Գլուխ 20

1․ Եւ անդ խրախուսեաց այր անաւրէն, եւ անուն նորա Սաբեէ որդի Բոքորայ` այր յեմինացի, փող եհար եղջերաւ` եւ ասէ. Չիք մեր մասն ի Դաւթի, եւ ոչ ժառանգութիւն յորդին յԵսսեայ. չուեա այր իւրաքանչիւր ի բնակութիւն քո Իսրայէլ:

2․ Եւ ել ամենայն Իսրայէլ ի Դաւթէ զկնի Սաբէեայ` որդւոյ Բոքորայ, եւ այր Յուդայ չոգան զհետ թագաւորին իւրեանց ի Յորդանանէ մինչչեւ ցԵրուսաղէմ:

3․ Եւ եմուտ Դաւիթ ի տուն իւր յԵրուսաղէմ, եւ առ արքայ զտասն կանայս զհարճս իւր զոր եթող պահել զտունն, եւ ետ զնոսա ի տուն պահեստի, եւ կերակրեաց զնոսա. եւ առ նոսա ոչ եմուտ: եւ էին նեղեալք, զի մինչչեւ ցաւր մահուան իւրեանց կեցին այրիք:

4․ Եւ ասէ Դաւիթ ցԱմեսայի. Ձայնեա առ իս զամենայն այր Յուդայ զերիս աւուրս, եւ դու այսր եկեսցես:

5․ եւ գնաց Ամեսա ի ձայնել զՅուդայ, եւ յամեաց ի ժամանակէն զոր եդ նմա:

6․ Եւ ասէ Դաւիթ ցԱբեսսա. Արդ` առնէ մեզ չար Սաբեէ որդի Բոքորայ վասն Աբեսողոմայ. արդ` առ դու   ընդ քեզ զծառայս տեառն քոյ, եւ պնդեաց զհետ նորա. գուցէ գտանիցէ իւր քաղաքս ամուրս, եւ ածիցէ  ստուերածս ի վերայ աչաց մերոց:

7․ Եւ ելին զհետ նորա Աբեսսա եւ արք Յովաբայ, եւ Քերեթին եւ Ոփելեթին, եւ ամենայն զաւրաւորք, եւ ելին յԵրուսաղէմէ պնտել զհետ Սաբեէ որդւոյ Բոքորայ:

8․ Եւ մինչդեռ էին նոքա առ վիմին մեծի որ ի Գաբաւոն, եւ Ամեսայի եմուտ առաջի նոցա. եւ Յովաբ զգեցեալ էր վարապանակս զրահից. եւ ի վերայ նորա սուսեր ընդ մէջ, ծպնեալ առ միջովն պատենիւք հանդերձ. եւ այն էր թերաքամեալ:

9․ եւ ասէ Յովաբ ցԱմեսայի. Եթէ ո՞ղջ իցես եղբայր. եւ կալաւ Յովաբ աջով ձեռամբն զմաւրուացն Ամեսայայ համբուրել զնա:

10․ Եւ Ամեսայի ոչ զգուշացաւ ի սրոյն որ էր ի ձեռին Յովաբայ. եւ եհար զնա նովաւ Յովաբ ընդ սնակուշտն, եւ վայթեցաւ որովայն նորա յերկիր, եւ ոչ կրկնեաց նմա. եւ մեռաւ Ամեսայի: եւ Յովաբ եւ Աբեսսա եղբայր իւր պնդեցան զհետ Սաբէեայ որդւոյ Բոքորեայ.

11․ Եւ այր ոմն եկն եկաց ի վերայ Ամեսայայ յերիտասարդացն Յովաբայ` եւ ասէ. Որ ոք սիրիցէ զՅովաբ կամ զԴաւիթ, երթիցէ զհետ Յովաբայ եւ Աբեսսայ:

12․ եւ Ամեսայի կայր թաթաւեալ յարեանն ի մէջ ճանապարհին. եւ տեսեալ առնն եթէ զտեղի առեալ կայ ամենայն զաւրն, տապալեաց զԱմեսայի ի ճանապարհէն յանդն, եւ ընկէց ի վերայ նորա հանդերձ. քանզի տեսանէր զամենայն ոք եկեալ կացեալ ի վերայ նորա:

13․ եւ իբրեւ փոխեցաւ ի ճանապարհէն, անցանէր ամենայն այր Իսրայէլի զհետ Յովաբայ պնդել զհետ Սաբէեայ որդւոյ Բոքորեայ:

14․ Եւ անց ընդ ամենայն ցեղսն Իսրայէլի Յաբէլ եւ ի Բեթմաքա` եւ ամենայն ընտիր ընտիրքն ժողովեցան եւ եկին զհետ նորա:

15․ եւ հասին եւ պատեցին ի վերայ նորա զԱբէլ եւ զԲեթմաքայ. եւ կուտեցին բլուր հողոյ հանդէպ քաղաքին, եւ կանգնեցաւ իբրեւ զպատուար. եւ ամենայն զաւրն որ ընդ Յովաբայ եղծանէր կործանէր զպարիսպն:

16․ Եւ աղաղակեաց կին մի իմաստուն ի պարսպէն եւ ասէ. Լուարուք լուարուք, ասացէք ցՅովաբ` մատիր այսր եւ խաւսեցայց ընդ քեզ:

17․ եւ մատեաւ առ նա: եւ ասէ կինն. Եթէ դո՞ւ իցես Յովաբ. եւ ասէ. Ես եմ: եւ ասէ ցնա. Լուր բանից աղախնոյ քոյ: եւ ասէ Յովաբ. Ի լսել եկեալ եմ ես:

18․ Եւ խաւսեցաւ` եւ ասէ. Բան ճառէր յառաջինս. եւ ասէին` հարցանելով հարցաւ յԱբէլ եւ ի Դան. Եթէ պակասեցուսցե՞ն, եթէ ասպատակիցե՞ն, հաւատարիմք Իսրայէլի, հարցանելով հարցցեն յԱբէլ, եւ ապա թէ պակասեցուցանիցեն:

19․ ես եմ խաղաղարար հաստատութեան Իսրայէլի, եւ դու խնդրես կոտորե՞լ զքաղաքս Իսրայէլի. ընդէ՞ր ընկղմես զժառանգութիւն Տեառն:

20․ Պատասխանի ետ Յովաբ` եւ ասէ. Քաւ լիցի ինձ, քաւ լիցի թէ ընկղմեցից եւ ապականեցից.

21․ ոչ այդպէս է բանդ. զի այր մի ի լեռնէ Եփրեմի Սաբեէ անուն նորա որդի Բոքորեայ, համբարձ զձեռն իւր ի վերայ արքայի Դաւթի. տուք ինձ զնա միայն, եւ գնացից ի քաղաքէ աստի: եւ ասէ կինն ցՅովաբ. Ահա գլուխ նորա ընկեսցի առ քեզ ընդ պարիսպս:

22․ Եւ եմուտ կինն առ ամենայն ժողովուրդն, եւ խաւսեցաւ ընդ ամենայն քաղաքին իմաստութեամբ իւրով հատանել զգլուխն Սաբէեայ որդւոյ Բոքորեայ: եւ հատին ընկեցին զնա առ Յովաբ: եւ փող եհար եղջերեաւն, եւ սփռեցան ի քաղաքէն յայնմանէ այր իւրաքանչիւր ի բնակութիւնս իւրեանց: եւ Յովաբ դարձաւ յԵրուսաղէմ առ արքայ:

23․ Եւ Յովաբ էր ի վերայ ամենայն զաւրուն Իսրայէլի. եւ Բանեա որդի Յովիդեայ ի վերայ Քերեթայն եւ Ոփելեթայն.

24․ եւ Ադոնիրամ ի վերայ հարկաց. եւ Յովսափատ որդի Աքիլովթայ յիշատակաց.

25․ եւ Սուդաէ դպրապետ. եւ Սադովկ եւ Աբիաթար քահանայք.

26․ եւ Իրաս որ յարիմն էր` քահանայ Դաւթի: