1․ Եւ այս են բանք Դաւթի վերջինք: Հաւատարիմ Դաւիթ որդի Յեսսեայ, եւ հաւատարիմ այր. զոր կացոյց Տէր յաւծեալ Աստուծոյ ի վերայ Յակոբայ: եւ վայելուչ են երգք Իսրայէլի:
2․ Հոգի Տեառն խաւսեցաւ յիս, եւ բան նորա ի լեզուի իմում.
3․ ասէ Աստուած Իսրայէլի. Ընդ իս իսկ խաւսեցաւ պահապանն Իսրայէլի: առակումն ասացի ի մարդ. ով է որ կալցի զերկիւղէ տեառն եւ զԱստուծոյ,
4․ ի լոյս առաւաւտու: Ծագեալ զարեգակն ընդ առաւաւտս` եւ ոչ նուաղեաց ի լուսոյ. եւ իբրեւ անձրեւոյ դալարւոյ յերկրէ.
5․ զի ոչ եթէ այս տուն իմ է ընդ հզաւրին Աստուծոյ: Ուխտ յաւիտենական եդ ինձ պատրաստական յամենայն ժամանակի պահել. զի ամենայն փրկութիւն իմ, եւ ամենայն կամք իմ Տէր: Զի մի բողբոջեսցի
6․ անաւրէնն: իբրեւ զփուշ մերժեալ են ամենեքին նոքա` որ ոչ ձեռամբ առնուցուն.
7․ եւ աշխատեսցի ի նոսա այր. եւ զամենայն երկաթ եւ զփայտ նիզակի հրով այրեսցէ. եւ բորբոքեսցին ամաւթով իւրեանց:
8․ Այս անուանք են զաւրավարացն Դաւթի: Յեբուսթէ Քանանացի` իշխան երիր մասինն: Աքինոն Ամոնացի, ի վերայ ութ հարիւրոց ի միում նուագի:
9․ Եւ յետ նորա Եղէանան որդի հաւրեղբաւր նորա` որդի Սովսացւոյն, ի մէջ երից զաւրավարացն Դաւթի. Յռեմա ի նախատել նորա զայլազգիս, ուր գումարեցան ի պատերազմ.
10․ եւ խրախուսեաց այր Իսրայէլի. եւ նա յարեաւ եւ եհար յայլազգեացն` մինչչեւ մատզեցաւ ձեռն նորա սրովն. եւ արար Տէր փրկութիւն մեծ յաւուր յայնմիկ. եւ զաւրն նստէր յետոյ նորա. բայց միայն ի կապուտն:
11․ եւ յետ նորա Սամաա որդի Սիսայ Արուկացի: Եւ ժողովեցան այլազգիքն ի ծնաւտն, եւ անդ էր վիճակ անդի լի ոսպամբ. եւ զաւրն փախեաւ յերեսաց այլազգեացն:
12․ եւ արձանացաւ ի մէջ վիճակին, եւ ապրեցոյց զնա, եւ եհար զայլազգիսն. եւ արար Տէր փրկութիւն մեծ:
13․ Եւ իջին երեք յերեսնից, եւ իջին ի Կասովա առ Դաւիթ` յայրն Ոդողոմայ: գունդք այլազգեացն բանակեալ էին ի հովիտս Ռափայնոցն.
14․ եւ Դաւիթ էր յայնժամ յամրոցին: Եւ ճամբար այլազգեացն էր յայնժամ ի Բեթղահէմ:
15․ եւ ցանկացաւ Դաւիթ` եւ ասէ. Ո արբուցանէր ինձ ջուր ի ջրհորոյն Բեթղահեմի որ առ դրանն է:
16․ եւ գունդք այլազգեացն էին ի Բեթղահէմ. եւ հատին երեք զաւրավարք զբանակն այլազգեաց` եւ հանին ջուր ի ջրհորոյն Բեթղահեմի որ առ դրանն. եւ առին եւ եկին առ Դաւիթ. եւ ոչ կամեցաւ ըմպել զայն, այլ նուիրեաց զայն Տեառն,
17․ եւ ասէ. Քաւ լիցի ինձ Տէր առնել զայդ, եթէ զարիւն արանց երթելոց ոգւովք չափ` ըմպիցեմ. եւ ոչ կամեցաւ ըմպել զայն: զայս արարին երեք զաւրավարքն:
18․ Եւ Աբեսսա` եղբայր Յովաբայ որդի Շարուհեայ, ինքն իշխան ի մէջ երիցն. եւ նա կանգնեաց զնիզակն իւր ի վերայ երեքարիւրոց վիրաւորաց. եւ նորա անուն
19․ ի մէջ երիցն յայնցանէ փառաւորեալ, եւ եղեւ նոցա իշխան. եւ մինչչեւ յերիսն ոչ եհաս:
20․ Եւ Բանեա որդի Յովիդեայ որդի առն զաւրաւորի, որոյ բազում գործ գործեալ էր ի Կաբէելա. եւ նա եհար զերկուս որդիսն Ադրիելի Մովաբացւոյ. եւ նա էջ եւ սպան զառեւծն ի մէջ գբին յաւուր ձեան.
21․ եւ նա սպան զայրն երեւելի` զայրն եգիպտացի. եւ ի ձեռին եգիպտացւոյն էր նիզակ իբրեւ զփայտ կամրջի. եւ էջ առ նա նիզակաւն, եւ յափշտակեաց զնիզակն ի ձեռաց եգիպտացւոյն, եւ սպան զնա նորին նիզակաւ:
22․ զայս արար Բանեա որդի Յովիդեա:
23․ եւ նորա անուն ի մէջ երիցն զաւրաւորաց. յերիցն փառաւորեալ, եւ առ երիսն ոչ հասանէր: եւ կարգեաց զնա Դաւիթ ի վերայ համբարաց իւրոց: Եւ այս անուանք են զաւրաւորացն Դաւթի արքայի:
24․ Ասայէլ եղբայր Յովաբայ, նա էր ի մէջ երեսնիցն: Ելէանան որդի Ելիուդայ հաւրեղբաւր նորա ի Բեթղահէմ:
25․ Սամաա Ռուդացի: Սելլոմ Կելովթացի:
26․ Ալլաս Փելլատացի: Իրաս` որդի Եսկաթայ Թեկուացի:
27․ Աբիեզեր Անաթովթացի` յորդւոցն Ասովթացւոյն:
28․ Էլլոն Աղիոյացի: Նոերէ Նետոփաթացի:
29․ Ալափ, որդի Փամփանայ: Անաովէ Նեփլաթացի: Եթթի, որդի Ռիբայ ի Գաբաեթայ որդւոցն Բենիամինի Եփրաթացւոյ:
30․ Ադդայի ի ձորոյն Գովասայ:
31․ Աբիելբոն ի դաշտավայրացն Ադդայի ի Նաքալայ: Գասբիէ Լադաբարացի: Ասմոն Բարսամացի:
32․ Եղիաս Սալաբոնացի: որդի Ասանայ, Յովնաթան:
33․ Սամնան Արովդացի: Եղիան, որդի Արեդայ Արաթիրացի:
34․ Աղիփաղեթ, որդի Ասիբացւոց` որդի Ամաքայ: Եղիաբ, որդի Աքիտոփելայ Գաղամոնացւոյ:
35․ Ասարէ Կարմելացի: Տուուր Երքացի:
36․ Գաղա, որդի Նաթանայ ի զաւրութենէ որդի Գաղաադայ:
37․ Էլիէ Ամմանացի: Գելովրէ Բեքրովթացի, կապարճակիր Յովաբայ որդւոյ Շարուհեայ:
38․ Իրաս Յեթերացի: Գարէի` Բեթանացի:
39․ Ուրիա Քետացի: ընդ ամենայն երեսուն եւ եւթն: Այլք ի հեղեղատէն Գագտբիելի որդւոյ Արաբովթացւոյն:
Հաղորդում կայքում սխալի վերաբերյալ
Տվյալ հատվածում առկա է սխալ: