1. Եւ խաւսեցաւ տէր ընդ Մովսեսի եւ ասէ
2. Խաւսեաց ընդ Ահարովնի եւ ասասցես ցնա: Յորժամ դնիցես զճրագունսն ի միոջէ կողմանէ երեսաց աշտանակին, լուցանիցին եւթանեքին ճրագարանքն:
3. Եւ արար այնպէս Ահարովն: ի միոջէ կողմանէ հանդէպ աշտանակին ելոյց զճրագարանս նորա. որպէս հրամայեաց Տէր Մովսեսի:
4. Եւ այս էր կազմած աշտանակին: ձոյլ ոսկի բուն նորա. եւ շուշանք նորա ձոյլ համակ ոսկի, ըստ աւրինակին որպէս եցոյց Տէր Մովսեսի` զաշտանակն այնպէս արար:
5. Եւ խաւսեցաւ Տէր ընդ Մովսեսի` եւ ասէ.
6. Առ դու զՂեւտացիսն ի միջոյ որդւոցն Իսրայէղի եւ սրբեսցես զնոսա.
7. եւ այսպէս արասցես նոցա զսրբութիւն իւրեանց: Ցանեսցես զնոքաւք ջուր սրբութեան. եւ ածցի ածեալ ի վերայ ամենայն մարմնոյ նոցա, եւ լուասցեն զձորձս իւրեանց, եւ սուրբք եղիցին:
8. Եւ առցեն զուարակ մի յանդւոյ, եւ ըստ նմին զոհ նաշիհ զանգեալ իւղով: եւ առցես որթ տարեւոր յանդւոյ վասն մեղաց.
9. եւ տարցիս զՂեւտացիսն առաջի խորանին վկայութեան, եւ ժողովեսցես զամենայն ժողովուրդ որդւոցն Իսրայէղի.
10. եւ մատուսցես զՂեւտացիսն առաջի Տեառն. եւ դիցեն որդիքն Իսրայէղի զձեռս իւրեանց ի վերայ Ղեւտացւոցն:
11. Եւ զատցէ Ահարովն զՂեւտացիսն ի հատուցումն առաջի Տեառն յորդւոցն Իսրայէղի. եւ եղիցին գործել զգործ խորանին Տեառն:
12. Եւ եղեւտացիքն դիցեն զձեռս իւրեանց ի վերայ գլխոյ զուարակացն. եւ արասցես զմին վասն մեղաց, եւ զմին յողջակէզ Տեառն քաւել վասն նոցա:
13. եւ կացուսցես զՂեւտացիսն առաջի Տեառն, եւ առաջի Ահարովնի, եւ առաջի որդւոց նորա. եւ տացես զնոսա հատուցումն առաջի Տեառն:
14. եւ զատուսցես զՂեւտացիսն ի միջոյ որդւոցն Իսրայէղի, եւ եղիցին ինձ:
15. Եւ ապա մտցեն Ղեւտացիքն գործել զգործ խորանին վկայութեան. եւ սրբեսցես զնոսա, եւ տացես զնոսա հատուցումն առաջի Տեառն.
16. զի ի հատուցումն հատուցեալ են նոքա ինձ ի միջոյ որդւոցն Իսրայէղի. փոխանակ ամենայն անդրանկաց որ բանան զամենայն արգանդ յորդւոցն Իսրայէղի. առի զնոսա ինձ:
17. Զի իմէնայն անդրանիկ որդւոցն Իսրայէղի, ի մարդոյ մինչչեւ յանասուն. յաւուր յորում հարի զամենայն անդրանիկ յերկրին Եգիպտացւոց, եւ սրբեցի զնոսա ինձ,
18. եւ առի զՂեւտացիսն փոխանակ ամենայն անդրանկաց որդւոցն Իսրայէղի:
19. Եւ ետու զՂեւտացիսն հատուցումն տուեալս` Ահարովնի եւ որդւոց նորա ի միջւոյ որդւոցն Իսրայէղի, գործել զգործ որդւոցն Իսրայէղի ի խորանին վկայութեան. եւ քաւել վասն որդւոցն Իսրայէղի մերձանալով ի սրբութիւնսն:
20. Եւ արարին Մովսէս եւ Ահարովն, եւ ամենայն ժողովուրդ որդւոցն Իսրայէղի Ղեւտացւոցն` որպէս պատուիրեաց Տէր Մովսեսի վասն Ղեւտացւոցն, նոյնպէս արարին նոցա որդիքն Իսրայէղի:
21. Եւ սրբեցան Ղեւտացիքն, եւ լուացին զհանդերձս, եւ ետուն զանձինս Ահարովնի ի հատուցումն առաջի Տեառն. եւ քաւեաց վասն նոցա Ահարովն սրբել զնոսա:
22. Եւ ապա մտին Ղեւտացիքն պաշտել զպաշտաւն խորանին վկայութեան, առաջի Ահարովնի եւ առաջի որդւոց նորա. որպէս պատուիրեաց Տէր Մովսեսի վասն Ղեւտացւոցն. նոյնպէս եւ արարին նոցա:
23. Եւ խաւսեցաւ Տէր ընդ Մովսեսի` եւ ասէ.
24. Այս ինչ է որ վասն Ղեւտացւոցն իցէ: ի քսան եւ ի հինգ ամենից եւ ի վեր, մտցեն գործել ի խորանին վկայութեան.
25. եւ ի յսնամենից ի բաց կացցեն ի պաշտամանէն` եւ ոչ եւս գործիցեն.
26. եւ պաշտեսցէ եղբայր նորա ի խորանին վկայութեան: պահել զպահպանութիւնսն, բայց գործ ինչ` մի գործեսցէ: այնպէս արասցես Ղեւտացւոցն ի պահպանութիւնս իւրեանց:
Հաղորդում կայքում սխալի վերաբերյալ
Տվյալ հատվածում առկա է սխալ: