Գլուխ 14

1․ Եւ իմացաւ Յովաբ` որդի Շարուհեայ, եթէ է սիրտ արքայի ի վերայ Աբեսողոմայ.

2․ առաքեաց Յովաբ ի Թեկուէ, եւ առ անտի կին մի իմաստուն. եւ ասէ ցնա. Սուգ առ եւ զգեցիր հանդերձ սգոյ. մի աւծանիցիս իւղով, եւ եղիցես իբրեւ զկին մի սգացեալ ի վերայ բազմաւրեայ մեռելոյ.

3․ եւ եկեսցես առ արքայ, եւ խաւսեսցիս ընդ նմա ըստ բանիս ըստ այսմիկ: եւ եդ Յովաբ` բանս ի բերան նորա:

4․ Եւ եմուտ կինն թեկուացի առ արքայ, եւ անկաւ ի վերայ երեսաց իւրոց ի գետին` եւ ասէ. Ապրեցո զիս արքայ ապրեցո:

5․ Եւ ասէ ցնա արքայ. Զի՞ է քեզ: եւ նա ասէ. Կարի իսկ տագնապ է ինձ. կին մի այրի եմ ես. մեռաւ այր իմ.

6․ եւ աղախնոյ քոյ երկու որդիք էին, մարտեան ընդ միմեանս երկոքեան յանդի. եւ ոչ ոք էր որ համոզէր ի մէջ նոցա, եւ եհար մին զմիւս եղբայրն եւ սպան զնա:

7․ Եւ ահա յարուցեալ է ամենայն ազգն ի վերայ աղախնոյ քոյ. ասեն. Տուր զսպանաւղն եղբաւր իւրոյ, եւ սպանցուք զնա փոխանակ անձին եղբաւր իւրոյ, եւ բարձցուք զժառանգակալն քո. եւ շիջուցանեն զկայծակն իմ զմնացեալ, առ ի չթողլոյ առն իմում մնացորդ եւ անուն ի վերայ երեսաց երկրի:

8․ Եւ ասէ արքայ. Երթ ողջամբ ի տուն քո. եւ ես պատուիրեցից վասն քո:

9․ եւ ասէ կինն թեկուացի. Յիմ վերայ արքայ անաւրէնութիւնն, եւ ի վերայ տան հաւր իմոյ. եւ արքայ եւ աթոռ իւր քաւեալ:

10․ Եւ ասէ արքայ. Ո՞վ է որ խաւսեսցի ընդ քեզ. եւ ածցես զնա առ իս` եւ ոչ եւս մերձեսցի առ քեզ:

11․ Եւ ասէ. Յիշեսցէ արքայ զտէր Աստուած իւր, ի յաճախել մերձաւորի արեանն ապականել. մի ջնջեսցեն զորդեակն իմ: եւ ասէ Դաւիթ. Կենդանի է Տէր եթէ անկցի ի հերոյ որդւոյ քոյ մազ մի ի գետին:

12․ Եւ ասէ կինն. Խաւսեսցի աղախին քո առաջի տեառն իմոյ արքայի բան մի: եւ ասէ. Խաւսեաց:

13․ Եւ ասէ կինն. Ընդէր՞ խորհեցար այդպիսի ինչ ի վերայ ժողովրդեանն Աստուծոյ. կամ թէ ի բերանոյ արքայի՞ իցէ բանն այն վնասու` չդարձուցանել արքայի զմերժեալն յիւրմէ,

14․ զի մահու մեռանիցի. եւ իբրեւ զջուր հեղեալ յերկիր ոչ ամփոփիցի. եւ ոչ առնուցու Աստուած զոգին. եւ խորհիցի ոք մերժել յինքենէ զմերժեալն:

15․  Եւ արդ` եկի խաւսել առ արքայի տեառն իմոյ զբանս զայս. զի տեսանիցէ զիս ժողովուրդն եւ ասիցէ. թէ Աղախին քո խաւսեցաւ ընդ արքայի, թերեւս արասցէ արքայ զբան աղախնոյ իւրոյ:

16․ զի լուիցէ արքայ եւ փրկեսցէ զիս ի ձեռաց առնն, որ խնդրէ ջնջել եւ զիս` եւ զորդի իմ ի ժառանգութենէ Աստուծոյ:

17․ Եւ ասէ կինն. Եղիցի բան տեառն իմոյ արքայի ի զոհս: զի իբրեւ զհրեշտակ Աստուծոյ այնպէս է տէր իմ արքայ ի լսել զբարի եւ զչար. եւ տէր Աստուած քո եղիցի ընդ քեզ:

18․ Եւ պատասխանի ետ արքայ` եւ ասէ ցկինն. Մի թաքուցաներ յինէն զբան զոր ես հարցից քեզ: եւ ասէ կինն. Խաւսեսցի տէր իմ արքայ:

19․ Եւ ասէ արքայ. Միթէ ձեռն Յովաբայ իցէ յամենայնի յայդմիկ ընդ քեզ: եւ ասէ կինն ցարքայ. Կենդանի է անձն քո տէր իմ արքայ, եթէ իցէ յաջ կամ յահեակ յամենայնէ զոր խաւսեցաւ տէր իմ արքայ. զի ծառայ քո Յովաբ` նա պատուիրեաց ինձ, եւ նա եդ ի

բերան աղախնոյ քոյ զամենայն բանս զայսոսիկ,

20․  վասն բոլորելոյ յերեսաց բանիս այսորիկ` զոր արար ծառայ քո Յովաբ զբանս զայսոսիկ. եւ տէր իմ իմաստուն է ըստ իմաստութեան հրեշտակի Աստուծոյ` գիտել զամենայն ինչ որ յերկրի:

21․ Եւ ասէ արքայ ցՅովաբ. Ահաւասիկ արարի քեզ ըստ բանի քում ըստ այսմիկ. երթ դարձո, ած զպատանեակն զԱբեսողոմ:

22․ Եւ անկաւ Յովաբ ի վերայ երեսաց իւրոց յերկիր, եւ երկիր եպագ նմա, եւ աւրհնեաց զարքայ: եւ ասէ Յովաբ. Այսաւր գիտաց ծառայ քո եթէ գտի շնորհս յաչս քո` տէր իմ արքայ զի արար տէր իմ արքայ զբան ծառայի իւրոյ:

23․  Եւ յարեաւ Յովաբ եւ գնաց ի Գեթսուր, եւ ած զԱբեսողոմ յԵրուսաղէմ: 24   Եւ ասէ արքայ. Դարձցի ի տուն իւր, եւ զերեսս իմ մի տեսցէ: եւ դարձաւ Աբեսողոմ ի տուն իւր, եւ զերեսս արքայի ոչ ետես:

25․ Եւ իբրեւ զԱբեսողոմ ոչ գոյր յամենայն Իսրայէլի, այր գեղեցիկ գովելի յոյժ. ի թաթից ոտից իւրոց մինչչեւ ի գլուխ իւր ոչ գոյր ի նմա արատ:

26․ եւ ի փոքրել զհերս իւր` լինէր ի սկսանելոյ աւուրց յաւուրս փոքրել, զի կարի ծանրանայր ի վերայ նորա: եւ յորժամ փոքրէր, կշռէր զհեր գլխոյ իւրոյ երկերիւր սիկղ ըստ արքունական սկեղ:

27․ Եւ ծնան Աբեսողոմայ երեք ուստերք` եւ դուստր մի եւ անուն նորա Թամար. եւ նա էր կին գեղեցիկ յոյժ տեսլեամբ: եւ եղեւ կին Ռոբովամայ որդւոյ Սողոմոնի, եւ ծնաւ նմա զԱբիա:

28․ Եւ նստաւ Աբեսողոմ յԵրուսաղէմ աւուրս ամսոց երկուց, եւ զերեսս արքայի ոչ ետես:

29․ եւ առաքեաց Աբեսողոմ առ Յովաբ յղել զնա առ արքայ, եւ ոչ կամեցաւ երթալ առ նա. եւ առաքեաց երկրորդ անգամ առ նա, եւ ոչ կամեցաւ երթալ:

30․ Եւ ասէ Աբեսողոմ ցծառայս իւր. Գիտէք զի վիճակ գետնոյ Յովաբայ լի գարւով մաւտ է առ իս, երթայք այրեցէք զնա հրով. եւ այրեցին ծառայքն Աբեսաղոմայ զվիճակն Յովաբայ հրով: Եւ եկին ծառայքն Յովաբայ առ նա պատառեալ զհանդերձս իւրեանց` եւ ասեն. Այրեցին ծառայքն Աբեսաղոմայ զվիճակն հրով:

31․ Եւ յարեաւ Յովաբ եւ եկն առ Աբեսաղոմ ի տուն` եւ ասէ ցնա. Ընդէ՞ր այրեցին ծառայք քո զվիճակն իմ հրով:

32․ Եւ ասէ Աբեսաղոմ ցՅովաբ. Յղեցի առ քեզ եւ ասեմ. եկ այսր յղեցից զքեզ առ արքայ ասել` թէ ընդէ՞ր եկի ի Գէթսուրայ. լաւ էր ինձ տակաւին անդ լինել, քան ոչ տեսանել զերեսս արքայի. եւ թէ վնաս ինչ կայցէ յիս` սպան զիս:

33․ Եւ եմուտ Յովաբ առ արքայ` եւ պատմեաց նմա: եւ կոչեաց զԱբեսաղոմ. եւ եմուտ առ արքայ, եւ երկիր եպագ նմա, եւ անկաւ ի վերայ երեսաց իւրոց առաջի արքայի: եւ համբուրեաց արքայ զԱբեսաղոմ: