Գլուխ 1

1. Եւ նշկահեաց Մովաբ զԻսրայէլ յետ մեռանելոյն Աքաաբու:

2. Եւ անկաւ Ոքոզիա ի վանդակապատէ վերնատանն իւրոյ ի Սամարիա եւ խաւթացաւ: եւ առաքեաց հրեշտակս, եւ ասէ ցնոսա. Երթայք հարցէք ի Բահաղ զՃանճիկ աստուածն Ակկարոնի, թէ ապրիցե՞մ ես յախտէ աստի յայսմանէ. եւ գնացին հարցանել ի նմանէ:

3. Եւ հրեշտակ Տեառն կոչեաց զԵղիա Թեզբացի եւ ասէ. Արի երթ ընդ առաջ հրեշտակացն Ոքոզեայ արքայի Սամարեայ, եւ ասասցես ցնոսա. Առ ի չգոյէ՞ Աստուծոյ ի մէջ Իսրայէլի երթայք դուք հարցանել ի Բահաղ զՃանճիկ աստուածն Ակկարոնի:

4. ոչ այդպէս: այլ այսպէս ասէ Տէր. Ի մահիճսդ յոր ելեր` ոչ իջցես այտի, այլ ի դմին` մահու մեռցիս: եւ չոգաւ Եղիա, եւ ասէ ցնոսա:

5. Եւ դարձան հրեշտակքն առ նա: եւ ասէ ցնոսա. Զի՞ է զի դարձարուք:

6. եւ ասեն ցնա. Այր մի ել ընդ առաջ մեր, եւ ասէ ցմեզ. երթայք դարձարուք առ արքայն` որ առաքեացն զձեզ, եւ ասասջիք ցնա. այսպէս ասէ Տէր, առ ի չգոյէ՞ Աստուծոյ ի մէջ Իսրայէլի` երթաս հարցանել ի Բահաղ զՃանճիկ աստուածն Ակկարոնի: ոչ այդպէս. այլ ի մահիճսդ յոր ելեր` ոչ իջցես այտի, այլ մահու մեռցիս:

7. Եւ խաւսեցաւ ընդ նոսա` եւ ասէ. Զի՞նչ նշանք են առնն որ ել ընդ առաջ ձեր, եւ խաւսեցաւ ընդ ձեզ զբանսդ զայդոսիկ:

8. Եւ ասեն ցնա. Այր թաւարծի, եւ գաւտի մաշկեղէն ածեալ ընդ մէջ իւր: եւ ասէ. Եղիա Թեզբացի է այն:

9. Եւ առաքեաց առ նա իշխան յիսնապետ, եւ զյիսունս նորա: եւ ել եւ եկն առ նա: եւ Եղիա նստէր ի վերայ գլխոյ լերինն. եւ խաւսեցաւ յիսնապետն` եւ ասէ ցնա. Այրդ Աստուծոյ, արքայ կոչեաց զքեզ` էջ այտի:

10. Պատասխանի ետ Եղիա եւ ասէ ցյիսնապետն. Եթէ այր Աստուծոյ իցեմ ես` իջցէ հուր յերկնից` եւ կերիցէ զքեզ եւ զյիսունսդ քո: եւ էջ հուր յերկնից, եւ եկեր զնա եւ զյիսունս նորա:

11. Եւ յաւել արքայ առաքել առ նա այլ յիսնապետ եւ զյիսունս նորա: եւ ել եւ խաւսեցաւ յիսնապետն` եւ ասէ ցնա. Այրդ Աստուծոյ, այսպէս ասէ արքայ` էջ այտի վաղվաղակի:

12. Պատասխանի ետ Եղիա` եւ ասէ ցնա. Եթէ այր Աստուծոյ իցեմ, իջցէ հուր յերկնից եւ կերիցէ զքեզ եւ զյիսունս քո: եւ էջ հուր Աստուծոյ յերկնից` եւ եկեր զնա եւ զյիսունս նորա:

13. Եւ յաւել եւս արքայ առաքել յիսնապետ երրորդ եւ զյիսունս նորա: եւ ել եկն առ նա յիսնապետն երրորդ, եւ անկաւ ի վերայ ծնգաց իւրոց առաջի Եղիայի` եւ աղաչեաց զնա, եւ խաւսեցաւ ընդ նմա եւ ասէ. Այրդ Աստուծոյ, պատուեսցի անձն իմ, եւ անձինք ծառայից քոց այսոցիկ յիսնիցս առաջի աչաց քոց.

14. զի ահա անկաւ հուր յերկնից, եւ եկեր զերկուս յիսնապետսն զառաջինսն, եւ զյիսունս նոցա: եւ արդ` պատուեսցին անձինք ծառայից քոց յաչս քո:

15. Եւ խաւսեցաւ հրեշտակ Տեառն ընդ Եղիայ եւ ասէ. Էջ ընդ դմա, եւ մի երկնչիցիս յերեսաց նոցա: Յարեաւ Եղիա, եւ էջ ընդ նմա առ արքայ.

16. եւ խաւսեցաւ ընդ նմա` եւ ասէ. Փոխանակ զի առաքեցեր հրեշտակս հարցանել ի Բահաղ զՃանճիկ աստուածն Ակկարոնի ¡: որպէս առ ի չգոյէ Աստուծոյ ի մէջ Իսրայէլի ի հարցանել ի նմանէ: ո՞չ այդպէս, այլ ի մահիճսդ յոր ելեր` մի իջցես այտի, այլ մահու մեռցիս:

17. եւ մեռաւ ըստ բանին Տեառն զոր խաւսեցաւ Եղիա: Եւ Յովրամ որդի Աքաաբու թագաւորէ ի վերայ Իսրայէլի ի Սամարիա ամս երկոտասան, յամի ութուտասներորդի Յովսափատայ արքայի Յուդայ. եւ արար չար առաջի Տեառն, բայց ոչ իբրեւ զեղբարս իւր, եւ ոչ իբրեւ զմայր իւր: Եւ եբարձ զարձանսն Բահաղու զոր արար հայր նորա` եւ խորտակեաց զնոսա. սակայն ի մեղս տանն Յերոբովամայ որ յանցոյցն զԻսրայէլ` յարեցաւ, եւ ոչ մեկնեցաւ ի նոցանէն: եւ սրտմտեցաւ բարկութեամբ Տէր ի վերայ տան Աքաաբու: Եւ թագաւորեաց Յովրամ եղբայր նորա ընդ նորա, յամի երկրորդի Յովրամայ արքայի Յուդայ` որդւոյ Յովսափատու, զի ոչ գոյր նորա որդի:

18. Եւ մնացորդք բանիցն Ոքոզեայ եւ ամենայն ինչ զոր արար, ո՞չ աւանիկ գրեալ են ի գիրս բանից աւուրց թագաւորացն Իսրայէլի: