Գլուխ 12

1․ Յամին եւթներորդի Յէուայ թագաւորեաց Յովաս. եւ քառասուն ամ թագաւորեաց յԵրուսաղէմ: եւ անուն մաւր նորա Սաբիա ի Բերսաբէէ:

2․ եւ արար Յովաս ուղղութիւն առաջի Տեառն զամենայն աւուրս զորս լուսաւորեաց զնա Յովիդայէ քահանայ:

3․ Բայց ի բարձանցն ոչ մեկնեցան. եւ անդ տակաւին զոհէր ժողովուրդն, եւ արկանէր խունկս ի բարձունսն:

4․ Եւ ասէ Յովաս ցքահանայսն. Զամենայն արծաթ սրբութեանցն մտեալ ի տուն Տեառն`
արծաթ` իւրաքանչիւր առն անցելոյ ի համարի ոգւոց, զամենայն արծաթ որ անկանիցի ի սիրտ մարդոյ բերել ի տուն Տեառն.

5․ առցեն յիւրեանս քահանայքն, այր իւրաքանչիւր ի վաճառէ իւրեանց. եւ նոքա կազմեսցեն զԲեդեկ տանն Տեառն. յամենայն իմիք ուր գտանիցի անդ Բեդեկ:

6․ Եւ եղեւ ի քսաներորդի եւ յերկրորդի ամի Յովասու արքայի` ոչ կազմեցին քահանայքն զԲեդեկ տանն Տեառն:

7․ Եւ կոչեաց արքայ Յովաս զՅովիդայէ քահանայ, եւ զքահանայսն` եւ ասէ ցնոսա. Ընդէ՞ր ոչ կազմեցէք զԲեդեկ տանն Տեառն: եւ արդ` մի եւս առնուցուք արծաթ յամենայն վաճառացն ձերոց, այլ ի Բեդեկ տանն Տեառն տաջիք զայն:

8․ Եւ ուխտեցին քահանայքն չառնուլ արծաթ ի ժողովրդենէն, եւ ոչ կազմել զԲեդեկ տանն:

9․ Եւ առ Յովիդայէ քահանայ տապանակ մի` եւ ծակեաց ծակ ի բերան նորա, եւ եդ զնա ի կողմանէ սեղանոյն Տեառն. եւ ետուն քահանայքն` որ պահէին զդուռնն` զամենայն արծաթ գտեալ ի տանն Տեառն:

10․ Եւ եղեւ իբրեւ ետես թէ բազում է ի տապանակի անդ, ել դպրապետն արքունի` եւ քահանայն մեծ. եւ պնդեցին զարծաթն գտեալ ի տան Տեառն:

11․ եւ ետուն զարծաթն եւ զպատրաստեալն ի ձեռս գործելեաց զգործս կահու տանն Տեառն: եւ ետուն ցհիւսունս
փայտից` եւ ցշինաւղս գործել ի տան Տեառն.

12․ եւ ցնկարիչս` եւ ցճարտարս` եւ ցքարակոփս քարանց դնել փայտ եւ քարս տաշեալս, կազմել զԲեդեկ տան Տեառն. յամենայն ինչ յոր ելանիցէ ի տունն կազմել:

13․ Բայց զի մի լինիցին տանն Տեառն դրունք արծաթիք, եւ բեւեռք, եւ տաշտք, եւ փողք. ամենայն անաւթ ոսկի  եւ անաւթ արծաթի`  յարծաթոյ մտելոյ ի տուն Տեառն.

14․ այլ զի գործաւնաց գործոյն տացեն զայն, եւ կազմեսցեն զտունն Տեառն:

15․ Եւ ոչ առնէին համար արանցն յորոց ձեռս տային զարծաթն, տալ գործաւորաց գործոյն, զի յաւատ գործէին:

16․ եւ արծաթ վասն մեղաց եւ վասն յանցանաց` ոչ մտանէր ի տուն Տեառն, այլ քահանայիցն լինէր:

17․ Յայնժամ ել Ազայէլ արքայ ասորւոց, եւ ետ պատերազմ ընդ Գեթայ` եւ առ զնա: եւ եդ Ազայէլ զերեսս իւր
ելանել ի վերայ Երուսաղէմի:

18․ Եւ առ Յովաս արքայ Յուդայ զամենայն զսրբութիւնսն զոր սրբեաց Յովսափատ, եւ Յովրամ, եւ Ոքոզիա հարք նորա, եւ թագաւորք Յուդայ, եւ զիւր սրբութիւնսն, եւ զամենայն արծաթ գտեալ ի գանձս տան Տեառն` եւ ի տան թագաւորին. եւ առաքեաց Ազայելի արքայի ասորւոց, եւ գնաց յԵրուսաղէմէ:
19․ Եւ մնացորդք բանիցն Յովասու, եւ ամենայն ինչ զոր արար. ո՞չ աւանիկ գրեալ են ի գիրս բանից աւուրց թագաւորացն Յուդայ:

20․ Եւ յարեան ծառայք նորա, եւ եդին նմա դաւաճանութիւն, եւ հարին զՅովաս ի տան Մաալոնայ բնակեալ ի Գաղաադ:

21․ եւ Յովաքազար որդի Յեմաւութայ` եւ Յեզեբութ որդի նորա, պանտանդք ծառայք նորա` հարին զնա եւ սպանին. եւ թաղեցին զնա ընդ հարս իւր ի քաղաքի Դաւթի: եւ թագաւորեաց Ամեսսիա որդի նորա ընդ նորա: