1․ Յամի երկոտասաներորդի Աքազու արքայի Յուդայ, թագաւորեաց Ովսէէ որդի Ելայ ի վերայ Իսրայէլի ի Սամարիա ամս ինն:
2․ եւ արար չար առաջի Տեառն, բայց ոչ իբրեւ զթագաւորսն Իսրայէլի որ էին յառաջ քան զնա:
3․ Ի վերայ նորա ել Սաղմանասար արքայ Ասորեստանեաց. եւ եղեւ նորա Ովսէէ ծառայ, եւ տայր տանել նմա Մաննայ:
4․ Եւ եգիտ արքայ Ասորեստանեաց Յովսէէ վնաս. զի առաքեաց հրեշտակս առ Սովա արքայ եգիպտացւոց, եւ ոչ ետ Մաննա արքային Ասորեստանեաց ի տարւոջն յայնմիկ: եւ պաշարեաց զնա արքայն Ասորեստանեաց, եւ կապեաց զնա ի տան բանտի:
5․ Եւ ել արքայն Ասորեստանեաց յամենայն երկիրն. ել եւ ի Սամարիա, եւ պաշարեաց զնա ամս երիս:
6․ Յամին իններորդի Ովսեայ` առ արքայ Ասորեստանեաց զՍամարիա. եւ խաղացոյց զԻսրայէլ յԱսորեստանեայս, եւ բնակեցոյց զնոսա յԱլաթ, եւ յԱբովր, եւ զգետովն Գովղանայ, եւ զլերամբքն մարաց:
7․ Եւ եղեւ իբրեւ մեղան որդիքն Իսրայէլի տեառն Աստուծոյ իւրեանց որ եհան զնոսա յերկրէն եգիպտացւոց` ի ձեռաց փարաւոնի արքայի եգիպտացւոց, եւ երկեան յաստուածոց աւտարաց:
8․ եւ գնացին ըստ կրաւնից ազգացն զորս եբարձ Տէր յերեսաց որդւոցն Իսրայէլի: Եւ թագաւորքն Իսրայէլի որչափ ինչ արարին`
9․ եւ որչափ ինչ պաճուճեցին որդիքն Իսրայէլի. բայց ոչ այնպէս ինչ զտեառնէ աստուծոյ իւրեանց: եւ շինեցին իւրեանց բարձունս յամենայն քաղաքս իւրեանց, յաշտարակէ պահապանացն մինչչեւ ի քաղաքն ամուր:
10․ եւ կանգնեցին իւրեանց արձանս եւ անտառս յամենայն բլուրս բարձունս, եւ ի ներքոյ ամենայն անտառախիտ ծառոց:
11․ եւ արկին խունկս յամենայն բարձունս, իբրեւ զամենայն ազգսն զորս մերժեաց Տէր յերեսաց նոցա: Արարին զովաւղս, եւ ընկերշակեցին առ ի բարկացուցանելոյ զՏէր:
12․ եւ պաշտեցին զկուռս, որովք ասաց նոցա Տէր, թէ մի առնիցէք զբանդ զայդ Տեառն:
13․ Եւ եդ վկայութիւն Տէր ընդ Իսրայէլի եւ ընդ Յուդայ ի ձեռն ամենայն մարգարէիցն իւրոց, եւ ամենայն տեսանողացն իւրոց, եւ ասէ. Դարձարուք ի ճանապարհաց ձերոց չարաց, եւ պահեցէք զպատուիրանս իմ եւ զիրաւունս իմ, եւ զամենայն աւրէնս զոր պատուիրեցի հարց ձերոց, զորս առաքեցի առ ձեզ ի ձեռն ծառայից իմոց մարգարէից:
14․ Եւ ոչ լուան նոցա, եւ խստացուցին զողն իւրեանց քան զողն հարց իւրեանց, եւ ոչ հաւատացին ի տէր Աստուած իւրեանց:
15․ եւ ընկեցին ի բաց զհաստատութիւնս իւրեանց, եւ զդաշինսն զոր կռեաց ընդ հարս նոցա, եւ զվկայութիւնս նորա զոր ուխտեաց նոցա ոչ պահեցին. եւ գնացին զհետ սնոտեաց, եւ սնոտեցան զհետ ազգացն որ շուրջ զնոքաւք. յորոց պատուիրեաց նոցա Տէր չառնել ըստ նմին աւրինակի:
16․ Թողին զամենայն պատուիրանսն տեառն Աստուծոյ իւրեանց, եւ արարին իւրեանց ձուլածոյս երկուս երինջս, եւ երկիր պագին զաւրութեան երկնից, եւ պաշտեցին զԲահաղ.
17․ եւ անցուցին զուստերս եւ զդստերս իւրեանց ընդ հուր, եւ դիւթեցին դիւթութիւնս, եւ հմայեցին հմայս. եւ համարձակեցան առնել չար առաջի Տեառն առ ի բարկացուցանելոյ զնա:
18․ Եւ բարկացաւ Տէր յոյժ Իսրայէլի, եւ մերժեաց զնոսա յերեսաց իւրոց. եւ ոչ մնաց` բայց միայն ցեղն Յուդայ:
19․ սակայն եւ Յուդայ` ոչ պահեցին զպատուիրանս տեառն Աստուծոյ իւրեանց, եւ գնացին ըստ կրաւնիցն Իսրայէլի զոր արարին.
20․ եւ մերժեցին զՏէր յամենայն զաւակէն Իսրայէլի: եւ շարժեաց զնոսա` եւ ետ զնոսա ի ձեռս աւարառուաց իւրեանց, մինչչեւ ընկէց զնոսա յերեսաց իւրոց:
21․ Սակայն Իսրայէլ առ տամբն իսկ Դաւթի թագաւորեցուցին զՅերոբովամ որդի Նաբատայ. եւ մերժեաց Յերոբովամ զԻսրայէլ ի գնացից Տեառն, եւ մեղոյց զնոսա մեղանս մեծամեծս:
22․ եւ արարին որդիքն Իսրայէլի ըստ ամենայն մեղաց Յերոբովամու զոր արար. եւ ոչ մերժեցան ի նոցանէն,
23․ մինչչեւ փոխեաց Տէր զԻսրայէլ յերեսաց իւրոց, որպէս եւ խաւսեցաւ Տէր ի ձեռն ամենայն ծառայից իւրոց մարգարէից. եւ վարեցաւ Իսրայէլ յերկրէ իւրմէ յԱսորեստանեայս մինչչեւ ցայսաւր:
24․ Եւ ած արքայն Ասորեստանեաց ի Բաբելոնէ, եւ ի Քութայ, եւ յԱյայ, եւ յԵմաթայ, եւ ի Սեփարուիմայ, եւ բնակեցան ի քաղաքս Սամարեայ փոխանակ որդւոցն Իսրայէլի, եւ ժառանգեցին զՍամարիա, եւ բնակեցին ի քաղաքս նորա:
25․ Եւ եղեւ ի սկզբան բնակութեան նոցա անդ, ոչ երկեան ի Տեառնէ. եւ առաքեաց Տէր առեւծս, եւ կոտորէին զնոսա:
26․ եւ խաւսեցան ընդ արքային Ասորեստանեաց եւ ասեն. Ազգքն զոր փոխեցեր` եւ նստան փոխանակաւ ի քաղաքս Սամարեայ, ոչ գիտեն զկրաւնս Աստուծոյ երկրին, եւ առաքեաց Տէր ի նոսա առեւծս, եւ ահա կոտորեն զնոսա. քանզի ոչ գիտեն զկրաւնս Աստուծոյ երկրին:
27․ Եւ հրաման ետ արքայն Ասորեստանեաց` եւ ասէ. Տարայք անդր զմիոք ի քահանայիցն գերելոց անտի` զի երթեալ բնակեսցէ անդ, եւ ցուցցէ զկրաւնս Տեառն, եւ լուսաւորեսցէ զնոսա իրաւամբք Աստուծոյ երկրին:
28․ Եւ տարան զմի ի քահանայիցն զոր գերեցին ի Սամարեայ. եւ նստաւ ի Բեթէլ, եւ լուսաւորէր զնոսա, զի երկնչիցին ի Տեառնէ:
29․ Եւ արարին ազգք ազգք աստուածս իւրեանց, եւ եդին ի տունս բարձանցն զոր արարին սամարացիքն. իւրաքանչիւր ազգքն ի քաղաքս իւրեանց յորս ինքեանք բնակէին:
30․ Եւ արք Բաբելոնի արարին զՍոքքովթ եւ զԲանովթ, եւ արք Քութայ` արարին զԱնգեղ, եւ արք Եմաթայ` արարին զԱսիմաթ.
31․ եւ այիացիք արարին` զԱբղազեր, եւ զՆեբաս, եւ զԹարթակ, եւ զՍեփարուիմ, ուր այրէին զորդիս իւրեանց ի հուր` Ադրամելեքայ, եւ Ամելեքայ` աստուածոց Սեփարուիմայ:
32․ եւ երկնչէին ի Տեառնէ. եւ բնակեցուցին զգարշելիսն իւրեանց ի տունս բարձանցն զոր արարին ի Սամարիա իւրաքանչիւր ազգաց յորում բնակէին: Եւ երկնչէին ի Տեառնէ, եւ արարին իւրեանց քուրմս բարձանց:
33․ եւ երկնչէին ի Տեառնէ, եւ պաշտէին զաստուածս իւրեանց, ըստ կրաւնից ազգացն` զորս Աստուած մերժեաց անտի:
34․ Եւ մինչչեւ ցայսաւր առնեն նոքա ըստ կրաւնից նոցա, եւ երկնչին ի Տեառնէ. եւ առնեն ըստ կրաւնից նոցա, եւ ըստ իրաւանց նոցա` եւ ըստ աւրինաց: եւ ըստ պատուիրանին զոր պատուիրեաց Տէր որդւոցն Յակոբայ, որում եդ անուն Իսրայէլ.
35․ Եւ ուխտեաց Տէր ուխտ` եւ պատուիրեաց նոցա եւ ասէ. Մի երկնչիցիք յաստուածոց աւտարաց, եւ մի երկիր պագանիցէք նոցա, եւ մի պաշտիցէք զնոսա, եւ մի զոհիցէք նոցա.
36․ այլ տեառն Աստուծոյ որ եհան զձեզ յերկրէն եգիպտացւոց մեծաւ զաւրութեամբ, եւ բարձր բազկաւ. ի նմանէ երկնչիցիք, եւ նմա երկիր պագանիցէք, եւ նմա զոհիցէք:
37․ Եւ իրաւանց եւ դատաստանաց եւ աւրինաց, եւ պատուիրանացն զորս գրեաց ձեզ` զգուշանայցէք առնել: եւ մի երկնչիցիք յաստուածոց աւտարաց:
38․ եւ զուխտն զոր ուխտեաց ընդ ձեզ` մի ցրիցէք. եւ մի երկնչիցիք յաստուածոց աւտարաց,
39․ այլ ի տեառնէ Աստուծոյ ձերմէ երկնչիջիք, եւ նա փրկեսցէ զձեզ յամենայն թշնամեաց ձերոց:
40․ եւ մի ունկնդիր լինիք կրաւնից նոցա զոր նոքա առնիցեն:
41․ Եւ երկնչէին ազգքն այնոքիկ ի Տեառնէ. եւ դրաւշելոց իւրեանց ծառայէին, եւ որդիք նոցա, եւ որդիք որդւոց նոցա, որպէս եւ արարին հարք իւրեանց` առնեն մինչչեւ ցայսաւր:
Հաղորդում կայքում սխալի վերաբերյալ
Տվյալ հատվածում առկա է սխալ: