Գլուխ 5

   
1. Եւ խաւսեցաւ Տէր ընդ Մովսեսի` եւ ասէ.

2. Հրաման տուր որդւոցն Իսրայէղի, եւ արձակեսցեն ի բաց ի բանակէ անտի զամենայն բորոտ, եւ զամենայն սերմանակաթ, եւ զամենայն պղծեալ յոգի,

3. յարուէ մինչչեւ ցէգ. արձակեցէք ի բաց ի բանակէ այտի. եւ մի պղծեսցեն զբանակս իւրեանց` յոր եսդ իջանեմ:

4. Եւ արարին այնպէս որդիքն Իսրայէղի, եւ արձակեցին զնոսա ի բաց ի բանակէ անտի, որպէս խաւսեցաւ Տէր ընդ Մովսեսի, այնպէս արարին որդիքն Իսրայէղի:

5. Եւ խաւսեցաւ Տէր ընդ Մովսեսի` եւ ասէ.

6. Խաւսեաց ընդ որդիսն Իսրայէղի` եւ ասասցես. Այր կամ կին, որ ոք արասցէ յամենայն մարդկեղէն մեղաց, եւ արհամարհելով արհամարհիցէ` եւ յանցանիցէ անձնն այն,

7. խոստովան լինիցի զմեղս իւր զոր արար. եւ հատուսցէ ընդ յանցանացն զգլուխ, եւ զհինգերորդ մասն նորա յաւելցէ ի նոյն, եւ տացէ նմա որում յանցեաւն:

8. Ապա թէ չիցէ ոք առնն մերձեցուցիչ հատուցանել նոցա զյանցանաց նորա. եւ ընդ յանցանացն որ ինչ ընձաիցի Տեառն, այն քահանային եղիցի. բայց ի խոյէն քաւութեան` որով քաւիցէ վասն իւր:

9. Եւ ամենայն պտուղ ըստ ամենայնի որ սրբիցի յորդւոցն Իսրայէղի` զոր ինչ մատուցանիցեն Տեառն, քահանային եղիցի:

10. Եւ յիւրաքանչիւր սրբելոց անտի, նորա լինիցի. եւ այր ոք որ տայցէ քահանային` նորա լինիցի:

11. Խաւսեցաւ Տէր ընդ Մովսեսի` եւ ասէ.

12. Խաւսեաց ընդ որդիսն Իսրայէղի` եւ ասասցես ցնոսա: Առն ուրուք առն` եթէ յանցանիցէ կին իւր` եւ արհամարհելով արհամարիցէ զնա:

13. Եւ ննջեսցէ ոք ընդ նմա արութեամբ սերման. եւ վրիպեսցի յաչաց առն իւրոյ` եւ թագուցանիցէ. եւ նա պղծեալ իցէ, եւ վկայ ոչ գուցէ զնմանէ, եւ յղի ոչ իցէ:

14. Եւ հասանիցէ ի վերայ առն նորա ոգի նախանձու. եւ նախանձ բերիցէ ընդ կնոջ իւրում, եւ նա` ոչ իցէ պղծեալ: կամ հասանիցէ ի վերայ նորա ոգի նախանձու, եւ նախանձ բերիցէ ընդ կնոջ իւրում. եւ նա` չիցէ պղծեալ:

15. Ածցէ այրն զկինն իւր առ քահանայն` եւ մատուսցէ վասն նորա պատարագ, զտասանորդ գրուին ալեւր գարեղէն, եւ եւղ` մի արկցէ ի նմա, եւ կնդրուկ` մի դիցէ ի վերայ նորա. զի զոհ նախանձաւորութեան է: զոհ յիշատակի, զոհ յիշատակելոյ զմեղս,

16. մատուսցէ քահանայն, եւ կացուսցէ զկինն առաջի Տեառն:

17. եւ առցէ քահանայն ջուր սուրբ կենդանի խեցեղէն ամանով. եւ ի հողոյ անտի որ իցէ առ յատակաւ խորանին վկայութեան` եւ առեալ քահանաին արկցէ ի ջուրն:

18. Եւ կացուսցէ քահանայն զկինն առաջի Տեառն. եւ մերկացուսցէ զգլուխ կնոջն, եւ տացէ ի ձեռս նորա զոհ յիշատակին, զզոհ նախանձաւորութեանն. եւ ի ձեռն քահանային կացցէ ջուրն յանդիմանութեան նզովին այնորիկ,

19. եւ երդմնեցուսցէ զնա քահանայն` եւ ասասցէ ցկինն. Եթէ չիցէ ննջել ընդ քեզ առն, եթէ չիցես յանցուցեալ պղծեալ առ արամբ քո, քաւեալ լիջիր ի ջրոյդ յանդիմանութեան նզովիդ այդորիկ:

20. ապա թէ յանցուցեալ իցես առ արամբ քով, կամ պղծեալ իցէս. եւ տուեալ իցէ ուրուք զաւրութիւն իւր ի քեզ, առանց առն քո:

21. Եւ երդմնեցուսցէ քահանայն զկինն` երդմամբք նզովիս այսորիկ. եւ ասասցէ քահանայն ցկինն. Տացէ քեզ Տէր ի նզովս եւ ի յերդումն ի մէջ ժողովրդեան քո, ի տալ Տեառն զբարձս քո ի քակումն, եւ յորովայն քո յոռուցեալումն:

22. եւ մտցէ ջուրս նզովեալ յորովայն քո, ուռուցանել զմէջ քո, եւ քակել զբարձս ձեր: եւ ասասցէ կինն. Եղիցի եղիցի:

23. Եւ գրեսցէ քահանայն զնզովս զայսոսիկ ի մատենի. եւ լուասցէ զջուրն յանդիմանութեան նզովից:

24. եւ տացէ ըմպել կնոջն զջուրն յանդիմանութեան, եւ մտցէ ի նա ջուրն յանդիմանութեան նզովեալ:

25. Եւ առցէ քահանայն ի ձեռանէ կնոջն զզոհ նախանձաւորութեան, եւ դիցէ զզոհն առաջի Տեառն. եւ մատուսցէ առ սեղանն:

26. եւ առցէ բռամբ քահանայն ի զոհէ յիշատակի նորա, եւ հանցէ զայն ի սեղանն. եւ ապա արբուսցէ կնոջն զջուրն:

27. Եւ եղիցի եթէ պղծեալ իցէ` եւ ծածկելով ծածկեալ իցէ յառնէ նորա. եւ մտանիցէ ի նա ջուրն յանդիմանութեան նզովեալ. ուռուսցէ զորովայն նորա, եւ քակեսցին բարձք նորա. եւ եղիցի կինն նզովս ի մէջ ժողովրդեան իւրոյ:

28. Ապա թէ չիցէ պղծեալ կինն` եւ սուրբ իցէ, քաւեալ լիցի` եւ ընկալցի սերմն:

29. Այս աւրէն իցէ նախանձաւորութեան, որոյ յանցեալ իցէ կին` որոյ առնակին իցէ եւ պղծիցէ:

30. կամ այր յորոյ վերայ հասանիցէ ոգի նախանձու, եւ ի նախանձ մտանիցէ ընդ կնոջ իւրում: Կացուսցէ զկինն առաջի Տեառն, եւ արասցէ նմա քահանայն ըստ ամենայնի աւրինիս այսորիկ.

31. եւ քաւեալ լիցի այրն ի մեղաց անտի. եւ կինն ընկալցի զմեղս իւր: