ խորանին վկայութեան:

4. Եւ այս իցէ գործ որդւոցն Կահաթու ի միջոյ որդւոցն Ղեւեայ, ըստ գունդս իւրեանց, ըստ տանց նահապետաց իւրեանց ի խորանին վկայութեան` սրբութիւնք սրբութեանց:

5. Եւ մտցէ Ահարովն եւ որդիք իւր յորժամ խաղասցէ բանակն. իջուսցեն զվարագոյրն հովանոց, եւ ծածկեսցեն նովաւ զտապանակն վկայութեան,

6. եւ դիցեն ի վերայ նորա զնուարտանն մաշկեղէն զկապուտակ, եւ արկցեն զնովաւ ձորձ համակ կապուտակ ի վերուստ կողմանէ, եւ ագուսցեն զլծակսն:

7. Ի վերայ եւ զառաջաւորի սեղանւոյն արկցեն հանդերձս համակ հանդերձ ծիրանի. եւ զափսէս, եւ զտուփս, եւ զճաշակս, եւ զնուիրանոցսն որովք նուիրիցին. եւ հացքն հանապազորդք ի վերայ նորա կայցեն:

8. եւ արկցեն զնովաւ հանդերձ կարմիր, եւ ծածկեսցեն զնա մաշկեղէն նուարտանաւն կապուտակաւ, եւ ագուսցեն նմա զլծակսն:

9. Եւ առցեն հանդերձ կապուտակ, եւ ծածկեսցեն զաշտանակն լուսոյ` եւ զերկոսին ճրագարանս նորա, եւ զունելիս նորա, եւ զբազմակակալս նորա, եւ զամենայն ամանս իւղոցն որովք պաշտիցեն:

10. եւ արկցեն զնա եւ զամենայն զկահ նորա ի նուարտանն մաշկեղէն կապուտակ. եւ դիցեն զնա ի վերայ լծակացն:

11. Եւ զսեղանն ոսկի ծածկեսցեն հանդերձիւ կապուտակաւ, եւ արկցեն ի վերայ նորա նուարտան մաշկեղէն կապուտակ, եւ ագուսցեն նմա զլծակս նորա:

12. Եւ առցեն զամենայն կահ պաշտամանն` որովք պաշտիցեն ի սրբութիւնսն եւ արկցեն` ի հանդերձս կապուտակս. եւ ծածկեսցեն զայն մաշկեղէն նուարտանաւն կապուտակաւ. եւ դիցեն ի վերայ լծակացն:

13. Եւ զնուարտանն դիցեն ի վերայ սեղանւոյն. եւ ծածկեսցեն զնա հանդերձիւ համակ ծիրանով.

14. եւ դիցեն ի վերայ նորա զսպասն որովք պաշտիցեն ի վերայ նորա, եւ զբուրուառն, եւ զմսահանս, եւ զտաշտս, եւ զծածկիչս, եւ զամենայն սպաս սեղանւոյն. եւ արկցեն ի վերայ նորա նուարտան մաշկեղէն կապուտակ. եւ անցուսցեն ընդ նա զլծակսն:

15. Եւ առցեն հանդերձ ծիրանի եւ ծածկեսցեն զաւազանն, եւ զխարիսխս նորա. եւ արկցեն զնոսա ի մաշկ կապուտակ, եւ դիցեն ի վերայ լծակացն: Եւ կատարեսցեն եւ Ահարովն եւ որդիք նորա ծածկել զսրբութիւնսն, եւ զամենայն կահ սրբութեանն ի չուել բանակին: եւ ապա մտցեն որդիքն Կահաթու բառնալ, եւ մի մերձեսցին ի սրբութիւնսն` զի մի մեռանիցին: Զայն բառնայցեն որդիքն Կահաթու ի խորանէ անտի վկայութեան:

16. Եւ ոստիկան Եղէազար որդի Ահարովնի քահանայի. զեղն լուսոյ, եւ զխունկսն հանդերձանացն, եւ զզոհն հանապազորդ. եւ զեւղն աւծութեան, եւ զհանդերձ ամենայն խորանին եւ որ ինչ ի նմա. եւ ի սրբութեանն, եւ յամենայն սրբութիւնսն:

17. Եւ խաւսեցաւ Տէր ընդ Մովսեսի եւ ընդ Ահարովնի` եւ ասէ.

18. Մի սատակիցէք զգունդն Կահաթու ի միջւոյ Ղեւտացւոց. զայս ինչ արասջիք նոցա, եւ կեցցեն եւ մի մեռանիցեն

19. ի մերձանալոյ նոցա ի սրբութիւն սրբութեանցն. Ահարովն եւ որդիք նորա մտցեն ի ներքս, եւ կարգեսցեն զնոսա իւրաքանչիւր ըստ բեռին իւրում.

20. եւ մի մտանիցեն վայրապար տեսանել զսրբութիւնսն սրբութեանց, զի մի մեռանիցին:

21. Եւ խաւսեցաւ Տէր ընդ Մովսեսի եւ ասէ.

2.2 Կալ դու զառաջ որդւոցն Գեդսովնի, ըստ տանց նահապետաց իւրեանց, ըստ գնդից իւրեանց

23. ի քսան եւ ի հինգ ամենից եւ ի վեր մինչչեւ ցյսնամեանս, եւ արասցես նոցա հանդէս. ամենայն որ մտանիցէ ի սպաս, գործել զգործ խորանին վկայութեան:

24. Այս իցէ սպասաւորութիւն գնդին Գեդսովնի, մտանել ի հարկ եւ բառնալ:

25. եւ բարձցեն զվերափեղկս խորանին, եւ զխորանն վկայութեան, եւ զարտախուրակս նորա, եւ զնուարտանն կապուտակեա որ ի նմա ի վերուստ կողմանէ. եւ զվայրագոյրն խորանին վկայութեան,

26. եւ զառագաստն սրահին, որ ի վերայ խորանին վկայութեան. եւ զապարումսն, եւ զամենայն կահ սպասուն որովք պաշտիցենն:

27. Արասցեն ըստ բերանոյ Ահարովնի եւ որդւոց նորա. եղիցի սպասաւորութիւն որդւոցն Գեդսովնի ըստ ամենայն սպասաւորութեան իւրեանց, եւ ըստ ամենայն գործոց իւրեանց. եւ արասջիք նոցա հանդէս յանուանէ. եւ ամենայնի որ ինչ բառնայցի ի նոցանէ:

28. Այս իցէ սպասաւորութիւն որդւոցն Գեդսովնի` խորանին վկայութեան, եւ պահպանութիւնն նոցա ի ձեռն Իթամարայ որդւոյ Ահարովնի քահանայի:

29. Եւ որդւոցն Մերարեայ ըստ գնդից իւրեանց, ըստ տանց նահապետաց իւրեանց, արասջիք հանդէս,

30. ի քսանամենից եւ ի վեր, մինչչեւ ցյսնամեանս` արասջիք նոցա հանդէս. ամենայն որ մտանիցէ ի սպաս գործոյ խորանին վկայութեան:

31. Եւ այս իցէ պահպանութիւնք բեռանցն որ բառնայցին ի նոցանէ, ըստ ամենայն գործոյ նոցա ի խորանին վկայութեան. զխոյակս խորանին, եւ զնիգս, եւ զսիւնս նորա, եւ զխարիսխս նորա. եւ զվարագոյրն, եւ զխարիսխս նոցա, եւ զսիւնս նոցա.

32. եւ զվարագոյր դրան խորանին. եւ զսիւնս սրահին շուրջանակի, եւ զխարիսխս նոցա. եւ զսիւնս վարագուրի դրան սրահին, եւ զխարիսխս նոցա, եւ զցիցս նոցա, եւ զապաւանդակս նոցա, եւ զամենայն զկահ նոցա, եւ զամենայն սպաս նոցա: Եւ յանուանէ հանդէս առնիցէք նոցա. եւ ամենայն կահ ի պահպանութեանն որ բառնայցի ի նոցանէն:

33. Այս իցէ սպասաւորութիւն գնդի որդւոցն Մերարեայ, յամենայն գործս իւրեանց ի խորանին վկայութեան` ի ձեռն Իթամարայ որդւոյ Ահարովնի քահանայի:

34. Եւ արարին հանդէս Մովսէս եւ Ահարովն իշխանքն Իսրայէղի որդւոցն Կահաթու ըստ գնդից իւրեանց, եւ ըստ տան նահապետաց իւրեանց`

35. ի քսան եւ ի հինգ ամենից եւ ի վեր մինչչեւ ցյսնամեանս, ամենայն որ մտանէր ի սպաս, եւ գործէր զգործ խորանին վկայութեան:

36. եւ եղեւ նոցա հանդէս ըստ գնդից իւրեանց, երկու հազարք եւ եւթն հարիւր եւ յսուն:

37. Այս է հանդէս գնդին Կահաթու. ամենայն որ մտանէր ի սպաս խորանին վկայութեան. որպէս արարին հանդէս Մովսէս, եւ Ահարովն բանիւ Տեառն ի ձեռն Մովսեսի:

38. Եւ անցին ի հանդիսի որդիքն Գեդսովնի ըստ գնդից իւրեանց, ըստ տանց նահապետաց իւրեանց`

39. ի քսան եւ ի հինգ ամենից եւ ի վեր մինչչեւ ցյսնամեանս, ամենայնի որ մտանէր պաշտել եւ գործել ի գործ խորանին վկայութեան:

40. եւ եղեւ նոցա հանդէս ըստ գնդից իւրեանց, ըստ տանց նահապետաց իւրեանց, երկու հազարք եւ վեց հարիւր եւ երեսուն:

41. Այս է հանդէս գնդի որդւոցն Գեդսովնի, ամենայն որ պաշտէր ի խորանին վկայութեան, որոց արարին հանդէս Մովսէս եւ Ահարովն, ըստ բանի Տեառն ի ձեռն Մովսեսի:

42. Անցին ի հանդիսի եւ գունդք որդւոցն Մերարեայ` ըստ գնդից իւրեանց, ըստ տանց նահապետաց իւրեանց`

43. ի քսան եւ ի հինգ ամենից եւ ի վեր մինչչեւ ցյսնամեանս. ամենայն որ մտանէր պաշտել ի գործ խորանին վկայութեան.

44. եղեւ հանդէս նոցա ըստ գնդից իւրեանց, ըստ տանց նահապետաց իւրեանց, երեք հազարք եւ երկերիւր:

45. Այս է հանդէս գնդի որդւոցն Մերարեայ. որոց արարին Մովսէս եւ Ահարովն հանդէս ըստ բանին Տեառն ի ձեռն Մովսեսի:

46. Ամենեքին անցեալք ի հանդիսի, որոց արարին Մովսես եւ Ահարովն հանդէս իշխանքն Իսրայէղի Ղեւտացւոցն, ըստ գնդից իւրեանց, ըստ տանց նահապետաց իւրեանց`

47. ի քսան եւ ի հինգ ամենից եւ ի վեր մինչչեւ ցյսնամեանս. ամենայնի որ մտանէր ի գործ սրբութեանցն, եւ ի գործ կրելեաց խորանին վկայութեան:

48. եղեն անցեալք ի հանդիսի ութ հազար եւ հինգ հարիւր եւ ութսուն` ըստ բանի Տեառն:

49. Արար նոցա հանդէս Տէր ի ձեռն Մովսեսի. այր ըստ առնէ ի վերայ գործոյ իւրեանց ի վերայ բեռանցն զոր ինքեանք բառնային. եւ անցին ի հանդիսի` որպէս հրամայեաց Տէր Մովսեսի: