Գլուխ 17

1․ Եւ ասէ Աքիտոփէլ ցԱբեսողոմ. Ընտրեցից ինձ երկոտասան հազար արանց, եւ յարեայց եւ պնդեցայց զհետ Դաւթի զցայգս,

2․ եւ հասից ի վերայ նորա զցայգ. եւ նա աշխատեալ է եւ լքեալ ձեռաւք, եւ զարհուրեցուցից զնա, եւ փախիցէ զաւրն որ ընդ նմա. եւ սպանից զարքայ միայն:

3․ եւ դարձուցից զամենայն զաւրն առ քեզ, զոր աւրինակ դառնայցէ հարսն առ այր իւր. բայց միայն զանձն միոյ առն խնդրիցես, եւ ամենայն զաւրն եղիցի ի խաղաղութեան:

4․ Եւ ուղիղ թուեցաւ բանն առաջի Աբեսողոմայ եւ առաջի ամենայն ծերոցն Իսրայէլի:

5․ Եւ ասէ Աբեսողոմ. Կոչեցէք զՔուսի Արաքացի, եւ լուիցուք թէ զի՞նչ կացցէ ի բերան նորա:

6․ եւ եմուտ Քուսի առ Աբեսողոմ, եւ խաւսեցաւ Աբեսողոմ ընդ նմա ըստ բանին այնորիկ` զոր խաւսեցաւ Աքիտոփէլ. եւ ասէ. թէ Արասցո՞ւք ըստ բանի նորա, ապա թէ ոչ` եւ դու խաւսեաց ինչ:

7․ Եւ ասէ Քուսի ցԱբեսողոմ. Ոչ է բարւոք խորհուրդն զոր խորհեցաւ Աքիտոփէլ այս անգամ:

8․ Եւ ասէ Քուսի. Դու ինքնին գիտես զհայր քո եւ զարս նորա. զի կարի զաւրաւորք են յոյժ, եւ դառնացեալք ոգւով իբրեւ զարջ մի որդէկոտոր ի վայրի, եւ զայրացեալ ի դաշտի. եւ հայր քո այր պատերազմաւղ, եւ ոչ տայ դուլ զաւրուն:

9․ եւ ահա ինքն ղաւղեալ իցէ ի միում ի բլրոց, կամ ի միում ուրեք ի տեղեաց. եւ եղիցի յանկանել ի վերայ նոցա զառաջինն հարկանիցէ, եւ լսիցէ որ լսիցէ, եւ ասիցէ. թէ Եղեւ խորտակումն ժողովրդեանն որ զկնի Աբիսողոմայ:

10․ Քանզի եւ նա` այր զաւրութեան է, որոյ սիրտն իբրեւ զսիրտ առիւծու հաշելով հաշիցի. զի գիտէ ամենայն Իսրայէլ թէ զաւրաւոր է հայր քո, եւ որդիք զաւրութեան որ ընդ նմայն են:

11․ Եւ այսպէս տամ քեզ խրատ. ժողովելով ժողովեսցի ամենայն այր Իսրայէլի ի Դանայ մինչչեւ ցԲերսաբեէ իբրեւ զաւազ առ եզր ծովու բազմութեամբ. եւ քո երեսք երթիցեն առաջի նոցա.

12․ եւ հասցուք ի վերայ նորա ի միում ի տեղեաց ուր եւ գտանիցեմք զնա անդ. եւ պատեսցուք զնովաւ` որպէս իջանիցէ ցաւղ ի վերայ երկրի. եւ ոչ ապրեցուսցուք զնորա եւ ոչ զոք:

13․ Ապա թէ ի քաղաք մտանիցէ` առցէ ամենայն Իսրայէլ քաղաքին այնմիկ պարանս, եւ քարշեսցուք զնոսա մինչչեւ ցհեղեղատս. զի մի մնասցէ անդ եւ մի մի քար:

14․ Եւ ասէ Աբեսողոմ եւ ամենայն այր Իսրայէլի. Քաջ է խորհուրդդ Քուսեայ Արաքացւոյ` քան զխորհուրդ Աքիտոփելայ: եւ Տէր ետ հրաման ցրել զքաջ խորհուրդն Աքիտոփելայ. զի ածցէ Տէր ի վերայ Աբեսողոմայ զամենայն չարիսն:

15․ Եւ ասէ Քուսի Արաքացի ցՍադովկ եւ ցԱբիաթար քահանայս. Զայս ինչ եւ զայս խրատ ետ Աքիտոփէլ Աբեսողոմայ` եւ ծերոց Իսրայէլի, եւ զայս ինչ եւ զայս` ես խորհեցայ:

16․ Եւ արդ` առաքեցէք վաղվաղակի` եւ պատմեցէք Դաւթի եւ ասացէք. Մի ագանիցիս զայս գիշեր յՌաբովթ անապատին, այլ փութասջիր անցանել, գուցէ կլանիցէ զարքայ եւ զամենայն ժողովուրդն որ ընդ նմա:

17․ Եւ Յովնաթան եւ Աքիմաաս կային առ աղբերն Ռովգելայ, եւ չոգաւ աղախին մի եւ պատմեաց նոցա. եւ նոքա գնացին եւ պատմեցին զայս արքայի Դաւթի. զի ոչ կարէին մտանել երեւել ի քաղաքին:

18․ Եւ ետես զնոսա պատանեակ մի, եւ պատմեաց Աբեսողոմայ. եւ չոգան երկոքին, եւ մտին ի տուն առն միոյ ի բաւուրիմ. եւ նորա էր գուբ մի ի տան, եւ մտին անդր:

19․ եւ առ կինն` եւ կափոյց զխուփն ի վերայ գբին, եւ ցամաքեցուցանէր ի վերայ նորա Արաբովթ. եւ ոչ ել բանն ի վեր: 20   Եւ եկին ծառայքն Աբեսողոմայ առ կինն ի տուն անդր, եւ ասեն. Ո՞ւր են Աքիմաաս եւ Յովնաթան: եւ ասէ ցնոսա կինն. Անցին յայնկոյս ջրոյդ. եւ նոքա խնդրեցին զնոսա` եւ ոչ գտին, եւ դարձան յԵրուսաղէմ:

21․ Եւ եղեւ յետ գնալոյն նոցա, ելին ի գբոյն եւ չոգան` պատմեցին արքայի Դաւթի, եւ ասեն ցԴաւիթ. Արիք եւ անցէք  ըստ ջուրդ. զի զայս ինչ եւ զայս խորհեցաւ վասն ձեր Աքիտոփէլ:

22․ Եւ յարեաւ Դաւիթ` եւ ամենայն  ժողովուրդն որ ընդ նմա, եւ անցին ընդ Յորդանան մինչչեւ ի լուսանալ առաւաւտուն, մինչչեւ ոչ մնալոյ եւ ոչ միոյ ուրուք` որ ոչ անց ընդ Յորդանան:

23․ Եւ Աքիտոփէլ իբրեւ ետես թէ ոչ եղեւ խորհուրդն նորա, հանդերձեաց զէշ իւր, եւ յարեաւ գնաց ի տուն իւր ի քաղաք, եւ հրաման ետ տան իւրում, եւ խեղդ արկ` եւ մեռաւ, եւ թաղեցաւ ի գերեզմանի հաւր իւրոյ:

24․ Եւ Դաւիթ եհաս ի բանակս. եւ Աբեսողոմ անց ընդ Յորդանան` ինքն եւ ամենայն Իսրայէլ ընդ նմա:

25․ Եւ զԱմեսայի կացոյց Աբեսողոմ փոխանակ Յովաբայ ի վերայ զաւրուն: եւ Ամեսայի` որդի էր առն որում անուն էր Յոթոր Յեզրայելացի. նա եմուտ առ Աբիգեայ դուստր Յեսսեայ` քոյր Շարուհեայ մաւր Յովաբայ:

26․ եւ բանակեցաւ Աբեսողոմ եւ ամենայն Իսրայէլ յերկրին Գաղաադու:

27․ Եւ եղեւ իբրեւ եհաս Դաւիթ ի բանակսն, Վեսբի որդի Նաասայ Յռաբաթայ որդւոցն Ամոնայ եւ Մաքիր որդի Ամիէլի ի Ղադաբարայ, եւ Բերզելի Գաղաադացի Յռոգելիմայ,

28․ բերին անկողինս տասն, եւ աւթոցս եւ սանս տասն, եւ անաւթս բրտի, եւ ցորեան, եւ գարի, եւ ալեւր, եւ փոխինդ, եւ ոլոռն, եւ ոսպն,

29․ եւ մեղր, եւ կոգի, եւ պատրուճակս, եւ որթս դիեցիկս. եւ մատուցին Դաւթի եւ զաւրուն որ ընդ նմա` ուտել. զի էր զաւրն քաղցեալ եւ ծարաւի, եւ լքեալ յանապատի անդ: