Գլուխ 24

1․ Յաւուրս նորա ել Նաբուքոդոնոսոր արքայ Բաբելոնի, եւ եղեւ նորա ծառայ Յովակիմ ամս երիս. եւ դարձաւ վտարանջեաց ի նմանէ:

2․ Եւ առաքեաց նմա Տէր զմեկնակազէնսն քաղդէացւոց, եւ զմեկնակազէնսն ասորւոց, եւ զմեկնակազէնսն Մովաբայ, եւ զմեկնակազէնսն որդւոցն Ամովնայ. եւ առաքեաց զնոսա յերկիրն Հրէաստանի սատակել զնոսա ըստ բանին Տեառն զոր խաւսեցաւ ի ձեռն ծառայից իւրոց մարգարէից:

3․ Քանզի բարկութիւն Տեառն էր ի վերայ Յուդայ մերժել զնա յերեսաց իւրոց` վասն մեղաց Մանասէի, ըստ ամենայնի զոր արար:

4․ եւ վասն անպարտ արեանցն զոր եհեղ, եւ ելից զԵրուսաղէմ անպարտ արեամբ. եւ ոչ կամեցաւ Տէր ցածնուլ:

5․ Եւ մնացորդք բանիցն Յովակիմայ, եւ ամենայն ինչ զոր արար. ո՞չ աւանիկ գրեալ են ի գիրս բանից աւուրց թագաւորացն Յուդայ:  Եւ ննջեաց Յովակիմ ընդ հարս իւր:

6․ եւ թագաւորեաց Յովաքիմ որդի նորա ընդ նորա:

7․ Եւ ոչ եւս յաւել արքայն եգիպտացւոց ելանել յերկրէն իւրմէ. քանզի առ արքայն Բաբելոնի ի հեղեղատէն եգիպտացւոց մինչչեւ ցգետն Եփրատ, զամենայն ինչ որ էր արքային եգիպտացւոց:

8․ Որդի ամաց ութուտասնից էր Յովաքիմ ի թագաւորել իւրում, եւ երիս ամիսս թագաւորեաց յԵրուսաղէմ. եւ անուն մաւր նորա Նեսթա, դուստր Ելեմաթայ յԵրուսաղէմէ:

9․ եւ արար չար առաջի Տեառն, ըստ ամենայնի զոր արար հայր նորա:

10․ Ի ժամանակին յայնմիկ ել Նաբուքոդոնոսոր արքայ Բաբելոնի յԵրուսաղէմ. եւ եկն քաղաքն ի պաշարումն:

11․ եւ եմուտ արքայն բաբելացւոց ի քաղաքն. եւ ծառայք նորա պաշարեալ պահէին զնա:

12․ Եւ ել Յովաքիմ արքայ Յուդայ առ արքայն բաբելացւոց` ինքն եւ ծառայք իւր, եւ մայր իւր եւ իշխանք իւր, եւ ներքինիք իւր: եւ առ զնոսա արքայն բաբելացւոց. յամի ութերորդի թագաւորութեան իւրոյ:

13․ Եւ եհան զամենայն գանձս տանն Տեառն, եւ զգանձս տան թագաւորին. եւ կոտորեաց զամենայն անաւթս ոսկեղէնս զոր արար Սողոմոն արքայ Իսրայէլի ի տաճարին Տեառն ըստ բանին Տեառն:

14․ Եւ խաղացոյց զամենայն Երուսաղէմ, եւ զամենայն իշխանս, եւ զամենայն զաւրաւորս զաւրութեամբ ի գերութեան, տասն հազար գերեաց. եւ զամենայն հիւսունս եւ զդահիճս, եւ ոչ ոք մնաց բաց յաղքատաց երկրին:

15․ Եւ խաղացոյց զՅովաքիմ ի Բաբելոն, եւ զմայր թագաւորին, եւ զկանայս նորա, եւ զներքինիս նորա. եւ զզաւրաւորս երկրին վարեաց ի գերութիւն յԵրուսաղէմէ ի Բաբելոն:

16․ եւ զամենայն արս զաւրութեան արս եւթն հազար: եւ զհիւսունս եւ զդահիճս հազար այր, ամենեքեան զաւրաւորք պատերազմաւղք: եւ վարեաց զնոսա արքայն բաբելացւոց ի գերութեան ի Բաբելոն:

17․ Եւ թագաւորեցոյց արքայն բաբելացւոց զՄեթթանիա որդի նորա ընդ նորա. եւ եդ անուն նմա Սեդեկիա:

18․ Որդի քսան եւ մի ամաց էր Սեդեկիա ի թագաւորել իւրում. եւ մետասան ամ թագաւորեաց յԵրուսաղէմ. եւ անուն մաւր նորա Ամատել դուստր Երեմիայի ի Ղոբնայ:

19․ եւ արար չար առաջի Տեառն ըստ ամենայնի զոր արար Յովաքիմ:

20․ զի սրտմտութիւն Տեառն էր ի վերայ Երուսաղէմի եւ Յուդայ, մինչչեւ ընկեսցէ զնոսա յերեսաց իւրոց: եւ նշկահեաց Սեդեկիա զարքայն բաբելացւոց: