Գլուխ 18

1․ Եւ հանդէս արար Դաւիթ զաւրուն որ ընդ նմա, եւ կացոյց ի վերայ նոցա հազարապետս եւ հարիւրապետս:

2․ եւ առաքեաց Դաւիթ զերիր մասն զաւրուն ի ձեռն Յովաբայ, եւ զերիր մասն ի ձեռն Աբեսսայ որդւոյ Շարուհեայ` եղբաւր Յովաբայ, եւ զերիր մասն ի ձեռն Եթթեայ Գեթացւոյ: եւ ասէ Դաւիթ ցզաւրն. Ելանելով ելից եւ ես ընդ ձեզ:

3․ Եւ ասեն. Ոչ ելցես. զի եթէ փախչիցիմք, ոչ դիցեն ի վերայ մեր զսիրտս. եւ եթէ կիսոյ կէս ի մէնջ մեռանիցիմք` ոչ դիցեն ի վերայ մեր զսիրտ. եւ դու իբրեւ զտասն հազար ի մէնջ ես. եւ արդ` լաւ է թէ դու ի քաղաքի իցես` զի լինիցիս մեզ յաւգնականութիւն:

4․ Եւ ասէ ցնոսա արքայ. Որ ինչ հաճոյ իցէ առաջի ձեր արարից: եւ եկաց արքայ յեց առ դրանն. եւ ամենայն զաւրն ելանէր ըստ հարիւրաւորաց եւ ըստ հազարաւորաց:

5․ Եւ պատուէր ետ արքայ Յովաբայ եւ Աբեսսայ եւ յԵթթեայ` եւ ասէ. Խնայեսջիք ի պատանեակ իմ Աբեսողոմ: եւ ամենայն զաւրն լուաւ ի պատուիրելն արքայի ամենայն իշխանացն վասն Աբեսողոմայ:

6․ Եւ ել ամենայն զաւրն յանտառն ընդդէմ Իսրայէլի, եւ եղեւ կռիւ յանտառին Եփրեմայ.

7․ եւ պարտեցաւ անդ զաւրն Իսրայէլի առաջի ծառայիցն Դաւթի. եւ եղեւ խորտակումն մեծ յաւուր յայնմիկ. եւ անկաւ քսան հազար արանց:

8․ եւ եղեւ անդ պատերազմն` ցրուեալ ընդ ամենայն երեսս երկրին: եւ յաճախեաց անտառն ուտել ի զաւրուէն քան զորս եկեր սուրն յաւուրն յայնմիկ:

9․ Եւ դիպեցաւ Աբեսողոմ առաջի ծառայիցն Դաւթի. եւ Աբեսողոմ էր հեծեալ ի ջորւոջ իւրում, եւ եմուտ ջորին ընդ թաւ կաղնեաւ մեծաւ, եւ պատեցաւ գլուխ նորա ընդ կաղնեաւն, եւ կախեցաւ ընդ երկինս եւ ընդ երկիր, եւ ջորին անց ի ներքոյ նորա:

10․ Եւ ետես այր մի, եւ պատմեաց Յովաբայ եւ ասէ. Ահա տեսի զԱբեսողոմ կախեալ զկաղնւոյն:

11․ եւ ասէ Յովաբ ցայրն որ պատմեաց նմա. Եւ ահա տեսեր` եւ ընդէ՞ր ոչ հարեր զնա ընդ գետին. եւ ես տայի քեզ այսաւր յիսուն սկեղ արծաթոյ` եւ սուսեր մի:

12․ Եւ ասէ այրն ցՅովաբ. Եթէ կշռելով իսկ առնուի ի ձեռաց քոց հազար սիկղ արծաթոյ` ոչ ձգէի զձեռն իմ յորդի արքայի. զի յականջս մեր պատուիրեաց արքայ` քեզ եւ Աբեսսայ եւ Եթթեայ, եւ ասէ. Զգոյշ լինիջիք պատանեկին Աբեսողոմայ,

13․ մի ինչ վնաս առնել անձին նորա. եւ ամենայն բան ոչ թաքչիցի յարքայէ, եւ դու կայցես ի բացեայ:

14․ եւ ասէ Յովաբ. Վասն այդորիկ իսկ անցից առաջի քո: Եւ առ Յովաբ երիս նետս ի ձեռին իւրում, եւ եհար զնոսա ի սրտի Աբեսողոմայ մինչդեռ կենդանի կայր ի կաղնոջն:

15․ եւ պատեցան տասն մանկունք ի զինակրացն Յովաբայ, եւ հարին զԱբեսողոմ եւ սպանին զնա:

16․ Եւ եհար Յովաբ զփողն եղջերեայ, եւ դարձաւ զաւրն որ ընդ նմա, զի մի երթիցեն զհետ Իսրայէլի. զի խնայեաց Յովաբ ի զաւրն:

17․ Եւ առ Յովաբ զԱբեսողոմ, եւ ընկէց զնա ի վիհ մեծ յանտառին ի խորին յոյժ. եւ ամենայն Իսրայէլ փախեաւ այր իւրաքանչիւր ի բնակութիւն իւր:

18․ Բայց Աբեսողոմ մինչդեռ կենդանի էր` կանգնեաց իւր արձան. եւ կանգնեաց ի Յաբին զարձանն ի հովիտս թագաւորաց. քանզի ասաց թէ Չիք իւր որդի որ յիշիցէ զանուն նորա: եւ կոչեաց զարձանն յիւր անուն. եւ կոչեաց զնա ձեռն Աբեսողոմայ մինչչեւ ցայսաւր:

19․ Եւ Աքիմաաս` որդի Սադովկայ ասէ. Ընթացայց տարայց աւետիս արքայի. զի արար նմա Տէր իրաւունս ի ձեռաց թշնամեաց իւրոց:

20․ Եւ ասէ ցնա Յովաբ. Ոչ ես դու այր աւետեաց յաւուր յայսմիկ, եւ տացես աւետիս յայլում աւուր. բայց յաւուր յայսմիկ մի տացես աւետիս, քանզի որդի արքայի մեռաւ:

21․ Եւ ասէ ցՔուսի. Երթ պատմեա արքայի զոր ինչ տեսեր. եւ երկիր եպագ Քուսի Յովաբայ եւ ել:

22․ Եւ յաւել եւս Աքիմաաս որդի Սադովկայ` եւ ասէ ցՅովաբ. Եւ զի՞նչ լինիցի եթէ ընթանայցեմ եւ ես զկնի Քուսեայ: եւ ասէ Յովաբ. Եւ ընդէ՞ր իցէ քեզ այն` եթէ ընթանայցես որդեակ իմ. այսր եկ, ոչ ինչ են քեզ աւետիքն յաւգուտ երթալոյ: 23   եւ ասէ Աքիմաաս. Զի՞ է` թէ ընթանայցեմ: եւ ասէ ցնա Յովաբ. Ընթա: եւ ընթացաւ Աքիմաաս ընդ ճանապարհն Կեքարայ` եւ անց զՔուսեաւ:

24․ Եւ Դաւիթ նստէր ի մէջ երկոցունց դրանցն: եւ գնաց դէտն ի տանիս դրանն ի պարիսպն. ամբարձ զաչս իւր եւ ետես, եւ ահա այր ընթանայր միայն հանդէպ իւր.

25․ եւ աղաղակեաց դէտն եւ ազդ արար արքայի: Եւ ասէ արքայ. Եթէ միայն է` աւետիք են ի բերան նորա: եւ գալով գայր` եւ մերձենայր:

26․ եւ ետես դէտն մեւս եւս այր ընթացեալ. եւ աղաղակեաց դէտն ի դուռն` եւ ասէ. Ահա մեւս եւս այր ընթանայ միայն: եւ ասէ արքայ. Եւ նա աւետաւոր է:

27․ Եւ ասէ դէտն. Տեսանեմ զընթացս առաջնոյն իբրեւ զընթացս Աքիմաասայ որդւոյ Սադովկայ: եւ ասէ արքայ. Այր բարի է նա, եւ բարի աւետեաւք գայ:

28․ Եւ աղաղակեաց Աքիմաաս եւ ասէ ցարքայ. Ողջոյն է. եւ երկիր եպագ ի վերայ երեսաց իւրոց յերկիր, եւ ասէ. Աւրհնեալ է տէր Աստուած քո, որ փակեաց զարս ատելիս քո որ ամբարձին զձեռս իւրեանց ի վերայ տեառն մերոյ արքայի:

29․ Եւ ասէ արքայ. Եթէ ողջո՞յն իցէ մանկանն իմոյ Աբեսողոմայ. եւ ասէ Աքիմաաս. Տեսի խումբ մեծ ուստի առաքեացն Յովաբ ծառայ քո` արքայ զիս զծառայ քո, եւ ոչ գիտացի թէ զինչ իցէ անդ:

30․ եւ ասէ արքայ. Դարձիր եւ արձանացիր: եւ դարձաւ եւ եկաց:

31․ Եւ եհաս Քուսի, եւ ասէ ցարքայ. Աւետիք տեառն իմոյ արքայի. զի արար քեզ Տէր իրաւունս այսաւր ի ձեռաց ամենայն յարուցելոց ի վերայ քո:

32․ Եւ ասէ արքայ ցՔուսի. Եթէ ողջո՞յն իցէ մանկանն իմոյ Աբեսողոմայ. եւ ասէ Քուսի. Եղիցին իբրեւ զմանուկն թշնամիք տեառն իմոյ արքայի եւ ամենայն յարուցեալք ի վերայ քո ի չարութիւն:

33․ Եւ խռովեցաւ արքայ, եւ ել ի վերնատուն դրանն եւ ելաց: եւ այսպէս ասէր ի լալ իւրում. Որդեակ իմ Աբեսողոմ, Աբեսողոմ որդեակ իմ, ո տայր զմահ իմ փոխանակ քո. ես փոխանակ քո Աբեսողոմ որդեակ իմ, որդեակ իմ Աբեսողոմ: