Գլուխ 19

1․ Եւ պատմեցաւ Յովաբայ` եւ ասեն. Ահաւանիկ արքայ լայ եւ սգայ ի վերայ Աբեսողոմայ:

2․ եւ եղեւ փրկութիւնն յաւուր յայնմիկ ի սուգ ամենայն զաւրուն. զի լուաւ զաւրն յաւուր յայնմիկ, ասեն. թէ Տրտմեցաւ արքայ վասն որդւոյն իւրոյ:

3․ Եւ խորշէր զաւրն յաւուր յայնմիկ մտանել ի քաղաքն, որպէս խորշիցի զաւր ամաչեցեալ յորժամ փախչիցի ի պատերազմէ:

4․ Եւ արքայ ծածկեաց զերեսս իւր, եւ կական բարձ ի ձայն մեծ` եւ ասէ. Որդեակ իմ Աբեսողոմ, Աբեսողոմ որդեակ իմ: 5   Եւ եմուտ Յովաբ առ արքայ ի տուն` եւ ասէ. Յամաւթ արարեր այսաւր զերեսս ամենայն ծառայից քոց, որ ապրեցուցին զքեզ այսաւր` եւ զանձինս ուստերաց եւ դստերաց քոց, եւ զանձինս կանանց եւ հարճից քոց.

6․ սիրել զատելիս քո` եւ ատել զսիրելիս քո: եւ ուսուցեր այսաւր` եթէ ոչ ինչ համարիս զիշխանս քո, եւ ոչ զծառայս քո. եւ ստուգեալ գիտեմ այսաւր, զի եթէ Աբիսողոմ կենդանի էր` մեք ամենեքեան մեռեալ էաք, եւ այն էր քեզ հաճոյ:

7․ Եւ արդ` յարուցեալ ել եւ խաւսեաց ի սիրտս ծառայից քոց: զի ի Տէր երդուեալ, եթէ ոչ ելանիցես այսաւր, եթէ ագանիցի առ քեզ այր մի զգիշերս զայս. եւ գիտասջիր յանձն քո, թէ չար լինիցի քեզ այն` քան զամենայն չարիս որ եկին ի վերայ քո ի մանկութենէ քումմէ մինչչեւ ցայժմ:

8․ Եւ յարեաւ արքայ եւ նստաւ ի դրանն. եւ ամենայն զաւրուն պատմեցին եւ ասեն. Ահա արքայ նստի առ դրանն. եւ եմուտ ամենայն զաւրն առաջի արքայի: եւ Իսրայէլ փախեաւ այր իւրաքանչիւր ի բնակութիւն իւր:

9․ Եւ ամենայն ժողովուրդն խղճէր յամենայն ցեղսն Իսրայէլի, եւ ասէին. Արքայ Դաւիթ փրկեաց զմեզ յամենայն թշնամեաց մերոց, եւ նա ապրեցոյց զմեզ ի ձեռաց այլազգեաց. եւ արդ` փախստական է յերկրէս եւ ի թագաւորութենէ իւրմէ, յԱբեսողոմայ:

10․ եւ Աբեսողոմ զոր աւծաք մեզ` մեռաւ ի պատերազմի. եւ արդ` դուք զի՞ լռեալ կայք ի դարձուցանելոյ զարքայ: եւ պատգամ ամենայն Իսրայէլի եկն առ արքայ:

11․ Եւ արքայ Դաւիթ առաքեաց առ Սադովկ եւ առ Աբիաթար քահանայս` եւ ասէ. Խաւսեցարուք ընդ ծերս Յուդայ եւ ասացէք. ընդէ՞ր լինիք յետինք դարձուցանել զարքայ ի տուն իւր. եւ պատգամ ամենայն Իսրայէլի եկն առ արքայ:

12․ Եւ ասէ Դաւիթ ցցեղսն Յուդայ. Ոսկերք իմ եւ մարմինք իմ դուք` ընդէ՞ր լինիք յետինք դարձուցանել զարքայ ի տուն իւր:

13․ Եւ ցԱմեսայի ասասջիք. Ո՞չ ոսկր իմ եւ մարմին իմ ես դու, եւ արդ` աւն եւ աւն արասցէ ինձ Աստուած եւ աւն եւ աւն յաւելցէ, եթէ ոչ իշխան զաւրուն լինիցիս առաջի իմ զամենայն աւուրս փոխանակ Յովաբայ:

14․ Եւ դարձոյց զսիրտ ամենայն Յուդայ իբրեւ զառն միոջ, եւ առաքեցին առ արքայ եւ ասեն. Դարձիր դու` եւ ամենայն ծառայք քո:

15․ եւ դարձաւ արքայ, եւ եկն մինչչեւ ցՅորդանան: Եւ արք Յուդայ եկին ի Գաղգաղայ` երթալ ընդ առաջ արքայի, եւ անցուցանել զարքայ ընդ Յորդանան:

16․ Եւ աճապարեաց Սեմէի որդի Գերայ որդւոյ Յիմենայ ի Բաւորիմայ, եւ էջ ընդ առն Յուդայ ընդ առաջ արքայի Դաւթի.

17․ եւ հազար այր ընդ նմա ի Բենիամինէ, եւ Սիբա` պատանի տանն Սաւուղայ, եւ հնգետասանեքին որդիք նորա ընդ նմա, եւ քսանեքին ծառայք նորա ընդ նմա. եւ կազմեցին զՅորդանան առաջի արքայի:

18․ եւ հարին սպասաւորութիւն անցուցանելոյ զարքայ: եւ անցին անցաւորք զարթուցանել զտունն արքայի, եւ առնել զողորմութիւն առաջի աչաց նորա: Եւ Սեմէի որդի Գերայ անկաւ ի վերայ երեսաց իւրոց առաջի արքայի` մինչ անցանէր ընդ Յորդանան,

19․ եւ ասէ ցարքայ. Մի համարեսցի տէր իմ արքայ` անաւրէնութիւն. եւ մի յիշեսցէ զոր ինչ յանցեաւ ծառայ քո` յաւուր յորում ելանէր տէր իմ յԵրուսաղէմէ, դնել արքայի ի սրտի իւրում.

20․ զի գիտաց ծառայ քո թէ մեղայ. եւ ահաւասիկ ես եկի այսաւր յառաջագոյն քան զամենայն տունն Յովսեփայ, իջանել ընդ առաջ տեառն իմոյ արքայի:

21․ Եւ պատասխանի ետ Աբեսսա որդի Շարուհեայ` եւ ասէ. Միթէ փոխանակ այնորիկ ոչ՞ մեռանիցի Սեմէի, զի անէծ զաւծեալ Տեառն:

22․ Եւ ասէ Դաւիթ. Զի՞ կայ` իմ եւ ձեր որդիք Շարուհեայ, զի լինիք դուք ինձ այսաւր ի դաւաճանութիւն. մի ոք մեռցի այսաւր այր յԻսրայէլէ. միթէ ո՞չ գիտիցեմ ես, զի այսաւր թագաւոր եմ ի վերայ Իսրայէլի:

23․ եւ ասէ արքայ ցՍեմէի. Ոչ մեռցիս. եւ երդուաւ նմա արքայ:

24․ Եւ Մեմփիբոսթէ որդի Յովնաթանու` որդւոյ Սաւուղայ էջ ընդ առաջ արքայի. եւ ոչ էր դարմանեալ զոտս իւր, եւ ոչ էր հատեալ զեղընգունս իւր, եւ ոչ էր փոքրեալ զմաւրուս իւր, եւ ոչ էր արարեալ զընչաւք իւրովք, եւ ոչ էր լուացեալ զհանդերձս իւր, յաւրէ յորմէ հետէ գնաց արքայ` մինչչեւ ցաւրն յորում եկն նա խաղաղութեամբ:

25․ Եւ եղեւ իբրեւ եմուտ յԵրուսաղէմ, ել ընդ առաջ արքայի: եւ ասէ ցնա արքայ. Զի՞ է` զի ոչ գնացեր ընդ իս Մեմփիբոսթէ:

26․ Եւ ասէ ցնա Մեմփիբոսթէ. Տէր իմ արքայ. ծառայ իմ արհամարհեաց զիս, զի ասաց ծառայ քո ցնա` թէ կազմեա ինձ էշ, եւ հեծայց ի նա եւ գնացից ընդ արքայի. զի կաղ է ծառայ քո.

27․ եւ զայրացոյց ընդ իս ծառայ քո զքեզ տէր իմ արքայ. եւ տէր իմ արքայ արար զբարին իւր առաջի իւր իբրեւ զհրեշտակ Աստուծոյ. եւ արդ` արա որ ինչ բարի է յաչս քո.

28․ զի ոչ էր ամենայն տուն հաւր իմոյ` եթէ ոչ արք մահու տեառն իմոյ արքայի, եւ կարգեցեր զծառայ քո ընդ այնոսիկ որ ուտեն զսեղան արքայի. եւ արդ` զի՞նչ իրաւունք կան իմ այսուհետեւ բողոք ունել միւսանգամ առ արքայ:

29․ Եւ ասէ ցնա արքայ. Զի՞ եւս խաւսիս զբանս քո. ասացի թէ դու եւ Սիբա բաժանեցէք զագարակն:

30․ եւ ասէ Մեմփիբոսթէ ցարքայ. Զամենայն իսկ առցէ, որովհետեւ եկն արքայ խաղաղութեամբ ի տուն իւր:

31․ Եւ Բերզելի Գաղաադացի էջ յՌոգէլիմայ, եւ անցոյց զարքայ ընդ Յորդանան, յուղարկել զնա ի Յորդանանէ:

32․ եւ Բերզելի` այր ծեր էր յոյժ, որդի ամաց ութսնից. եւ նա կերակրեաց զարքայ մինչ բնակէր ի բանակս. զի այր մեծ էր յոյժ:

33․ Եւ ասէ արքայ ցԲերզելի. Դու անցցես ընդ իս` եւ կերակրեցից զծերութիւն քո ընդ իս յԵրուսաղէմ:

34․ Եւ ասէ Բերզելի ցարքայ. Քանի՞ ինչ իցեն աւուրք կենաց իմոց, զի ելանիցեմ ընդ արքայի յԵրուսաղէմ.

35․ որդի ամաց ութսնից եմ ես այսաւր, միթէ գիտիցե՞մ ինչ ի մէջ բարւոյ եւ չարի. կամ թէ իմանայցէ՞ ծառայ քո զոր ուտեմ, կամ զոր ըմպեմ. կամ թէ լսիցե՞մ տակաւին զձայն գուսանաց եւ վարձակաց. եւ ընդէ՞ր լինիցի ծառայ քո բեռն տեառն իմոյ արքայի:

36․ Սակաւ ինչ անց ծառայ քո ըստ Յորդանան ընդ արքայի. եւ ընդէ՞ր հատուցանիցես ինձ արքայ զհատուցումնդ զայդ:

37․ նստցի ծառայ քո` եւ մեռցի ի քաղաքի իւրում, եւ ի գերեզմանի հաւր եւ մաւր իւրոյ. եւ ահա ծառայ քո Քամաամ անցցէ ընդ տեառն իմում արքայի. եւ արա նմա որ ինչ բարի թուի առաջի աչաց քոց:

38․ Եւ ասէ արքայ. Անցցէ ընդ իս Քամաամ, եւ ես արարից նմա որ ինչ բարի իցէ առաջի աչաց իմոց. եւ զամենայն որ ինչ ակն ունիցիս յինէն` արարից քեզ:

39․ Եւ անց ամենայն ժողովուրդն ընդ Յորդանան, անց եւ արքայ. եւ համբուրեաց արքայ զԲերզելի, եւ աւրհնեաց զնա. եւ դարձաւ ի տեղի իւր:

40․ Եւ անց արքայ ի Գաղգաղայ, անց եւ Քամաամ ընդ նմա. եւ ամենայն ժողովուրդն Յուդայ անցին ընդ արքայի, եւ կէս ժողովրդեանն Իսրայէլի:

41․ Եւ ահա ամենայն այր Իսրայէլի եկին առ արքայ` եւ ասեն ցնա. Զի՞ է` զի գողացան զքեզ եղբարք մեր այր Յուդայ, եւ անցուցին զարքայ եւ զտուն իւր ընդ Յորդանան:

42․ Եւ պատասխանի ետ այր Յուդայ` առն Իսրայէլի` եւ ասէ. Քանզի մերձաւոր իսկ է իմ արքայ. եւ ընդէ՞ր դժկամակ եղեր վասն բանիս այսորիկ. միթէ ուտելով կերա՞ք ինչ յարքայէ, կամ թէ պարգե՞ւ ետ մեզ, կամ թէ զբեռն ինչ եբա՞րձ զմեր:

43․ Պատասխանի ետ այր իսրայէլացի առն Յուդայ` եւ ասէ. Տասն ձեռք իմ են յարքայի, եւ անդրանիկ ես եմ քան զձեզ: նա` եւ ի Դաւթի` ես ի վեր եմ քան զքեզ. եւ ընդէ՞ր այդպէս թշնամանեցէր զիս: եւ ոչ եղեւ ի համարի բան իմ, նախ` ինձ դարձուցանել զարքայ առ իս: եւ խստացաւ բան առն Յուդայ` քան զբան առն Իսրայէլի: